Read Kangri 1 यूहन्ना 4 Bible Online

1 यूहन्ना 4 - Kangri bible

1 यूहन्ना 4

¹हे मेरे साथी बसुआसियो, हर इक्की पर बसुआस मत करा, जेह्ड़ा आत्मा च होई करी ग्लाणे दा दावा करदा ऐ कने तिसायो परखा कि सैह़ परमात्मे दे पास्से ते ऐ कि नीं; क्जोकि मते झूठे भविष्यवक्ता संसारे च हन।

²परमात्मे दी पवित्र आत्मा जो तुहां इस तरीके नैं पणछैणी सकदे हन; जेह्ड़ी आत्मा मन्नी लैंदी ऐ, कि यीशु मसीह सरीरे च होई नैं आया ऐ सैह़ परमात्मे दे पास्से ते ऐ,

³कने जेह्ड़ी आत्मा यीशुये जो नीं मनदी, सैह़ परमात्मे दे पास्से ते नीं; कने सैई तां मसीह दे बरोधिये दी आत्मा ऐ, जिसदी चर्चा तुहां सुणी चुकेयो हन, कि सैह़ ओणे आल़ा ऐ; कने हुण भी संसारे च ऐ।

⁴हे मेरे बच्चो, तुहां परमात्मे दे लोक हन, कने तुहां झूठे भविष्यवक्तां पर जय पाई ऐ; क्जोकि पवित्र आत्मा जेह्ड़ा तुहां च ऐ, सैह़ तिस सैताने ते जेह्ड़ा इस संसारे च राज करदा ऐ, म्हान ऐ।

⁵सैह़ झूठे भविष्यवक्ता संसारे दे हन, इसतांई सैह़ संसारे दियां गल्लां ग्लांदे हन, कने इस संसारे दे लोक तिन्हां दी सुणदे हन।

⁶अहां परमात्मे दे हन। जेह्ड़ा परमात्मे जो जाणदा ऐ, सैह़ अहां दी सुणदा ऐ; जेह्ड़ा परमात्मे जो नीं जाणदा सैह़ अहां दी नीं सुणदा। इस तरीके नैं अहां सच्चाई दी आत्मा कने झूठी आत्मा जो परखी लैंदे हन।

⁷हे मेरे प्यारे साथी बसुआसियो, अहां अप्पु च प्यार रखन; क्जोकि प्यार परमात्मे ते ऐ। कने जेह्ड़ा कोई दूयेयां नैं प्यार करदा ऐ, सैह़ परमात्मे दा बच्चा ऐ, कने परमात्मे जो जाणदा ऐ।

⁸जेह्ड़ा दूयेयां नैं प्यार नीं रखदा सैह़ परमात्मे जो नीं जाणदा ऐ, क्जोकि परमात्मा प्यार ऐ।

⁹जेह्ड़ा प्यार परमात्मा अहां नैं रखदा ऐ, सैह़ इसते प्रगट होएया कि परमात्मैं अपणे इकलौते पुत्तरे जो संसारे च घल्लेया ऐ कि अहां तिसदिया बज़ाह ते सदा दी ज़िन्दगी पान।

¹⁰प्यार इस च नीं कि अहां परमात्मे नैं प्यार करदे हन, अपर इस च ऐ कि तिन्हीं अहां नैं प्यार कित्ता कने अहां दे पापां दी माफी तांई अपणे पुत्तरे जो घल्लेया।

¹¹हे मेरे प्यारे साथी बसुआसियो, जाह़लू परमात्मैं अहां नैं देहया प्यार कित्ता, तां अहां जो भी अप्पु च प्यार रखणा चाइदा।

¹²परमात्मे जो कदी कुणी नीं दिख्या; जे अहां अप्पु च प्यार रखन, तां परमात्मा अहां च बणी रैंह्दा ऐ कने तिसदा प्यार अहां च सिद्ध होई गेआ ऐ।

¹³इसी ते अहां जाणदे हन, कि अहां तिस च ज़िन्दगी जींदे हन, कने सैह़ अहां च; क्जोकि तिन्हीं अपणा पवित्र आत्मा अहां जो दित्या ऐ।

¹⁴अहां पुत्तरे जो दिक्खी भी लेआ कने गवाही दिंदे हन कि पिता परमात्मैं पुत्तरे जो संसारे दे लोकां जो पापां ते छुटकारा दैणे तांई घल्लेया ऐ।

¹⁵जेह्ड़ा कोई एह़ मन्नी लैंदा ऐ, कि यीशु परमात्मे दा पुत्तर ऐ, परमात्मा तिस च ज़िन्दगी जींदा ऐ, कने सैह़ परमात्मे च।

¹⁶जेह्ड़ा प्यार परमात्मा अहां नैं रखदा ऐ, तिसियो अहां जाणी गै कने अहां जो तिस पर बसुआस ऐ। परमात्मा प्यार ऐ, कने जेह्ड़ा प्यारे च ज़िन्दगी जींदा ऐ, सैह़ परमात्मे च ज़िन्दगी जींदा ऐ, कने परमात्मा तिस च ज़िन्दगी जींदा ऐ।

¹⁷इसी ते प्यार अहां च सिद्ध होएया, कि अहां जो न्याय दे दिन हिम्मत होयैं। जिंआं यीशु मसीह परमात्मे सौगी इक्क होई करी रेह्आ, तिंआं ई अहां जो भी इस संसारे च परमात्मे सौगी इक्क होई करी रैह़न।

¹⁸प्यारे च डर नीं हुंदा, अपर सिद्ध प्यार डरे जो दूर करी दिंदा ऐ; क्जोकि डरे दा रिस्ता सज़ा नैं हुंदा ऐ, कने जेह्ड़ा डरदा ऐ सैह़ प्यारे च सिद्ध नीं होएया।

¹⁹अहां इसतांई परमात्मे नैं कने इक्की दूये नैं प्यार करदे हन, क्जोकि परमात्मे पैहल्ले अहां नैं प्यार कित्ता।

²⁰जे कोई ग्लां, “मैं परमात्मे नैं प्यार रखदा ऐ,” अपर अपणे बसुआसी भाऊये नैं बैर रखैं; तां सैह़ झूठा ऐ; क्जोकि जेह्ड़ा अपणे बसुआसी भाऊये नैं, जिसियो तिन्हीं दिख्या ऐ, प्यार नीं रखदा, तां सैह़ परमात्मे नैं भी जिसियो तिन्हीं नीं दिख्या प्यार नीं रखी सकदा।

²¹कने परमात्मे ते अहां जो एह़ हुक्म मिल्लेया ऐ, कि जेह्ड़ा कोई परमात्मे नैं प्यार रखदा ऐ सैह़ अपणे बसुआसी भाऊये नैं भी प्यार रखैं।