Read Kangri प्रकाशितवाक्य 15 Bible Online

प्रकाशितवाक्य 15 - Kangri bible

प्रकाशितवाक्य 15

¹इसते बाद भिरी मैं सुअर्गे च इक्क होर बड्डा कने अनोखा नसाण दिख्या, मतलब सत सुअर्गदूत जिन्हां अल्ल सत आखरी खतरे थे क्जोकि तिन्हां दे पूरे होई जाणे पर परमात्मे दे गुस्से दा अन्त ऐ।

²ताह़लू मैं अग्गी नैं मिल्लेयो सीशे साइआं इक्क समुंदर दिख्या, कने जिन्हां लोकां तिस पैहल्ले जंगली जानवरे जो कने मूर्तिया जो कने तिसदे नांऐ दियां संख्या जो जीत्त लेआ था, तिन्हां जो तिस सीशे दे समुंदरे बक्खे परमात्मे दियां बीणां जो लेई नैं खड़ोत्यो दिख्या।

³सैह़ परमात्मे दे दास मूसा दा गीत, कने मेम्ने दा गीत गाई-गाई करी ग्लांदे थे, “हे सर्वशक्तिमान प्रभु परमात्मा तेरे कम्म म्हान कने अनोखे हन; हे जुगा-जुग दे राजा, तेरी चाल खरी कने सच्ची ऐ।

⁴हे प्रभु, कुण तिज्जो ते नीं डरगा कने तेरे नांऐ दी महिमा नीं करगा, क्जोकि सिर्फ तू ई पवित्र ऐ। सारियां जातिआं दे लोक आई नैं तेरी अराधना करगे, क्जोकि तेरे न्याय दे कम्म प्रगट होई गै हन।”

⁵इसते बाद मैं दिख्या कि सुअर्गे च गवाहिये दे तम्बुये दा मंदर खोली दित्ता;

⁶कने सैह़ सत सुअर्गदूत जिन्हां अल्ल सत खतरे थे, मलमले दे साफ-चिट्टे कने चमकदार कपड़े पैहनेयो कने छातिया पर सोन्ने दे पटके बन्नी नैं मंदरे ते निकल़े।

⁷ताह़लू तिन्हां चौंन्नी प्राणियां च इक्की तिन्हां सत सुअर्गदूतां जो परमात्मे दे, जेह्ड़ा जुगा-जुग जिन्दा ऐ तिसदे गुस्से नैं भरेयो सोन्ने दे सत कटोरे दित्ते;

⁸कने परमात्मे दी महिमा कने तिसदी सामर्थी दिया बज़ाह ते मंदर धूयें नैं भरोई गेआ, कने जाह़लू तिकर तिन्हां सतां सुअर्गदूतां दे सत खतरे पूरे नीं होई गै ताह़लू तिकर कोई मंदरे च नीं जाई सकेया।