Read Kangri 1 यूहन्ना 2 Bible Online

1 यूहन्ना 2 - Kangri bible

1 यूहन्ना 2

¹हे मेरे प्यारे बच्चो, मैं एह़ गल्लां तुहां जो इसतांई लिखदा ऐ, कि तुहां पाप ना करन; कने जे कोई पाप करैं, तां पिता परमात्मे अल्ल अहां तांई इक्क सहायक ऐ, जेह्ड़ा अहां दे पापां दी माफी तांई तिस नैं प्रार्थना करदा ऐ, मतलब यीशु मसीह जेह्ड़ा धर्मी ऐ;

²कने तिन्हीं ई अहां दे पापां दी माफी तांई बलिदान दित्या ऐ, कने सिर्फ अहां तांई नीं अपर सारे संसारे दे लोकां दे पापां तांई भी।

³जे अहां परमात्मे दे हुक्मां जो मनगे, तां इसते अहां जो पता लग्गी जांगा कि अहां तिसियो जाणदे हन।

⁴जेह्ड़ा कोई एह़ ग्लांदा ऐ, “मैं तिसियो जाणी गेआ ऐ,” कने तिसदेयां हुक्मां जो नीं मनदा, सैह़ झूठा ऐ; कने परमात्मे दिया सच्चाईया दे मताबक नीं जींदा ऐ।

⁵अपर जेह्ड़ा कोई परमात्मे दे वचनां जो मनदा ऐ, तिस च सच्च-बिच्च परमात्मे दा प्यार प्रगट होएया ऐ। इसते अहां जाणदे हन, कि अहां तिस च हन।

⁶कने जेह्ड़ा कोई एह़ ग्लांदा ऐ, कि मैं तिस च बणी रैंह्दा ऐ, तां तिसियो चाइदा कि अप्पु भी तिंआं ई जीन जिंआं यीशु मसीह ज़िन्दगी जींदा था।

⁷हे प्यारे साथी बसुआसियो, मैं तुहां जो कोई नौआं हुक्म नीं लिखदा, अपर सैई पराणा हुक्म जेह्ड़ा सुरू ते तुहां जो मिल्लेया ऐ; एह़ पराणा हुक्म सैई वचन ऐ, जिसियो तुहां सुणेया ऐ, कने यीशु मसीह च बसुआस कित्ता।

⁸भिरी भी मैं तुहां जो नौआं हुक्म लिखदा ऐ, कने इसदी सच्चाई मसीह च भी कने तुहां च भी दुस्सदी ऐ, क्जोकि नेहरा खत्म हुंदा जांदा ऐ कने सच्चाईया दी लौ हुण चमकणा लग्गी ऐ।

⁹जेह्ड़ा कोई एह़ ग्लांदा ऐ, कि मैं लौई च जीआ दा ऐ, अपर अपणे बसुआसी भाऊये नैं बैर रखदा ऐ, तां सैह़ अह्ल्ली तिकर नेहरे च जीआ दा ऐ।

¹⁰जेह्ड़ा कोई अपणे भाऊये नैं प्यार रखदा ऐ, सैह़ लौई च जींदा ऐ, कने ठोकर नीं खाई सकदा ऐ।

¹¹अपर जेह्ड़ा कोई अपणे भाऊये नैं बैर रखदा ऐ, सैह़ नेहरे च जीआ दा ऐ कने नेहरे च चलदा ऐ, कने एह़ नीं जाणदा कि कतांह चलेया ऐ, क्जोकि नेहरें तिसदियां अखीं अन्नियां करी दित्तियां हन।

¹²हे प्यारे बच्चो, मैं तुहां जो इसतांई लिखदा ऐ, कि यीशु मसीह दे नांऐ ते तुहां दे पाप माफ होएयो हन।

¹³हे पिताओ, मैं तुहां जो इसतांई लिखदा ऐ, कि जेह्ड़ा सुरू ते ऐ, तुहां तिसियो जाणदे हन। हे जुआनो, मैं तुहां जो इसतांई लिखदा ऐ, कि तुहां तिस सैताने पर जय पाई ऐ। हे बच्चो, मैं तुहां जो इसतांई लिख्या ऐ, कि तुहां पिता परमात्मे जो जाणी लेआ हन।

¹⁴हे पिताओ, मैं तुहां जो इसतांई लिख्या ऐ, कि जेह्ड़ा सुरू ते ऐ तुहां तिसियो जाणी गै हन। हे जुआनो, मैं तुहां जो इसतांई लिख्या ऐ, कि तुहां ताकतवर हन, कने परमात्मे दा वचन तुहां च बणी रैंह्दा ऐ; कने तुहां तिस सैताने पर जय पाई ऐ।

¹⁵तुहां ना तां संसारे नैं कने ना संसारे दियां चीज्जां नैं प्यार रखा। जे कोई संसारे नैं प्यार रखदा ऐ, तां तिस च पिता परमात्मे दा प्यार नीं ऐ।

¹⁶क्जोकि जेह्ड़ा कुच्छ संसारे च ऐ, मतलब सरीरे दियां इच्छां कने अखीं दियां इच्छां कने कमाईया दा घमंड, सैह़ पिता परमात्मे दे पास्से ते नीं अपर संसारे दे पास्से ते ऐ।

¹⁷संसार कने तिसदियां इच्छां दोयो नास हुंदियां जांदियां हन, अपर जेह्ड़ा परमात्मे दी इच्छा पर चलदा ऐ, सैह़ हमेसा तिस च बणी रैंह्गा।

¹⁸हे बच्चो, एह़ आखरी बग्त ऐ; कने जिंआं तुहां सुणेया ऐ, कि मसीह दा बरोधी ओणे आल़ा ऐ, तिसदे मताबक हुण भी मते मसीह बरोधी उठी खड़ोत्यो हन; इसते अहां जाणदे हन, कि एह़ आखरी बग्त ऐ।

¹⁹मसीह दे बरोधी तां अहां ते ई निकल़ेयो हन, अपर सैह़ अहां दे अपणे नीं थे। क्जोकि जे सैह़ अहां दे अपणे हुंदे, तां अहां सौगी रैंह्दे; अपर इसतांई निकल़ी गै तांजे एह़ पता लग्गी जां कि सैह़ सारे अहां दे अपणे नीं हन।

²⁰अपर तुहां जो तां पवित्र आत्मा यीशु मसीह दे जरिये मिल्लेया ऐ, कने तुहां सब कुच्छ जाणदे हन।

²¹मैं तुहां जो इसतांई नीं लिख्या, कि तुहां सच्चाईया जो नीं जाणदे, अपर इसतांई कि तुहां तिसा जो जाणदे हन, कने इसतांई कि कोई भी झूठ, सच्चाईया दिया तरफा ते नीं।

²²झूठा कुण ऐ? सिर्फ सैह़ जेह्ड़ा यीशुये दे मसीह होणे ते मना करदा ऐ; कने मसीह दा बरोधी सैई ऐ, जेह्ड़ा पिता परमात्मे दा कने पुत्तरे दा मना करदा ऐ।

²³जेह्ड़ा कोई पुत्तरे जो नीं मनदा ऐ, तिस अल्ल पिता परमात्मा भी नीं ऐ; जेह्ड़ा पुत्तरे जो मनदा ऐ, तिस अल्ल पिता परमात्मा भी ऐ।

²⁴कने ध्याने नैं सुणा, जाह़लू तुहां यीशु मसीह पर बसुआस कित्ता, कने तिसा सच्चाईया दा वचन सुरू ते सुणेया ऐ, सैई तुहां च बणी रैंह्; जेह्ड़ा तुहां सुरू ते सुणेया ऐ, जे सैह़ तुहां च बणी रैंह् तां तुहां भी पुत्तरे च कने पिता परमात्मे च बणी रैंह्गे।

²⁵कने जिसदा परमात्मैं अहां नैं वादा कित्या सैई सदा दी ज़िन्दगी ऐ।

²⁶मैं एह़ गल्लां तुहां जो तिन्हां दे बारे च लिखियां हन, जेह्ड़े तुहां जो भटकांदे हन;

²⁷अपर तुहां जो पवित्र आत्मा जेह्ड़ा यीशु मसीह दे जरिये मिल्लेया ऐ, तुहां च बणी रैंह्दा ऐ; कने तुहां जो इसदी जरूरत नीं कि कोई तुहां जो सखां, हलांकि जिंआं तुहां जो पवित्र आत्मा यीशु मसीह दे जरिये मिल्लेया ऐ, तिंआं ई तुहां जो सारियां गल्लां सखांदा ऐ, कने पवित्र आत्मा सच्चा ऐ, कने झूठा नीं; कने जिंआं तिन्हीं तुहां जो सखाया ऐ, तिंआं ई तुहां तिस च बणी रैंह्दे हन।

²⁸इसतांई हे बच्चो, तिस च बणी रेह्आ; कि जाह़लू सैह़ दुवारी ओंगा तां अहां जो हिम्मत मिलगी, कने यीशु मसीह दे ओणे पर तिस सामणै सर्मिंदा ना होन।

²⁹जे तुहां जाणदे हन, कि मसीह धर्मी ऐ, तां एह़ भी जाणदे हन, कि जेह्ड़ा कोई धार्मिकता दे कम्म करदा ऐ, सैह़ परमात्मे दे बच्चे हन।