Read Kangri 3 यूहन्ना 1 Bible Online

3 यूहन्ना 1 - Kangri bible

3 यूहन्ना 1

¹मैं यूहन्ना जेह्ड़ा कलीसिया दा अगुआ ऐ, मैं एह़ चिठ्ठी गयुसे दे नांऐ पर लिखा दा ऐ, जिस नैं मैं सच्ची च प्यार रखदा ऐ।

²हे मेरे प्यारे बसुआसी भाऊ, मैं एह़ प्रार्थना करदा ऐ, कि जिंआं तू आत्मिक तरक्की करदा ऐ। तिंआं ई तू सारियां गल्लां च तरक्की करैं, कने भला चंगा रैंह्।

³क्जोकि जाह़लू बसुआसी भाऊआं आई नैं, तेरे तिस सच्च दी गवाही दित्ती, जिसा पर तू सच्च-बिच्च चलदा ऐ, तां मैं बड़ा ई खुस होएया।

⁴मिन्जो इसते बधी नैं होर कोई खुसी नीं, कि जिसियो मैं सुणैं, कि सैह़ सारे जेह्ड़े मेरे बाल-बच्चेयां साइआं हन सच्चाई पर चलदे हन।

⁵हे मेरे प्यारे बसुआसी भाऊ, जेह्ड़ा कुच्छ तू तिन्हां बसुआसी भाऊआं सौगी भले कम्म करदा ऐ, कने जेह्ड़े अजनबी हन, तिन्हां सौगी भी बसुआसी होई नैं तिंआं ई कर।

⁶तिन्हां अजनबियां कलीसिया दे सामणै तेरे प्यारे दी गवाही दित्तियो थी। जे तू तिन्हां जो इस तरीके नैं विदा करगा जेह्ड़ा तरीका परमात्मे दे लोकां तांई ठीक ऐ तां खरा करगा।

⁷क्जोकि सैह़ मसीह दे कम्मे तांई निकल़ेयो हन, कने होरनी जातिआं दे लोकां ते कोई भी मदत नीं लैंदे।

⁸इसतांई ऐदेयां दा सुआगत करणा चाइदा, जिसते अहां भी तिन्हां दे साझी होई जान, जेह्ड़े सच्चाईया पर कम्म करदे हन।

⁹मैं कलीसिया जो इसदे बारे च इक्क चिठ्ठी लिखियो थी, अपर दियुत्रिफेस जेह्ड़ा तिन्हां च बड्डा बणना चांह़दा ऐ, अहां जो नीं अपनांदा।

¹⁰इसतांई जाह़लू मैं ओंगा, तां तिसदे कम्मां दी जेह्ड़ा सैह़ करा दा ऐ, याद करांगा, कि सैह़ अहां दे बारे च बुरिआं-बुरिआं गल्लां बकदा ऐ। कने इस पर भी तसल्ली नीं करी नैं अप्पु ई बसुआसी भाऊआं जो नीं अपनांदा। कने जेह्ड़े बसुआसी भाऊ बाहरे ते ओंदे हन, तिन्हां जो कलीसिया दे लोक अपनाणा चांह़दे हन, अपर सैह़ मना करदा ऐ कने कलीसिया ते कड्डी दिंदा ऐ।

¹¹हे मेरे प्यारे बसुआसी भाऊ, बुराईया दे नीं अपर भलाईया दे पचांह़ चल। जेह्ड़े भलाई करदे हन, सैह़ परमात्मे दे पास्से ते हन। अपर जेह्ड़ा बुराई करदा ऐ, तिन्हीं परमात्मे जो नीं दिख्या।

¹²दिमेत्रियुसे दे बारे च सारेयां, अपर सच्चाईया भी अप्पु ई गवाही दित्ती। कने अहां भी गवाही दिंदे हन, कने तू जाणदा ऐ कि अहां दी गवाही सच्ची ऐ।

¹³मिन्जो तिज्जो तांई बड़ा कुच्छ लिखणा तां था, अपर स्याईया कने कलमा नैं नीं लिखणा चांह़दा।

¹⁴अपर मिन्जो आस ऐ कि तिज्जो नैं तौल़ी मिलगा, ताह़लू अहां आमणै-सामणै गल्लबात करगे।

¹⁵तिज्जो सांति मिलदी रैंह्। ऐत्थु दे साथी तिज्जो नमस्कार ग्लांदे हन। औत्थू दे साथियां दे नां लेई-लेई नैं भी नमस्कार ग्लाई देआं।