Read Kangri 1 यूहन्ना 5 Bible Online

1 यूहन्ना 5 - Kangri bible

1 यूहन्ना 5

¹जिस माणु दा एह़ बसुआस ऐ कि यीशु ई मसीह ऐ, सैह़ परमात्मे दा बच्चा ऐ; कने जेह्ड़ा कोई पिता परमात्मे नैं प्यार रखदा ऐ, तां सैह़ दूयेयां नैं भी प्यार रखदा ऐ, जेह्ड़े तिसदे बच्चे हन।

²जाह़लू अहां परमात्मे नैं प्यार रखदे हन, कने तिसदे हुक्मां जो मनदे हन, तां इसी ते अहां जाणदे हन कि अहां परमात्मे दियां औलांदी नैं प्यार रखदे हन।

³परमात्मे नैं प्यार रखणे दा मतलब एह़ ऐ, कि अहां तिसदे हुक्मां जो मनन। कने तिसदे हुक्म औखे नीं हन।

⁴क्जोकि जेह्ड़ा कोई परमात्मे दा बच्चा ऐ, तिन्हीं संसारे पर जीत्त हासल कित्ती ऐ; कने सैह़ जीत्त जेह्ड़ी संसारे जो हराई दिंदी ऐ, सैह़ अहां दा बसुआस ऐ।

⁵संसारे पर जय पाणे आल़ा कुण ऐ? सिर्फ सैह़ जिसदा एह़ बसुआस ऐ, कि यीशु परमात्मे दा पुत्तर ऐ।

⁶एह़ सैई यीशु मसीह ऐ, जिसियो परमात्मैं घल्लेया, जिन्हीं पांणिये ते बपतिस्मा लेआ, कने बादे च जाह़लू सैह़ मरेया ताह़लू तिसदा खून भी बगी गेआ, सैह़ सिर्फ बपतिस्मा लैणे तांई नीं, अपर सूल़िया पर अपणा खून बहाणे तांई भी आया, कने पवित्र आत्मा एह़ गवाही दिंदा ऐ, कि यीशु मसीह परमात्मे दे पास्से ते आया, क्जोकि पवित्र आत्मा हमेसा सच्च ग्लांदा ऐ।

⁷कने गवाही दैणे आल़े त्रै हन;

⁸आत्मा, पाणी, कने खून; कने त्रीनो इक्की गल्ला पर राज्जी हन।

⁹जाह़लू अहां माणुआं दी गवाही मन्नी लैंदे हन, तां परमात्मे दी गवाही तां तिसते बधी नैं ऐ; कने परमात्मे दी गवाही एह़ ऐ, कि तिन्हीं अपणे पुत्तरे दे बारे च गवाही दित्ती ऐ।

¹⁰जेह्ड़ा परमात्मे दे पुत्तरे पर बसुआस करदा ऐ, सैह़ अपणे मने दे अंदर परमात्मे दी गवाही रखदा ऐ। जिन्हीं परमात्मे बसुआस नीं कित्ता, तिन्हीं तिसियो झूठा ठैहराया, क्जोकि तिन्हीं तिसा गवाही पर बसुआस नीं कित्ता, जेह्ड़ी परमात्मैं अपणे पुत्तरे दे बारे च गवाही दित्ती ऐ।

¹¹कने सैह़ गवाही एह़ ऐ, कि परमात्मैं अहां जो सदा दी ज़िन्दगी दित्ती ऐ, कने एह़ परमात्मे दे पुत्तरे दे जरिये ऐ, जिसते अहां जो सदा दी ज़िन्दगी मिलियो ऐ।

¹²जिस अल्ल पुत्तर ऐ, तिस अल्ल सदा दी ज़िन्दगी ऐ; कने जिस अल्ल परमात्मे दा पुत्तर नीं, तिस अल्ल सदा दी ज़िन्दगी भी नीं ऐ।

¹³मैं तुहां जो जेह्ड़े परमात्मे दे पुत्तरे दे नांऐ पर बसुआस करदे हन, इसतांई लिख्या ऐ कि तुहां जाणन कि सदा दी ज़िन्दगी तुहां दी ऐ।

¹⁴कने अहां जो परमात्मे सामणै जेह्ड़ी हिम्मत हुंदी ऐ, सैह़ एह़ ऐ; कि जे अहां तिसदिया इच्छा मताबक कुच्छ मंगदे हन, तां सैह़ अहां दी सुणदा ऐ।

¹⁵जाह़लू अहां जाणदे हन, कि जेह्ड़ा कुच्छ अहां परमात्मे ते मंगदे हन सैह़ अहां दी सुणदा ऐ, तां एह़ भी जाणदे हन, कि जेह्ड़ा कुच्छ अहां परमात्मे ते मंगदे हन, सैह़ अहां जो मिलदा भी ऐ।

¹⁶जे कोई अपणे बसुआसी भाऊये जो ऐदेया पाप करदे दिक्खन, जिसदा नतीजा मौत्त ना होयैं, तां विणती करैं, कने परमात्मे तिसियो तिन्हां तांई, जिन्हां ऐदेया पाप कित्ता ऐ जिसदा नतीजा मौत्त ना होयैं, ज़िन्दगी दिंगा। पाप देहया भी हुंदा ऐ जिसदा नतीजा मौत्त ऐ; इसदे बारे च मैं विणती करणे तांई नीं ग्लांदा।

¹⁷हर तरीके दे बुरे कम्म तां पाप हन, अपर ऐदेय पाप भी हन, जिन्हां दा नतीजा मौत्त नीं।

¹⁸अहां जाणदे हन, कि जेह्ड़ा कोई परमात्मे दा बच्चा ऐ, सैह़ लगातार पाप नीं करदा; अपर जेह्ड़े परमात्मे दे पुत्तर यीशु मसीह दे बच्चे हन, तिन्हां जो सैह़ बचाई रखदा ऐ, कने सैह़ सैतान तिन्हां जो छुई नीं पांदा।

¹⁹अहां जाणदे हन, कि अहां परमात्मे दे बच्चे हन, कने सारा संसार तिस सैताने दे बसे च पेआ ऐ।

²⁰अहां एह़ भी जाणदे हन, कि परमात्मे दा पुत्तर यीशु मसीह इस संसारे च आई गेआ ऐ कने तिन्हीं अहां जो समझ दित्तियो ऐ, कि अहां तिस सच्चे परमात्मे जो पणछैणन; कने अहां तिस च जेह्ड़ा सच्च ऐ, मतलब तिसदे पुत्तर यीशु मसीह च रैंह्दे हन। सच्चा परमात्मा कने सदा दी ज़िन्दगी ऐई ऐ।

²¹हे मेरे बच्चो, अपणे आप्पे जो मूर्तियां ते बचाई करी रखा।