Read Kangri प्रकाशितवाक्य 22 Bible Online

प्रकाशितवाक्य 22 - Kangri bible

प्रकाशितवाक्य 22

¹भिरी तिन्हीं मिन्जो साफ सीशे साइआं झलकदी होई, ज़िन्दगिया दे पांणिये दी नदी, जेह्ड़ी परमात्मे कने मेम्ने दे सिंहासणे ते निकल़ी करी

²तिस सैहरे दियां सड़कां दे बिच्चो-बिच्च बगदी थी। नदिया दे इस पार कने तिस पार ज़िन्दगिया दा रूख था; तिस च बाराह किस्मा दे फल़ लगदे थे, कने सैह़ हर मीहने फल़दा था; कने तिस रूखे दे पत्तरां ते जाति-जाति दे लोक खरे हुंदे थे।

³भिरी श्राप नीं हुंगा, कने परमात्मे कने मेम्ने दा सिंहासण तिस सैहरे च हुंगा कने तिसदे दास तिसदी अराधना करगे।

⁴सैह़ तिसियो आमणै-सामणै दिक्खगे, कने तिसदा नां तिन्हां दे मत्थे पर लिख्या हुंगा।

⁵भिरी रात नीं हुंगी, कने तिन्हां जो दीय्ये कने सूरजे दी लौई दी जरूरत नीं हुंगी, क्जोकि प्रभु परमात्मा तिन्हां जो लौ करगा, कने सैह़ जुगा-जुग राज्ज करगे।

⁶भिरी तिन्हीं मिन्जो नैं ग्लाया, “एह़ गल्लां बसुआसे जोग्गियां कने सच्च हन। प्रभुयैं, जेह्ड़ा भविष्यवक्तां दियां आत्मां दा परमात्मा ऐ, अपणे सुअर्गदूते जो इसतांई घल्लेया कि अपणे दासां जो सैह़ गल्लां, जिन्हां दा तौल़ी पूरा होणा जरूरी ऐ दस्सें।”

⁷“दिक्ख, मैं तौल़ी ओणे आल़ा। धन ऐ सैह़ जेह्ड़ा इसा कताबा दी भविष्यवाणी दियां गल्लां मनदा ऐ।”

⁸मैं सैई यूहन्ना ऐ, जेह्ड़ा इन्हां गल्लां जो सुणदा कने दिक्खदा था। जाह़लू मैं सुणेया कने दिख्या, तां जेह्ड़ा सुअर्गदूत मिन्जो एह़ गल्लां दस्सदा था, मैं तिसदे पैरां पर प्रणांम करणे तांई पेई गेआ।

⁹अपर तिन्हीं मिन्जो नैं ग्लाया, “दिक्ख इआं मत कर; क्जोकि मैं तेरा, कने तेरे भाऊ भविष्यवक्ता कने इसा कताबा दियां गल्लां जो मन्नणे आल़ेआं दा संगी दास ऐ। परमात्मे दी ई अराधना कर।”

¹⁰भिरी तिन्हीं मिन्जो ग्लाया, “इसा कताबा दी भविष्यवाणिये दियां गल्लां जो बंद मत कर; क्जोकि बग्त नेड़े आईआ ऐ।

¹¹जेह्ड़ा बुराई करदा ऐ, सैह़ बुराई ई करदा रैंह्; कने जेह्ड़ा पापी ऐ, सैह़ पापी बणी रैंह्; कने जेह्ड़ा धर्मी ऐ, सैह़ धर्मी बणी रैंह्; कने जेह्ड़ा पवित्र ऐ; सैह़ पवित्र बणी रैंह्।”

¹²प्रभु यीशुयैं ग्लाया, “दिक्ख, मैं तौल़ी ओणे आल़ा। कने हर इक्की दे कम्मे मताबक बदला दैणे तांई प्रतिफल़ मिन्जो अल्ल ऐ

¹³मैं अलफा कने ओमेगा, पैहल्ला कने आखरी, सुरुआत कने अन्त ऐ।”

¹⁴धन सैह़ हन, जेह्ड़े अपणे आप्पे जो पवित्र बणाई लैंदे हन, क्जोकि तिन्हां जो ज़िन्दगिया दे रूखे अल्ल ओणे दा हक्क मिलगा, कने सैह़ फाटकां च होई करी अंदर जांगे।

¹⁵अपर कुत्ते[14], जादू-टूणा करणे आल़े, ब्यभिचारी, हत्यारे, मूर्ति दी पूजा करणे आल़े, हर इक्क झूठ दा साथ दैणे आल़े, झूठ ग्लाणे आल़े बाहर रैंह्गे।

¹⁶“मैं यीशुये अपणे सुअर्गदूते जो इसतांई घल्लेया, कि तुहां दे गांह कलीसियां दे बारे च इन्हां गल्लां दी गवाही दैं। मैं दाऊदे दा मूल कने वंश, कने भ्यागा दा चमकदा तारा ऐ।”

¹⁷परमात्मे दी आत्मा कने मेम्ने दी दुलहन दोयो ग्लादियां हन, “आ।” कने सुणने आल़ा भी ग्लां, “आ।” जेह्ड़ा प्यासा होयैं सैह़ औयें, कने जेह्ड़ा कोई चां सैह़ ज़िन्दगिया दा पाणी मुफ्ते च लैं।

¹⁸मैं हर इक्की जो, जेह्ड़ा इसा कताबा दी भविष्यवाणिये दियां गल्लां सुणदा ऐ, गवाही दिंदा; जे कोई माणु इन्हां गल्लां च कुच्छ बधां तां परमात्मा तिन्हां खतरेयां जो, जेह्ड़े इसा कताबा च लिख्यो हन, तिस पर बधांगा।

¹⁹जे कोई इसा भविष्यवाणी दिया कताबा दियां गल्लां ते कुच्छ कड्डगा, तां परमात्मा तिसा ज़िन्दगिया दे रूखे कने पवित्र सैहरे ते, जिसदा बखान इसा कताबा च ऐ, तिसदा हिस्सा कड्डी दिंगा।

²⁰जेह्ड़ा इन्हां गल्लां दी गवाही दिंदा ऐ सैह़ एह़ ग्लांदा ऐ, “हाँ, मैं तौल़ी ओणे आल़ा।” मैं यहून्ना जवाब दिंदा ऐ आमीन। हे प्रभु यीशु आ।

²¹मैं प्रार्थना करदा ऐ, कि प्रभु यीशुये दा अनुग्रह परमात्मे दे लोकां सौगी रैंह्। आमीन।