Read Kangri प्रकाशितवाक्य 20 Bible Online

प्रकाशितवाक्य 20 - Kangri bible

प्रकाशितवाक्य 20

¹भिरी मैं इक्की सुअर्गदूते जो सुअर्गे ते लौंदे दिख्या, जिसदे हत्थे च अथाह कुंडे दी चाबी कने इक्क बड्डा संगल़ था।

²तिन्हीं तिस अजगरे, मतलब पराणे सर्पे जो, जेह्ड़ा सैतान ऐ, पकड़ी करी हज़ारां साल्लां तांई बन्नी दित्ता,

³कने तिसियो अथाह कुंडे च पाई करी बंद करी दित्ता कने तिस पर मोहर लगाई दित्ती कि सैह़ हज़ार साल पूरे होणे तिकर जाति-जाति दे लोकां जो भिरी नीं भटकां। इसते बाद जरूरी ऐ कि सैह़ थोड़ियां देरा तांई भिरी खोलेया जां।

⁴भिरी मैं सिंहासण दिक्खे, कने तिन्हां पर लोक बैठी गै, कने तिन्हां जो न्याय करणे दा हक्क दित्ता गेआ। मैं तिन्हां दियां आत्मां जो भी दिख्या जिन्हां दे सिर यीशु दी गवाही दैणे कने परमात्मे दे वचने दिया बज़ाह ते बड्डे गियो थे, कने जिन्हां ना तिस जंगली जानवरे दी, ना तिसा मूर्तिया दी अराधना कित्तियो थी, कने ना तिसदी मोहर अपणे मत्थे कने हत्थां पर लगाईयो थी। सैह़ जिन्दे होई करी मसीह सौगी हज़ार साल तिकर राज्ज करदे रैह़न।

⁵जाह़लू तिकर एह़ हज़ार साल पूरे नीं होये ताह़लू तिकर बाक्कि मरेयो जिन्दे नीं होये। एह़ तां पैहल्ली बरी दुवारा जिन्दा होणा ऐ।

⁶धन कने पवित्र सैह़ हन, जेह्ड़े इस पैहल्ली बरी जिन्दे होणे दे साझी हन। ऐदेयां पर दूईआ मौत्ती दा कोई भी हक्क नीं, अपर सैह़ परमात्मे कने मसीह दे याजक हुंगे कने तिस सौगी हज़ार साल तिकर राज्ज करगे।

⁷जाह़लू हज़ार साल पूरे होई जांगे तां सैतान कैदा ते छड्डी दित्ता जांगा।

⁸सैह़ तिन्हां जातिआं जो जेह्ड़ियां सारिया धरतिया पर हुंगियां, मतलब गोग कने मागोग जो जिन्हां दी गिणती समुंदरे दिया रेता बराबर हुंगी, भटकाई करी लड़ाईया तांई किठ्ठा करणे तांई निकल़गा।

⁹कने सैह़ सारिया धरतिया पर फैली जांगियां, कने परमात्मे दे लोकां दा डेरा कने प्यारे सैहरे जो घेरी लैंगी; कने अग्ग सुअर्गे ते लौई करी तिन्हां जो भस्म करगी।

¹⁰तिन्हां दा भटकाणे आल़ा सैतान अग्ग कने गंधका दिया तिसा झीला च, जिसा च सैह़ जंगली जानवर कने झूठा भविष्यवक्ता भी पाई दित्ता जांगा; कने सैह़ रात दिन जुगा-जुग पीड़ा च तड़फदे रैंह्गे।

¹¹भिरी मैं इक्क बड्डे चिट्टे सिंहासणे कने तिसियो जेह्ड़ा तिस पर बैठेया ऐ, दिख्या, जिसदे सामणै ते धरती कने अम्बर नठ्ठी गै, कने तिन्हां तांई जगाह नीं मिल्ली।

¹²भिरी मैं छोटे बड्डे सारे मरेयां जो सिंहासणे सामणै खड़ोत्यो दिख्या, कने कताबां खोलियां गियां; कने भिरी इक्क होर कताब खोली, मतलब ज़िन्दगिया दी कताब कने जिंआं तिन्हां कताबां च लिख्या था, तिंआं ई तिन्हां दे कम्मां मताबक मरेयां दा न्याय कित्ता गेआ।

¹³समुंदरे तिन्हां मरेयां जो देई दित्ता, कने मौत्त कने अधोलोकैं तिन्हां मरेयां जो जेह्ड़े तिन्हां च थे देई दित्ता; कने तिन्हां च हर इक्की दे कम्मां मताबक तिन्हां दा न्याय कित्ता।

¹⁴मौत्त कने अधोलोक भी अग्गी दिया झीला च पाई दित्ते गै। एह़ अग्गी दी झील तां दूई मौत्त ऐ;

¹⁵कने जिस कुसी दा नां ज़िन्दगिया दिया कताबा च लिख्या नीं मिल्ला, सैह़ अग्गी दिया झीला च पाई दित्ता गेआ।