Read Kangri प्रकाशितवाक्य 1 Bible Online

प्रकाशितवाक्य 1 - Kangri bible

प्रकाशितवाक्य 1

¹एह़ कताब तिन्हां गल्लां दे बारे च दस्सदी ऐ, जेह्ड़ियां परमात्मैं यीशु मसीह जो दस्सियां, तांजे सैह़ इन्हां गल्लां जो अपणेयां दासां जो दस्सी सकैं, जिन्हां दा बड़ी तौल़ी होणा जरूरी ऐ: कने यीशुयैं एह़ संदेस अपणे सुअर्गदूते जो घल्ली करी तिसदे जरिये अपणे दास यूहन्ने जो दस्सेया,

²इसतांई मैं यूहन्ने जेह्ड़ा कुच्छ दिख्या था, सैह़ सब कुच्छ लिखी दित्ता, मैं इसा कताबा च परमात्मे दा वचन कने सच्चियां गल्लां जेह्ड़ियां यीशु मसीयैं मिन्जो पर प्रगट कित्तियां, सैह़ मैं लिखी दित्तियां।

³धन ऐ सैह़ जेह्ड़ा इसा भविष्यवाणिया दे वचने जो पढ़दा ऐ, कने सैह़ जेह्ड़े सुणदे हन कने इस च लिखियां गल्लां जो मनदे हन। क्जोकि एह़ गल्लां तौल़ी होणे आल़िआं हन।

⁴एह़ चिठ्ठी यूहन्ने दे पास्से ते तिन्हां सत्तां कलीसियां दे नांऐ पर ऐ जेह्ड़ियां आसिया प्रदेसे च हन। मैं प्रार्थना करदा ऐ, कि तुहां जो परमात्मे दे पास्से ते अनुग्रह कने सांति मिल्लैं, कने सैह़ परमात्मा जेह्ड़ा ऐ कने जेह्ड़ा हमेसा था कने जेह्ड़ा ओणे आल़ा ऐ; कने तिन्हां सत आत्मां[1] दे पास्से ते, जेह्ड़ियां परमात्मे दे सिंहासणे दे सामणै हन,

⁵कने यीशु मसीह दे पास्से ते जेह्ड़ा बसुआसे जोग्गा गवाह कने मरेयां ते जिन्दा होणे आल़ेआं च जेठा कने धरतिया दे राजेयां दा हाकम ऐ, तुहां जो अनुग्रह कने सांति मिलदी रैंह्। जेह्ड़ा अहां नैं प्यार रखदा ऐ, कने तिन्हीं अपणे खूने दे जरिये अहां जो पापां ते छड्डाया ऐ।

⁶कने अहां जो इक्क राज्ज कने अपणे पिता परमात्मे तांई याजक भी बणाई दित्या; तिसदी महिमा कने राज्ज जुगा-जुग रैंह्। आमीन।

⁷दिक्खा, सैह़ बदल़ां सौगी ओणे आल़ा ऐ, कने हर कोई तिसियो दिक्खगा, अपर जिन्हां तिसियो सूल़िया पर मारेया था सैह़ भी तिसियो दिक्खगे, कने धरतिया दे सारे लोक तिसदिया बज़ाह ते जोरे नैं रोंगे। हाँ, एह़ जरूर हुंगा! आमीन।

⁸प्रभु परमात्मा, जेह्ड़ा ऐ कने जेह्ड़ा हमेसा ते था कने जेह्ड़ा ओणे आल़ा ऐ, जेह्ड़ा सर्वशक्तिमान ऐ, एह़ ग्लांदा ऐ, “मैंई अलफा कने ओमेगा ऐ।” जिसदा मतलब सुरुआत कने अन्त ऐ।

⁹मैं यूहन्ना, जेह्ड़ा तुहां दा बसुआसी भाऊ कने यीशुये दे दुख, राज्ज, कने सबरे च तुहां दा साझी ऐ, परमात्मे दे वचन, कने यीशुये दिया गवाही दिया बज़ाह ते मैं पतमुस[2] नांऐ दे टापू च था।

¹⁰मैं प्रभु दी अराधना दे दिन पवित्र आत्मा च भरोई गेआ, कने मैं अपणे पचांह़ तुरही दी बड़ी जोरे दी उआज़ एह़ ग्लांदे सुणी,

¹¹“जेह्ड़ा कुच्छ तू दिक्खदा ऐ तिसियो कताबा च लिखी करी सत्तां कलीसियां जो घल्ली दे, मतलब इफिसुस, स्मुरना, पिरगमुन, थुआतीरा, सरदीस, फिलदिलफिया कने लौदीकिया सैहरे जो।”

¹²ताह़लू मैं तिसियो, जेह्ड़ा मिन्जो नैं ग्ला दा था, दिक्खणे तांई पचांह़ मुड़ेया; कने मैं पचांह़ मुड़ी नैं सोन्ने दे सत दीपदान[3] दिक्खे,

¹³कने तिन्हां दीपदानां दे गब्बैं माणुये दे पुत्तरे साइआं इक्की मर्दे जो दिख्या, जिन्हीं पैरां तिकर चोल़ा पैहनेया कने छातिया पर सोन्ने दा पटका बन्नेया था।

¹⁴तिसदा सिर कने बाल़ चिट्टी ऊना कने वर्फा साइआं चमका दे थे, कने तिसदियां अखीं अग्गी दियां लपटा साइआं थियां।

¹⁵तिसदे पैर भट्ठिया च तपाईया पीतली साइआं चमका दे थे, कने तिसदी उआज़ पांणिये दे बड्डे झरने साइआं थी।

¹⁶तिन्हीं अपणे सज्जे हत्थे च सत तारे लियो थे, कने तिसदे मुँऐ ते पेनी दूँ धारां आल़ी तलवार निकल़ादी थी। तिसदा मुँ इतणा चमकदार था, ठीक तिंआं जिंआं सूरज खड़िया दोपैरा चमकदा ऐ।

¹⁷जाह़लू मैं तिसियो दिख्या तां तिसदे पैरां पर इआं पेई गेआ, मन्ना जिंआं इक्क मुड़दा हुंदा ऐ। अपर तिन्हीं मिन्जो पर अपणा सज्जा हत्थ रखी करी ग्लाया, “मत डर; मैं पैहल्ला कने आखरी ऐ,

¹⁸कने मैं सैह़ ऐ जेह्ड़ा हमेसा जिन्दा ऐ, इक्क बग्त था जाह़लू मैं मरी गेआ था, अपर हुण मैं जिन्दा ऐ कने हमेसा जिन्दा रैंह्गा; कने मौत्त कने अधोलोक दी चाबियां मिन्जो अल्ल ई हन।

¹⁹इसतांई जेह्ड़ियां गल्लां तैं दिक्खियां हन कने जेह्ड़ियां गल्लां होआ दियां हन कने जेह्ड़ियां गल्लां इसते बाद होणे आल़िआं हन, तिन्हां सारियां जो लिखी लै।

²⁰जेह्ड़े सत तारे तैं मेरे सज्जे हत्थे च दिक्खे, सैह़ तारे सत्तां कलीसियां दे सुअर्गदूत हन, कने सैह़ सत सोन्ने दे दीपदान सत कलीसियां हन।”