Read Kangri प्रकाशितवाक्य 10 Bible Online

प्रकाशितवाक्य 10 - Kangri bible

प्रकाशितवाक्य 10

¹भिरी मैं इक्क होर ताकतवर सुअर्गदूते जो सुअर्गे ते लौंदे दिख्या, जिसियो बदल़ां चौंन्नी पास्सेयां ते घेरेया था। तिसदे सिरे दे चौंन्नी पास्से सतरंगी धनुष था। तिसदा मुँ सूरजे साइआं चमकीला कने तिसदे पैर अग्गी दे खम्भे साइआं थे।

²तिसदे हत्थे च इक्क छोटी देहई कताब थी, जेह्ड़ी खुलियो थी। तिन्हीं अपणा सज्जा पैर समुंदरे पर कने खब्बा धरतिया पर रखेया,

³कने सैह़ शेरे साइआं बड़े जोरे नैं डड्डेया, कने जाह़लू सैह़ डड्डेया तां गड़ाकेयां दियां सत उआज़ां सुम्मियां।

⁴जाह़लू गड़ाकेयां दियां सत उआज़ां सुम्मियां, तां जेह्ड़ा मैं सुणेया, तिसियो लिखणे तांई त्यार था, अपर मैं सुअर्गे ते एह़ उआज़ सुणी, “जेह्ड़ियां गल्लां तैं गड़ाकेयां दियां तिन्हां सत्तां उआज़ां ते सुणियां हन, तिन्हां जो गुप्त रख, कने मत लिख।”

⁵जिस सुअर्गदूते जो मैं समुंदरे कने धरतिया पर खड़ोत्या दिख्या था, तिन्हीं अपणा खब्बा हत्थ सुअर्गे पास्से चुकेया,

⁶कने जेह्ड़ा जुगा-जुग तिकर जिन्दा ऐ, कने जिन्हीं सुअर्ग, धरती कने समुंदरे जो कने सब कुच्छ जेह्ड़ा इन्हां च ऐ बणाया, तिसदी कसम खाई करी ग्लाया, कि “हुण जादा देर नीं हुंगी।”

⁷तिस बग्त जाह़लू सतमा सुअर्गदूत तुरही बजांगा, परमात्मा अपणियां गुप्त योजनां जो पूरी करगा, जिस सुसमाचारे दे बारे च तिन्हीं अपणे दासां भविष्यवक्तां जो दस्सेया था।

⁸जिस ग्लाणे आल़े दिया उआज़ा जो मैं सुअर्गे ते ग्लांदे सुणेया था, सैह़ भिरी मिन्जो सौगी गल्लां करणा लग्गा, “जा, जेह्ड़ा सुअर्गदूत समुंदरे कने धरतिया पर खड़ोत्या ऐ, तिसदे हत्थे ते खुलियो कताबा जो लेई लै।”

⁹मैं सुअर्गदूते अल्ल जाई करी ग्लाया, “एह़ छोटी कताब मिन्जो देई दे।” तिन्हीं मिन्जो ग्लाया, “लेई लै, कने इसायो खाई लै; एह़ तेरे पेटे जो कोड़ा तां करगी, अपर तेरे मुँऐ च मखीरे साइआं मिठ्ठी लगगी।”

¹⁰ताह़लू मैं तिसा छोटिया कताबा जो तिस सुअर्गदूते दे हत्थे ते लेई करी खाई गेआ। सैह़ मेरे मुँऐ च मखीरे साइआं मिठ्ठी तां लग्गी, अपर जाह़लू मैं तिसायो खाई गेआ, तां मेरा पेट कोड़ा होई गेआ।

¹¹ताह़लू मिन्जो नैं एह़ ग्लाया गेआ, एह़ जरूरी ऐ कि “तू दुवारी हर देसे दे लोकां, जातिआं, भासां कने राजेयां दे बारे च भविष्यवाणी कर।”