Read Kangri प्रकाशितवाक्य 12 Bible Online

प्रकाशितवाक्य 12 - Kangri bible

प्रकाशितवाक्य 12

¹भिरी ताह़लू सुअर्गे च इक्क बड़ा अनोखा नसाण दुस्सेया, मतलब इक्की जणासा जिन्नै सूरज उढेया था, कने चन्द्रमा तिसादे पैरां थल्लैं था, कने तिसादे सिरे पर बारांह तारेयां दा मुकट था;

²कने सैह़ गर्भवती होई, कने डड्डदी थी, क्जोकि तिसा जो प्रसूता होणे दी दर्द सुरू होई गियो थी,

³तिसी बग्त अम्बरे च इक्क होर अनोखा नसाण दिख्या; तित्थु इक्क बड्डा लाल अजगर था, जिसदे सत सिर कने दस सींग थे, कने तिसदे सत्तां सिरां पर राजेयां दे मुकट थे।

⁴तिसदी पूंछा अम्बरे दे तारेयां दा त्रीआ हिस्से जो खींजी करी धरतिया पर सट्टी दित्ता। सैह़ अजगर तिसा जणासा सामणै जेह्ड़ी गर्भवती थी, खड़ोई गेआ कि जाह़लू सैह़ बच्चा जम्मगी तां तिसादे बच्चे जो निगल़ी जां।

⁵कने तिन्नै जागत जम्मेया जेह्ड़ा लोहे दा बैंत लेई करी सारियां जातिआं पर राज्ज करणे पर था, कने सैह़ जागत तिसी बग्त परमात्मे अल्ल कने तिसदे सिंहासणे अल्ल चुक्की करी पज्जाई दित्ता;

⁶कने सैह़ जणांस सुनसाण जगाह जो नठ्ठी गेई जित्थु परमात्मे दे पास्से ते तिसा तांई इक्क जगाह त्यार कित्तियो थी कि औत्थू सैह़ इक्क हज़ार दो सौ सठ दिनां तिकर तिसा दी देखभाल कने पालण-पोसण कित्ता जां।

⁷भिरी सुअर्गे च लड़ाई होई, मीकाईल[10] कने तिसदे सुअर्गदूत अजगरे नैं लड़णा गै; कने अजगर कने तिसदे दूत लड़ी पै,

⁸अपर सैह़ जीत्ती नीं सके, कने सुअर्गे च तिन्हां तांई भिरी जगाह नीं रेई।

⁹ताह़लू सैह़ बड्डा अजगर, कने सैई पराणा सर्प जेह्ड़ा इबलीस कने सैतान ऐ कने सारे संसारे जो भरमाणे आल़ा ऐ, धरतिया पर सट्टी दित्ता, कने तिसदे दूत तिस सौगी सट्टी दित्ते,

¹⁰भिरी मैं सुअर्गे च एह़ जोरे दी उआज़ सुणी, “हुण अहां दे परमात्मे दा उद्धार, सामर्थ, राज्ज कने तिसदे मसीह दा हक्क प्रगट होएया ऐ, क्जोकि अहां दे भाऊआं पर दोस लगाणे आल़ा, जेह्ड़ा रात दिन अहां दे परमात्मे सामणै तिन्हां पर दोस लगा करदा था, सट्टी दित्ता।

¹¹“सैह़ मेम्ने दे खूने दिया बज़ाह कने अपणिया गवाहिया दे वचनां दिया बज़ाह ते तिस पर जीत्त हासल कित्ती, क्जोकि तिन्हां अपणे प्राणा जो प्यारा नीं समझेया, ऐत्थु तिकर कि मौत्त भी झेली लेई।

¹²इसा बज़ाह ते हे सुअर्गो कने तिन्हां च रैहणे आल़ेयो मग्न होएया; हे धरती, कने समुंदर तुहां पर हाय। क्जोकि सैतान बड़े गुस्से सौगी तुहां अल्ल लौई आया ऐ, क्जोकि सैह़ जाणदा ऐ कि तिसदा बग्त बड़ा थोड़ा ऐ।”

¹³जाह़लू अजगरैं दिख्या कि मिन्जो धरतिया पर सट्टी दित्या, तां तिसा जणासा जो जिन्नै जागत जम्मेया था, तिसायो सताणा लग्गा।

¹⁴अपर तिसा जणासा जो बड्डे उकाबे दे दो पंख दित्ते गै, कि अजगरे दे सामणै ते उढ़ी करी सुनसाण जगाह च पुज्जी जां, जित्थु तिसा दी इक्क बग्त कने बग्तां कने अधे बग्ते तिकर देखभाल कने पालण-पोसण कित्ता जां।

¹⁵ताह़लू अजगरैं तिसा जणासा दे पचांह़ अपणे मुँऐ ते नदिया साइआं पाणी बहाया कि तिसायो एह़ नदी रढ़ाई करी लेई गेई।

¹⁶अपर धरतिया तिसा जणासा दी मदत कित्ती, कने अपणा मुँ खोली करी तिसा नदिया जो जेह्ड़ी अजगरैं अपणे मुँऐ ते बहाईयो थी पी लेआ।

¹⁷ताह़लू अजगर जणासा पर गुस्सा होएया, कने तिसा दी बाक्कि औलादी नैं, जेह्ड़ी परमात्मे दे हुक्मां जो मनदे कने यीशु दी गवाही दैणे पर मजबूत हन, लड़णा गेआ,

¹⁸कने सैह़ समुंदरे दे कनारे पर जाई खड़ोता।