Read Kangri प्रकाशितवाक्य 3 Bible Online

प्रकाशितवाक्य 3 - Kangri bible

प्रकाशितवाक्य 3

¹भिरी तिन्हीं मिन्जो नैं एह़ भी ग्लाया, कि “सरदीस सैहरे दी कलीसिया दे सुअर्गदूते जो एह़ लिख: मैं सैई ऐ जिस अल्ल परमात्मे दियां सत आत्मां कने सत तारे हन, सैह़ एह़ ग्लांदा ऐ कि मैं तेरे कम्मां जो जाणदा ऐ, कि तू अप्पु जो मिन्जो पचांह़ चलणे आल़ा सच्चा बसुआसी तां दस्सदा ऐ, अपर असल च तू ऐ नीं।

²इसतांई चौकन्ना होई जा, कि जेह्ड़ा तेरे अंदर अह्ल्ली थोड़ा बसुआस बचेया ऐ, तिसियो मजबूत कर; तांजे एह़ भी खत्म नीं होई जां, क्जोकि जेह्ड़ा तू करा दा तिसते परमात्मा खुस नीं ऐ।

³इसतांई याद कर कि तैं कुस तरीके नैं सिक्षा हासल कित्ती कने सुणी, कने तिस च बणी रैंह् कने अपणे मने बदल। जे तू चौकन्ना नीं हुंगा तां मैं चोरे साइआं आई जांगा कने तू तिस बग्ते जो कदी नीं जाणी सकगा, जाह़लू मैं तिज्जो सज़ा दैणे तांई ओंगा।

⁴अपर हाँ, सरदीस सैहरे च तेरे ऐत्थु कुच्छ लोक ऐदेय हन, जिन्हां पापां दे जरिये अपणी ज़िन्दगी भरष्ठ नीं कित्ती, सैह़ अपणिया पवित्र ज़िन्दगिया च मिन्जो सौगी रैंह्गे, क्जोकि सैह़ इस जोग्गे हन।

⁵जेह्ड़ा बुरिआं ताकतां जो हराई दिंदा ऐ, तिसियो इस तरीके नैं पवित्र ज़िन्दगी दित्ती जांगी, कने मैं तिसदा नां तिसा ज़िन्दगिया दिया कताबा च कुस भी तरीके नैं नीं कटगा; अपर तिसियो मैं अपणे पिता कने तिसदे सुअर्गदूतां दे सामणै अपनाई लैंगा।

⁶जेह्ड़े मेरे संदेसे जो समझणा चांह़दे हन, तिसियो ध्याने नैं सुणन कि पवित्र आत्मा कलीसियां नैं क्या ग्लांदा ऐ।”

⁷भिरी तिन्हीं मिन्जो नैं एह़ भी ग्लाया, कि “फिलदिलफिया सैहरे दी कलीसिया दे सुअर्गदूते जो एह़ लिख: कि मैं सैई ऐ जेह्ड़ा पवित्र कने सच्च ऐ, कने जिस अल्ल दाऊदे दी चाबी ऐ, जिसियो सैह़ खोली दिंदा तिसियो कोई बंद नीं करी सकदा कने जिसियो सैह़ बंद करी दिंदा तिसियो कोई खोली नीं सकदा, तिसदा ग्लाणा ऐई ऐ:

⁸मैं तेरे कम्मां जो जाणदा ऐ; इसतांई मैं तेरे सामणै इक्क दरवाजा खोली रखेया ऐ, जिसियो कोई बंद नीं करी सकदा; मैं जाणदा ऐ कि तिज्जो अल्ल थोड़ी काबिलियत ऐ, भिरी भी तैं मेरे वचनां दा पालण कित्ता ऐ कने मेरे नांऐ दा इन्कार नीं कित्ता।

⁹इसतांई सैह़ लोक जेह्ड़े सैताने दिया सभा दे हन, सैह़ एह़ दावा करदे हन कि सैह़ परमात्मे दे चुणेयो लोक हन, अपर सच्चाई ऐ कि सैह़ झूठ ग्लांदे हन, इसतांई मैं इआं करगा कि सैह़ आई करी तिज्जो प्रणांम करगे, कने एह़ जाणी लैंगे कि मैं तिज्जो नैं प्यार कित्ता ऐ।

¹⁰तैं दुखां च भी सबर रखी नैं मेरे वचनां दा पालण कित्ता ऐ, इसतांई मैं तिज्जो परीक्षा दे तिस बग्त बचाई रखगा, मैं भी तिस बग्त इस संसारे दे सारे लोकां जो परखणे तांई ओंगा।

¹¹मैं बड़ी तौल़ी ओणे आल़ा ऐ; इसतांई जेह्ड़ा बसुआस तेरा मिन्जो पर ऐ तिसियो सम्भाल़ी करी रख, तांजे कोई भी तेरे इनामे जो खोई नीं लैं।

¹²जेह्ड़ा बुरिआं ताकतां जो हराई दिंदा ऐ, तिसियो मैं अपणे परमात्मे दे मंदरे च इक्क खम्भे साइआं बणांगा, कने सैह़ कदी भी इसियो नीं छड्डगे; कने मैं अपणे परमात्मे दा नां कने अपणे परमात्मे दे सैहरे दा मतलब नौये यरूशलेम दा नां, जेह्ड़ा मेरे परमात्मे ते पास्से सुअर्गे ते लौणे आल़ा ऐ, कने अपणा नौआं नां तिस पर लिखगा।

¹³जेह्ड़े मेरे संदेसे जो समझणा चांह़दे हन, तिसियो ध्याने नैं सुणन कि पवित्र आत्मा कलीसियां नैं क्या ग्लांदा ऐ।”

¹⁴भिरी तिन्हीं मिन्जो नैं एह़ भी ग्लाया, कि “लौदीकिया सैहरे दी कलीसिया दे सुअर्गदूते जो एह़ लिख: कि मैं सैई ऐ जेह्ड़ा आमीन कने बसुआसे जोग्गा कने सच्चा गवाह ऐ, कने सैई ऐ जिसदे जरिये परमात्मे सब कुच्छ बणाया ऐ, तिसदा ग्लाणा ऐई ऐ:

¹⁵मैं तेरे कम्मां जो जाणदा ऐ कि तू मेरे बसुआसे च तिस पांणिये साइआं ऐ जेह्ड़ा ना तां ठंडा ऐ कने ना तां तत्ता; अपर खरा हुंदा कि तू ठंडा या तत्ता हुंदा।

¹⁶इसतांई कि तू मेरे बसुआसे च गुणगुणे पांणिये साइआं ऐ, कने जेह्ड़ा ना तां ठंडा ऐ कने ना तां तत्ता; मैं तिज्जो पूरे तरीके नैं अप्पु ते दूर करणे जो त्यार ऐ।

¹⁷तू ग्लांदा ऐ कि मैं अमीर ऐ कने दौलतमंद होई गेआ ऐ कने मिन्जो कुसा भी चीज्जा दी कमी नीं ऐ; अपर सच्च एह़ नीं ऐ कि तू अह्ल्ली भी अभागा, नीच, गरीब, अन्ना कने भुखा नंगा ऐ।

¹⁸इसतांई मैं तिज्जो इक्क सलाह दिंदा ऐ कि अग्गी च तपाया सोन्ना मिन्जो ते खरीदी लै कि तू दौलतमंद होई जां, कने चिट्टे कपड़े लेई लै कि पैहनी करी तिज्जो अपणे नंगेपन दी सर्म नीं होयैं, कने अपणियां अखीं च मल़णे तांई सुर्मा लै कि तू दिक्खणा लग्गी पोयैं।

¹⁹मैं जिन्हां-जिन्हां नैं प्यार करदा ऐ, तिन्हां जो मैं सिक्षा कने सज़ा भी दिंदा ऐ; तांजे सैह़ खरे बणी जान, इसतांई हमेसा खरा करदे रेह्आ, कने पाप करणे ते अप्पु जो रोका।

²⁰इसतांई मैं तुहां दे मनां च ओणे तांई तिस माणु साइआं घरे बाहर खड़ोत्या ऐ; जेह्ड़ा अंदर ओणे तांई ठोरा दा ऐ, जे कोई मेरी उआज़ सुणी करी अपणे मने जो मिन्जो तांई खोलगा, तां मैं आई करी तिस सौगी संगति करगा।

²¹जेह्ड़ा बुरिआं ताकतां जो हराई दिंदा ऐ, मैं तिसियो अपणे सौगी अपणे सिंहासणे पर बठाल़गा, जिंआं मैं भी बुरिआं ताकतां जो हराई करी अपणे पिता सौगी तिसदे सिंहासणे पर बेई गेआ।

²²जेह्ड़े मेरे संदेसे जो समझणा चांह़दे हन, तिसियो ध्याने नैं सुणन कि पवित्र आत्मा कलीसियां नैं क्या ग्लांदा ऐ।”