Read Kangri प्रकाशितवाक्य 14 Bible Online

प्रकाशितवाक्य 14 - Kangri bible

प्रकाशितवाक्य 14

¹तिसते बाद मैं भिरी दिख्या, सैह़ मेम्ना सिय्योन प्हाड़े पर खड़ोत्या ऐ, कने तिस सौगी इक्क लख चौत्ताल़ी हज़ार लोक हन, जिन्हां दे मत्थे पर तिसदा कने तिसदे पिते दा नां लिख्या ऐ।

²कने सुअर्गे ते मिन्जो इक्क उआज़ सुम्मी, जेह्ड़ी पांणिये दियां मतिआं लैहरां कने बड़े गड़ाकेयां साइआं थी, कने जेह्ड़ी उआज़ मैं सुणी, सैह़ ऐदई थी मन्ना जिंआं कि बीण बजाणे आल़े बीण बजादे हन।

³सैह़ सिंहासणे दे कने चौंन्नी प्राणियां कने स्याणेयां सामणै इक्क नौआं गीत गा दे थे। तिन्हां इक्क लख चौत्ताल़ी हज़ार लोकां जो छड्डी, जेह्ड़े धरतिया ते खरीदेयो थे, कोई भी सैह़ गीत नीं सीखी सकदा था।

⁴एह़ सैह़ लोक हन जिन्हां जणासां सौगी गंदे कम्म नीं कित्ते, अपर कुआरे हन; एह़ सैई लोक हन कि जित्थु कुत्थी मेम्ना जांदा ऐ, सैह़ तिसदे पचांह़ चली पोंदे हन; एह़ तां परमात्मे कने मेम्ने सामणै पैहल्ले फल़ होणे तांई माणुआं ते खरीदेयो हन।

⁵तिन्हां कदी भी झूठ नीं ग्लाया था, सैह़ बेकसूर हन।

⁶भिरी मैं इक्क होर सुअर्गदूते जो अम्बरे च उड़दे दिख्या, जिस अल्ल संसारे दे लोकां दी हर इक्क जाति, गोत्र, भासा, कने लोकां जो सणाणे तांई सदा काल दा सुसमाचार था।

⁷तिन्हीं बड़ी जोरे नैं ग्लाया, “परमात्मे ते डरा, कने तिसदी महिमा करा, क्जोकि तिसदे न्याय करणे दा बग्त आई गेआ ऐ; कने तिसदी अराधना करा, जिन्हीं सुअर्ग, धरतिया, समुंदर कने पाणी दे झरने बणाये।”

⁸भिरी इसते बाद इक्क होर दूआ सुअर्गदूत एह़ ग्लांदा आया, “नास होई गेआ, सैह़ बेबीलोन सैहर नास होई गेआ, जिन्हीं सारी जातिआं जो अपणे ब्यभिचारे दी मदहोस करणे आल़ी मदिरा पिलाई ऐ।”

⁹भिरी इन्हां दे बाद इक्क होर त्रीआ सुअर्गदूत बड़ी जोरे-जोरे नैं एह़ ग्लांदा आया, “जेह्ड़ा कोई तिस पैहल्ले जंगली जानवरे दी कने तिसदिया मूर्तिया दी पूजा करगा, कने अपणे मत्थे या अपणे हत्थे पर तिसदी मोहर लगवांगा।

¹⁰तां सैह़ परमात्मे दे गुस्से दी मदिरा पींगा, जेह्ड़ी तिसदे गुस्से दे कटोरे च पाईयो ऐ, कने पवित्र सुअर्गदूतां कने मेम्ने सामणै अग्ग कने गंधका दिया पीड़ा च पोंगा।

¹¹तिन्हां दिया पीड़ा दा धुआं जुगा-जुग उठदा रैंह्गा, कने जेह्ड़े तिस पैहल्ले जंगली जानवरे दी कने तिसदिया मूर्तिया दी अराधना करदे हन, कने जेह्ड़े तिसदे नां दी मोहर लगवांदे हन, तिन्हां जो रात दिन चैन नीं मिलगा।”

¹²परमात्मे दे लोकां दा सबर इसी च ऐ, जेह्ड़े परमात्मे दे हुक्मां जो मनदे कने यीशु पर बसुआस रखदे हन।

¹³कने भिरी मैं सुअर्गे ते एह़ उआज़ सुणी, “लिख: धन हन सैह़ मरेयो लोक, हुण ते जिन्हां दी मौत्त प्रभु च हुंगी।” आत्मा ग्लांदा ऐ, “हाँ, सैह़ अपणिया सारी मेहनता नैं अराम पांगे, क्जोकि तिन्हां दे खरे कम्म तिन्हां सौगी हन।”

¹⁴इसते बाद मैं इक्क चिट्टा बदल़ दिख्या, कने तिस बदल़े पर माणुये दे पुत्तर साइआं कोई बैठेया ऐ, जिसदे सिरे पर सोन्ने दा मुकट कने हत्थे च तेज दराटी ऐ।

¹⁵भिरी इक्क होर सुअर्गदूतैं मंदरे ते निकल़ी करी तिस नैं, जेह्ड़ा बदल़े पर बैठेया था, बड़ी जोरे नैं डड्डी करी ग्लाया, “अपणी दराटी लगाई करी बडाई कर, क्जोकि बडणे दा बग्त आईआ, इसतांई कि धरतिया दी फसल पकी गियो ऐ।”

¹⁶अपर जेह्ड़ा बदल़े पर बैठेया था तिन्हीं धरतिया पर अपणी दराटी चलाई, कने धरतिया दी फसल बड्डी दित्ती।

¹⁷भिरी इक्क होर सुअर्गदूत तिस मंदरे ते निकल़ेया जेह्ड़ा सुअर्गे च ऐ, कने तिस अल्ल भी तेज दराटी थी।

¹⁸भिरी इक्क होर सुअर्गदूत, जिसियो अग्गी पर हक्क था, वेदी ते निकल़ेया, कने जिस अल्ल तेज दराटी थी तिन्हीं जोरे नैं ग्लाया, “अपणी तेज दराटी चलाई करी धरतिया दे अंगूरा दे गुच्छेयां जो बड्डी लै, क्जोकि तिसदे अंगूर पकी गियो हन।”

¹⁹ताह़लू तिन्हीं सुअर्गदूतैं धरतिया पर अपणी दराटी चलाई कने धरतिया दे अंगूरा दे गुच्छेयां जो बड्डी करी अपणे परमात्मे दे गुस्से दे बड्डे अंगूरा दे कोलूये च पाई दित्ता,

²⁰कने सैहरे दे बाहर तिस कोलूये च दाख दरड़ी गेई, कने कोलूये च इतणा खून निकल़ेया कि नदी बणी गेई, कने लगभग तीन सौ किलोमीटर तिकर बगी गेआ, कने इतणा डुग्गा था कि इक्क घोड़ा भी डुबी सकदा था।