Read Kangri 1 यूहन्ना 3 Bible Online

1 यूहन्ना 3 - Kangri bible

1 यूहन्ना 3

¹जरा सोचा, कि पिता परमात्मैं अहां नैं कितणा प्यार कित्या ऐ, कि अहां परमात्मे दी औलाद बणन, कने सच्च-बिच्च अहां तिसदे बच्चे हन भी। अपर इस संसार दे लोक एह़ नीं जाणदे कि अहां तिसदे बच्चे हन, क्जोकि तिन्हां परमात्मे जो नीं जाणेया।

²हे मेरे प्यारे साथी बसुआसियो, हुण अहां परमात्मे दी औलाद हन, कने अह्ल्ली तिकर एह़ प्रगट नीं होएया कि अहां क्या कुच्छ हुंगे। बस इतणा जाणदे हन, कि जाह़लू यीशु मसीह प्रगट हुंगा तां तिस साइआं हुंगे, क्जोकि तिसियो तिंआं ई दिक्खगे जिंआं सैह़ ऐ।

³कने जेह्ड़ा कोई मसीह पर एह़ आस रखदा ऐ, सैह़ अपणे आप्पे जो तिंआं ई पवित्र करदा ऐ, जिंआं सैह़ पवित्र ऐ।

⁴जेह्ड़ा कोई लगातार पाप करदा ऐ, सैह़ परमात्मे दिया व्यबस्था दा बरोध करदा ऐ; कने व्यबस्था दा बरोध करणा ई पाप ऐ।

⁵कने तुहां जाणदे हन, कि यीशु मसीह इसतांई आया ऐ, कि पापां जो दूर करैं; कने तिस च कोई पाप नीं ऐ।

⁶जेह्ड़ा कोई तिस च बणी रैंह्दा ऐ, सैह़ लगातार पाप नीं करदा; जेह्ड़ा कोई लगातार पाप करदा ऐ, तिन्हीं ना तां तिसियो दिख्या ऐ, कने ना तिसियो जाणेया ऐ।

⁷हे प्यारे बच्चो, कुसी दे भटकाणे च मत ओआ। जेह्ड़ा धार्मिकता दे कम्म करदा ऐ, सैई मसीह साइआं धर्मी ऐ।

⁸जेह्ड़ा कोई लगातार पाप करदा ऐ, सैह़ सैताने दे पास्से ते ऐ, क्जोकि सैतान सुरू ते ई लगातार पाप करदा आया ऐ। परमात्मे दा पुत्तर इसतांई आया ऐ, कि सैताने दे कम्मां दा नास करैं।

⁹जेह्ड़े कोई भी परमात्मे दे बच्चे हन, सैह़ लगातार पाप नीं करदे; क्जोकि तिसदी ज़िन्दगी तिन्हां च बणी रैंह्दी ऐ, कने सैह़ लगातार पाप करी ई नीं सकदे, क्जोकि सैह़ परमात्मे दे बच्चे हन।

¹⁰इसते परमात्मे दिया औलादी कने सैताने दिया औलादी दा पता चलदा ऐ; जेह्ड़ा कोई धार्मिकता दे कम्म करदा ऐ, कने अपणे भाऊये नैं प्यार रखदा, सैह़ परमात्मे दा बच्चा ऐ।

¹¹जेह्ड़ा समाचार तुहां सुरू ते सुणेया, सैह़ एह़ ऐ कि अहां इक्की दूये नैं प्यार रखन;

¹²कने आदमे दे जागते केने साइआं मत बणा, जिन्हीं सैताने दियां गल्लां जो मन्नेया था, कने जिन्हीं अपणे भाऊये हाबिले जो मारेया था। कने तिसियो कुसा बज़ाह ते मारेया था? इसा बज़ाह ते कि तिसदे कम्म बुरे थे, कने तिसदे भाऊये दे कम्म धार्मिकता दे थे।

¹³हे मेरे प्यारे साथी बसुआसियो, जे संसारे दे लोक तुहां नैं बैर करदे हन, तां हरान मत हुंदे।

¹⁴अहां जाणदे हन, कि अहां सदा दी मौत्ती दे बन्धनां ते छुटी करी अजाद होई नैं सदा दी ज़िन्दगिया च पुज्जे हन। क्जोकि अहां भाऊआं नैं प्यार रखदे हन, जेह्ड़ा प्यार नीं रखदा सैह़ सदा दी मौत्ती दे बन्धनां च रैंह्दा ऐ।

¹⁵जेह्ड़ा कोई अपणे भाऊये नैं बैर रखदा ऐ, सैह़ खूनी ऐ; कने तुहां जाणदे हन कि कुसी भी खूनिये च सदा दी ज़िन्दगी नीं रैंह्दी।

¹⁶अहां प्यार इसते जाणेया, कि यीशु मसीयैं अहां तांई अपणे प्राण देई दित्ते; इसतांई अहां जो भी भाऊआं तांई अपणे प्राण दैणा चाइदे।

¹⁷अपर जिस कुसी अल्ल संसारे दी धन दौलत होयैं कने सैह़ अपणे भाऊये जो कंगाल दिक्खी नैं तिस पर तरस खाणा नीं चां, तां तिस च परमात्मे दा प्यार किंआं बणेया रेई सकदा ऐ?

¹⁸हे मेरे प्यारे बच्चो, अहां वचने ते कने गल्लां-बातां ते ई नीं, अपर कम्मे कने सच्चाईया दे जरिये भी प्यार करन।

¹⁹जाह़लू अहां दूयेयां नैं प्यार करदे हन, तां अहां जाणगे, कि अहां सच्चाईया दे हन, कने परमात्मे दिया नजरा च अहां दे मने जो सांति मिलगी।

²⁰इसतांई जिसा गल्ला च अहां दा मन अहां जो दोस दिंगा, तां जाणदे हन, क्जोकि परमात्मा अहां दे मने ते बड्डा ऐ, कने सब कुच्छ जाणदा ऐ।

²¹हे मेरे प्यारे साथी बसुआसियो, जे अहां दा मन अहां जो दोस ना दैं, तां अहां जो परमात्मे सामणै हिम्मत हुंदी ऐ।

²²कने जेह्ड़ा कुच्छ अहां परमात्मे ते मंगदे हन, सैह़ अहां जो तिसते मिलदा ऐ, क्जोकि अहां तिसदेयां हुक्मां जो मनदे हन, कने जेह्ड़ा तिसियो खरा लगदा ऐ सैई करदे हन।

²³परमात्मे दा हुक्म एह़ ऐ कि अहां तिसदे पुत्तर यीशु मसीह दे नांऐ पर बसुआस करन, कने जिंआं तिन्हीं अहां जो हुक्म दित्या ऐ तिसदे मताबक अप्पु च प्यार रखन।

²⁴कने जेह्ड़ा तिसदे हुक्मां जो मनदा ऐ, सैह़ परमात्मे च कने परमात्मा तिस च बणी रैंह्दा ऐ, कने इसी ते मतलब तिस पवित्र आत्मा ते जेह्ड़ा परमात्मे अहां जो दित्या ऐ, अहां जाणदे हन कि परमात्मा अहां च बणी रैंह्दा ऐ।