Read Kangri प्रकाशितवाक्य 2 Bible Online

प्रकाशितवाक्य 2 - Kangri bible

प्रकाशितवाक्य 2

¹तिन्हीं मिन्जो नैं एह़ भी ग्लाया, कि “इफिसुस सैहरे दी कलीसिया दे सुअर्गदूते जो एह़ लिख: मैं जेह्ड़ा सत तारे अपणे सज्जे हत्थे च लेई करी, कने सोन्ने दे सतां दीपदानां दे गब्बैं फिरदा ऐ, तिसदा ग्लाणा ऐई ऐ:

²मैं तेरे कम्म कने तेरी मेहनत, कने तेरे सबरे जो जाणदा ऐ; कने एह़ भी कि तू बुरे लोकां जो दिक्खी नीं सकदा, कने जेह्ड़े अपणे आप्पे जो प्रेरित ग्लांदे हन, कने हन नीं, तिन्हां जो तैं परखेया कि सैह़ झूठ ग्लांदे हन।

³तैं बड़ा सबर रखी नैं दुख झेले, क्जोकि तैं मिन्जो पर बसुआस कित्ता, कने अह्ल्ली भी तेरा बसुआस मिन्जो पर बड़ा मजबूत ऐ।

⁴अपर मेरी तिज्जो नैं एह़ शकायत ऐ: कि तू मिन्जो नैं हुण सद्देया प्यार नीं करदा जदेया पैहल्लैं करदा था।

⁵इसतांई याद कर कि तू कुत्थू ते थल्लैं पेआ ऐ, कने मने जो बदल कने पैहल्ले साइआं कम्म कर। जे तू मने नीं बदलगा तां मैं तिज्जो अल्ल आई करी तेरे दीपदान जो तिसदिया जगाह ते हटाई दिंगा।

⁶अपर हाँ, तिज्जो च एह़ गल्ल तां ऐ कि तू नीकुलियां दे कम्मां ते नफरत करदा ऐ, जिन्हां ते मैं भी नफरत करदा ऐ।

⁷जेह्ड़े मेरे संदेसे जो समझणा चांह़दे हन, तिसियो ध्याने नैं सुणन कि पवित्र आत्मा कलीसियां नैं क्या ग्लांदा ऐ। जेह्ड़ा बुरिआं ताकतां जो हराई दिंदा ऐ, मैं तिसियो तिस रूखे ते जेह्ड़ा ज़िन्दगी दिंदा ऐ, कने जेह्ड़ा परमात्मे दे सुअर्गलोके च ऐ, फल़ खाणे जो दिंगा।”

⁸भिरी तिन्हीं मिन्जो नैं एह़ भी ग्लाया, कि “स्मुरना सैहरे दी कलीसिया दे सुअर्गदूत जो एह़ लिख: मैं जेह्ड़ा पैहल्ला कने आखरी ऐ, इक्क बग्त था जाह़लू मैं मरी गेआ था, अपर हुण मैं जिन्दा ऐ, तिसदा ग्लाणा ऐई ऐ:

⁹मैं तेरे दुखे कने गरीबिया जो जाणदा ऐ अपर सच्चाई एह़ कि तू अमीर ऐ; कने जेह्ड़े लोक अपणे आप्पे जो यहूदी ग्लांदे हन, अपर सच्चाई ऐ कि सैह़ हन नीं, एह़ लोक दावा करदे हन कि सैह़ परमात्मे पचांह़ चलणे आल़े हन, अपर सच्चाई एह़ ऐ कि सैह़ सैताने पचांह़ चलदे हन, मैं तिन्हां दी इस निंदा जो भी जाणदा ऐ।

¹⁰जेह्ड़े दुख तिज्जो झेलणा पोंगे, तिन्हां ते मत डर। अपर चौकनै रेह्आ; क्जोकि सैतान तुहां च कुच्छ लोकां जो जेलखाने च पाणे आल़ा ऐ तांजे तुहां परखे जान; कने तुहां जो दसा दिनां तिकर दुख झेलणा पोंगा। प्राण दैणे तिकर बसुआसे जोग्गा बणी रैह्, तां मैं तिज्जो ज़िन्दगिया दा मुकट दिंगा।

¹¹जेह्ड़े मेरे संदेसे जो समझणा चांह़दे हन, तिसियो ध्याने नैं सुणन कि पवित्र आत्मा कलीसियां नैं ग्लांदा ऐ। जेह्ड़ा बुरिआं ताकतां जो हराई दिंदा ऐ, तिसियो दूईआ मौत्ती ते कोई नकसान नीं पुज्जगा।”

¹²भिरी तिन्हीं मिन्जो नैं एह़ भी ग्लाया, कि “पिरगमुन सैहरे दी कलीसिया दे सुअर्गदूते जो एह़ लिख: मैं सैई ऐ जिस अल्ल दूँ धारां आल़ी तलवार ऐ, तिसदा ग्लाणा ऐई ऐ:

¹³मैं एह़ तां जाणदा ऐ कि तू तित्थु रैंह्दा ऐ जित्थु सैताने दा सिंहासण ऐ; तू लगातार मेरे बसुआसे च मजबूत रैंह्दा ऐ, कने मिन्जो पर बसुआस करणे ते तिन्हां दिनां च भी पचांह़ नीं हटेया जिन्हां दिनां च मेरा बसुआसे जोग्गा गवाह अन्तिपास, तुहां दे सामणै तिसा जगाह पर मारे गेआ जित्थु सैतान रैंह्दा ऐ।

¹⁴अपर मेरी तिज्जो नैं एह़ शकायत ऐ: कि तेरे ऐत्थु कुच्छ लोक तां ऐदेय हन, जेह्ड़े बिलाम दी सिक्षा जो मनदे हन, जिन्हीं बालाके जो इस्राएली लोकां जो भटकाणे तांई सखाया कि सैह़ मूर्तियां सामणै चढ़ाईयां चीज्जां जो खान कने ब्यभिचार करन।

¹⁵तिंआं ई तेरे ऐत्थु कुच्छ लोक तां ऐदेय भी हन, जेह्ड़े नीकुलियां दी सिक्षा जो मनदे हन।

¹⁶इसतांई अपणे मने जो बदल, नीं तां मैं तिज्जो अल्ल तौल़ी ई आई नैं अपणे मुँऐ दी तलवारा नैं तिन्हां सौगी लड़गा।

¹⁷जेह्ड़े मेरे संदेसे जो समझणा चांह़दे हन, तिसियो ध्याने नैं सुणन कि पवित्र आत्मा कलीसियां नैं क्या ग्लांदा ऐ। जेह्ड़ा बुरिआं ताकतां जो हराई दिंदा ऐ, मैं तिसियो कुच्छ मन्ना दिंगा जेह्ड़ा गुप्त च रखेया ऐ, कने तिसियो इक्क चिट्टा पत्थर भी दिंगा; जिस पर इक्क नां लिख्या हुंगा, जिसियो तिसदे लैणे आल़े जो छड्डी नैं होर कोई नीं जाणगा।”

¹⁸भिरी तिन्हीं मिन्जो नैं एह़ भी ग्लाया, कि “थुआतीरा सैहरे दी कलीसिया दे सुअर्गदूत जो एह़ लिख: कि मैं परमात्मे दा पुत्तर जिसदियां अखीं अग्गी दी लपटा साइआं, कने जिसदे पैर भट्ठिया च तपाईया पीतली साइआं चमका दे हन, तिसदा ग्लाणा ऐई ऐ:

¹⁹मैं तेरे कम्मां, प्यार, बसुआस, सेवा कने सबरे जो जाणदा ऐ, कने एह़ भी कि तेरे पिछले कम्म पैहल्लेयां कम्मां ते बधी करी हन।

²⁰अपर मेरी तिज्जो नैं एह़ शकायत ऐ: कि तू तिसा जणासा इजेबेले जो रैहणा दिंदा ऐ जेह्ड़ी अपणे आप्पे जो भविष्यवक्ता ग्लांदी ऐ, कने मेरे दासां जो ब्यभिचार करणा कने मूर्तियां सामणै चढ़ाईयां चीज्जां जो खाणा सखाई नैं भटकांदी ऐ।

²¹मैं तिसा जो मने बदलणे दा मौका दित्ता, अपर सैह़ अपणे ब्यभिचारे ते अपणे मने नीं बदलणा चांह़दी।

²²इसतांई मैं तिसा जो बमारिया च पांगा; कने जेह्ड़े तिसा सौगी ब्यभिचार करदे हन जे सैह़ भी तिसादे कम्मां ते मने नीं बदलगे तां तिन्हां जो भी बड़े दुखां पांगा।

²³मैं तिन्हां जो भी मारी दिंगा, जेह्ड़े तिसा दियां सिक्षां जो मनदे हन; कने ताह़लू सारी कलीसियां जाणी लैंगियां कि हर माणुये दिले जो कने मने जो परखणे आल़ा मैंई ऐ, कने मैं तुहां च हर इक्की जो तिसदे कम्मां मताबक प्रतिफल़ दिंगा।”

²⁴अपर तुहां थुआतीरा सैहरे दे बाक्कि लोकां ते, जितणे इसा सिक्षा जो नीं मनदे, कने तिन्हां गल्लां जो सैताने दियां गैहरियां गल्लां ग्लांदे हन, नीं जाणदे, मैं एह़ ग्लांदा ऐ कि मैं तुहां पर होर बोझ नीं बणगा।

²⁵अपर हाँ, जेह्ड़ियां सिक्षां तुहां अल्ल हन तिन्हां जो मेरे ओणे तिकर सम्भाल़ी रखा।

²⁶जेह्ड़ा बुरिआं ताकतां जो हराई दिंदा ऐ, कने मेरे कम्मां दे तरीके आखरी तिकर करदा रैंह्, मैं तिसियो जाति-जाति दे लोकां पर अधिकार दिंगा,

²⁷कने मैं तिसियो राज्ज करणे तांई सैई हक्क दिंगा जेह्ड़ा मेरे पितैं मिन्जो दित्या ऐ। तिसदा राज्ज लोहे साइआं मजबूत हुंगा जेह्ड़ा कदी नीं टूटदा, कने तिसदे दुश्मण चिक्का दे भांडेयां साइआं चकनाचूर होई जांगे।

²⁸कने मैं तिसियो भ्यागा दा तारा भी दिंगा, तिसदी जीत्त दस्सणे तांई।

²⁹जेह्ड़े मेरे संदेसे जो समझणा चांह़दे हन, तिसियो ध्याने नैं सुणन कि पवित्र आत्मा कलीसियां नैं क्या ग्लांदा ऐ।