Read Kangri प्रकाशितवाक्य 13 Bible Online

प्रकाशितवाक्य 13 - Kangri bible

प्रकाशितवाक्य 13

¹ताह़लू मैं इक्की जंगली जानवरे जो समुंदरे ते निकल़दे दिख्या, जिसदे दस सींग कने सत सिर थे। तिसदे सींगा पर दस मुकट कने तिसदे हर सिरे पर परमात्मे दिया निंदा दे सब्द लिख्यो थे।

²जेह्ड़ा जंगली जानवर मैं दिख्या सैह़ चीते साइआं था; कने तिसदे पैर भालूये साइआं, कने मुँ शेरे साइआं था। तिन्हीं अजगरैं अपणी सामर्थ कने अपणा सिंहासण, कने बड्डा हक्क, तिसियो देई दित्ता।

³मैं तिसदे सत्तां सिरां ते इक्की पर देहया बड्डा जख्म दिख्या जिंआं कि सैह़ मरने दिया हालता च ऐ, भिरी तिसदा जान्नलेवा जख्म खरा होईया, कने सारे संसारे दे लोक हरान होई करी तिस जंगली जानवरे पचांह़-पचांह़ चल्ले।

⁴कने तिन्हां लोकां अजगरे दी पूजा कित्ती, क्जोकि तिन्हीं तिस जंगली जानवरे जो अपणा हक्क देई दित्या था, कने एह़ ग्लाई करी जंगली जानवरे दी अराधना कित्ती, “इस जंगली जानवरे साइआं कुण ऐ? कुण इस नैं लड़ी सकदा ऐ?”

⁵बड़ियां-बड़ियां गल्लां कने निंदा करणे तांई तिसियो इक्क मुँ दित्ता, कने तिसियो बत्ताल़ी मीहने तिकर कम्म करणे दा हक्क दित्ता।

⁶तिन्हीं परमात्मे दी निंदा करणे तांई मुँ खोलेया कि तिसदे नां कने तिसदे तम्बू मतलब सुअर्गे दे रैहणे आल़ेआं दी निंदा करैं।

⁷तिसियो एह़ भी हक्क दित्ता कि परमात्मे दे लोकां सौगी लड़ें कने तिन्हां जो जीत्ती सकैं, कने तिसियो हर इक्क गोत्र, हर लोकां, भासा कने जाति पर हक्क दित्ता।

⁸संसारे दे लोक तिस जंगली जानवरे दी पूजा करगे। सैह़ सारे लोक जिन्हां दे नां सृष्टिया दे सुरू होणे ते ई तिस मेम्ने दिया ज़िन्दगिया दिया कताबा च लिखे नीं गै, जिसदा बलिदान कित्या था।

⁹जेह्ड़े मेरे संदेसे जो समझणा चांह़दे हन, तिसियो ध्याने नैं सुणन।

¹⁰जिसदे हिस्से च कैद लिखियो ऐ, सैह़ जेला च जांगा; जेह्ड़ा तलवारा नैं मारगा, जरूरी ऐ कि सैह़ तलवारा नैं मारेया जांगा। परमात्मे दे लोकां दा सबर कने बसुआस इसी च ऐ।

¹¹भिरी मैं इक्क होर जंगली जानवरे जो धरतिया ते निकल़दे दिख्या, तिसदे दो सींग मेम्ने साइआं थे, कने सैह़ अजगरे साइआं ग्लांदा था।

¹²एह़ जंगली जानवर पैहल्ले जंगली जानवरे दे सारे हक्कां दा इस्तेमाल करदा था; कने धरती कने तिसा पर रैहणे आल़े लोकां ते तिस पैहल्ले जंगली जानवरे दी, जिसदा जान्नलेवा जख्म खरा होईया था, अराधना करांदा था।

¹³सैह़ बड़े अनोखे कम्म दस्सदा था, ऐत्थु तिकर कि लोकां सामणै अम्बरे ते धरतिया पर अग्ग बरसाई दिंदा था।

¹⁴तिन्हां अनोखे कम्मां दिया बज़ाह ते, जिन्हां जो तिस पैहल्ले जंगली जानवरे सामणै दस्सणे दा हक्क तिसियो दित्या था, सैह़ संसारे दे लोकां जो इआं भरमांदा था कने तिन्हां जो ग्लांदा था कि जिस जंगली जानवरे पर तलवारा नैं हमला कित्या था, सैह़ जिन्दा होईया, तिसदी मूर्ति बणा।

¹⁵तिसियो तिस पैहल्ले जंगली जानवरे दिया मूर्तिया जो जिन्दा करणे दा हक्क दित्ता कि मूर्ति ग्लाणा लग्गे, कने जितणे लोक तिस पैहल्ले जंगली जानवरे दिया मूर्ति दी अराधना नीं करन, तिन्हां जो मरवाई दैं।

¹⁶तिन्हीं छोटे-बड्डे, अमीर-गरीब, अजाद -दास सबना दे सज्जे हत्थे या तिन्हां दे मत्थे पर इक्क-इक्क मोहर लगवाई दित्ती,

¹⁷कि तिसियो छड्डी जिस पर मोहर मतलब तिस पैहल्ले जंगली जानवरे दा नां या तिसदे नांऐ दी संख्या होयैं, कने होर कोई लैण-दैण नीं करी सकैं।

¹⁸ज्ञान इसी च ऐ: जिस अल्ल अक्ल होयैं, सैह़ इस पैहल्ले जंगली जानवरे दिया संख्या जो जोड़ी लै, क्जोकि सैह़ माणुये दी संख्या ऐ, कने तिसदी संख्या छे सौ छियाट ऐ।