Read Kangri प्रकाशितवाक्य 11 Bible Online

प्रकाशितवाक्य 11 - Kangri bible

प्रकाशितवाक्य 11

¹भिरी मिन्जो नापणे तांई इक्क कनेड़े दी सोठी[8] दित्ती, कने तिन्हीं मिन्जो नैं ग्लाया, “उठ,” परमात्मे दे मंदरे कने वेदिया नापी लै, कने तिस च अराधना करणे आल़ेआं दी गिणती करी लै।

²अपर मंदरे दे बाहरे आल़े अँगणे जो छड्डी दे; तिसियो मत नाप क्जोकि सैह़ तिन्हां जो दित्या ऐ, जेह्ड़े मिन्जो पर बसुआस नीं करदे; कने सैह़ पवित्र सैहर यरूशलेमे जो बत्ताल़ी मीहने तिकर नास करगे।

³तिस बग्त मैं अपणे दूँ गवाहां जो एह़ हक्क दिंगा कि दरिया उढी करी इक्क हज़ार दो सौ सठ दिन तिकर भविष्यवाणी करन।

⁴एह़ दोयो गवाह जैतूने दे दो रूख कने दो दीपदान हन, जेह्ड़े धरतिया पर प्रभु दे सामणै खड़ोई रैंह्दे हन।

⁵जे कोई तिन्हां जो नकसान पजाणा चांह़दा ऐ, तां तिन्हां दे मुँऐ ते अग्ग निकल़ी करी तिन्हां दे बैरियां जो भस्म करदी ऐ; कने जे कोई तिन्हां जो नकसान पजाणा चांह़गा, तां जरूर इसी तरीके नैं मारी दित्ता जांगा।

⁶तिन्हां जो एह़ हक्क ऐ कि अम्बरे जो बंद करन, कि तिन्हां दी भविष्यवाणी दे दिनां च बरखा ना होयैं; कने तिन्हां जो सारे पांणिये पर हक्क ऐ कि तिसियो खून बणान, कने जाह़लू-जाह़लू चान ताह़लू-ताह़लू धरतिया पर हर किस्मां दे खतरे लेयोन।

⁷जाह़लू सैह़ अपणी गवाही देई बैंगे, तां सैह़ जंगली जानवर जेह्ड़ा अथाह कुंडे[9] ते बाहर निकल़गा, तिन्हां नैं लड़ाई करी नैं तिन्हां जो जीत्ती लैंगा कने तिन्हां जो मारी दिंगा।

⁸तिन्हां दियां लाह्सां तिस बड्डे सैहरे दे चौके च पेई रैंगियां, जेह्ड़े आत्मिक रूप ते सदोम कने मिस्र सैहरे साइआं ऐ, जित्थु तिन्हां दा प्रभु भी सूल़िया पर चढ़ाया था।

⁹कने हर देस, गोत्र, भासा कने जाति दे लोक तिन्हां दियां लाह्सां जो साढे तीन दिन तिकर दिक्खदे रैंह्गे, कने तिन्हां दियां लाह्सां जो कब्रा च रखणा नीं दिंगे।

¹⁰संसारे दे लोक तिन्हां दे मरने ते खुसिया करी नैं मग्न हुंगे, कने इक्की दूये जो भेंट घल्लगे, क्जोकि इन्हां दून्नी भविष्यवक्तां संसारे दे लोकां जो सताया था।

¹¹अपर साढे तीनां दिनां बाद परमात्मे अपणा साह तिन्हां च पाया, कने सैह़ भिरी जिन्दे होई करी अपणे पैरां दे भार खड़ोई गै कने तिन्हां जो दिक्खणे आल़े सारे बड़े भरी डरी गै।

¹²इसते बाद तिन्हां जो सुअर्गे ते इक्क जोरे दी उआज़ सुम्मी, “ऐत्थु ऊपरेयो ओआ।” कने सैह़ अपणे बैरियां दे दिक्खदे-दिक्खदे बदल़ां ते सुअर्गे जो चढ़िये।

¹³भिरी तिस बग्त इक्क बड्डा हिल्लण होएया, कने सैहरे दियां कोठियां दा दसमां हिस्सा पेई गेआ; कने तिस हिल्लणे नैं सत हज़ार माणु मरिये, कने बाक्कि डरी गै कने सुअर्गे दे परमात्मे दी महिमा कित्ती।

¹⁴दूआ खतरा बीती चुकेया, दिक्खा त्रीआ खतरा तौल़ी ओणे आल़ा ऐ।

¹⁵जाह़लू सतमे सुअर्गदूतैं तुरही बजाई, तां सुअर्गे ते इस बारे च जोरे-जोरे दियां उआज़ां होणा लग्गियां: “संसारे दा राज्ज अहां दे प्रभु कने तिसदे मसीह दा होईया, कने सैई जुगा-जुग राज्ज करगा।”

¹⁶ताह़लू चौबी स्याणे जेह्ड़े परमात्मे सामणै अपणे-अपणे सिंहासणे पर बैठेयो थे, गोड्डेयां दे भार पेई करी परमात्मे जो प्रणांम करी नैं

¹⁷एह़ ग्लाणा लग्गे, “हे सर्वशक्तिमान प्रभु परमात्मा, जेह्ड़ा ऐ कने जेह्ड़ा हमेसा था, अहां तेरा धन्यावाद करदे हन कि तू अपणी बड्डी समर्था जो कम्मे च अंणी करी राज कित्ता ऐ।

¹⁸जेह्ड़े लोक तिज्जो पर बसुआस नीं करदे तिन्हां बड़ा गुस्सा कित्ता, कने हुण तिन्हां पर गुस्सा करणे दा बग्त आई रेह्आ ऐ, कने सैह़ बग्त भी आई रेह्आ ऐ कि मरेयां दा न्याय कित्ता जां, हुण एह़ भी बग्त ऐ कि तेरे दास भविष्यवक्तां कने पवित्र लोकां जो कने तिन्हां छोटे-बड्डेयां जो जेह्ड़े तेरे नांऐ ते डरदे हन बदला दित्ता जां, कने धरतिया दे बिगाड़णे आल़े नास कित्ते जान।”

¹⁹कने परमात्मे दा जेह्ड़ा मंदर सुअर्गे च ऐ सैह़ खोलेया गेआ, कने तिसदे मंदरे च तिसदे वादे दा सन्दूक दुस्सेया; कने तिसी बग्त बिजलियां, उआज़, गड़ाके कने हिल्लण होये कने अम्बरे ते बड्डा सणाट पेआ।