Read Kangri प्रकाशितवाक्य 4 Bible Online

प्रकाशितवाक्य 4 - Kangri bible

प्रकाशितवाक्य 4

¹इन्हां सारियां गल्लां ते बाद मैं एह़ दिख्या कि सुअर्गे च इक्क दरवाजा खुलेया ऐ, कने जिसियो मैं पैहल्लैं तुरही दिया उआज़ा नैं अप्पु सौगी गल्लां करदा सुणेया था, तिन्हीं मिन्जो नैं ग्लाया, “मिन्जो अल्ल ऐत्थु ऊपरेयो आई जा; कने मैं सैह़ गल्लां तिज्जो दस्सगा, जिन्हां दा इन्हां गल्लां ते बाद पूरा होणा जरूरी ऐ।”

²तां मैं तिसी बग्त पवित्र आत्मा च भरोई गेआ; कने सुअर्गे च इक्क सिंहासण दिख्या, जिस पर कोई बैठेया ऐ।

³जेह्ड़ा तिस पर बैठेया था, सैह़ कीमती यशब कने माणिक्य पत्थरां साइआं दुस्सा दा था, कने तिस सिंहासणे दे चौंन्नी पास्से कीमती मरकत पत्थरे साइआं इक्क सतरंगी धनुष दुस्सा दा था।

⁴तिस सिंहासणे दे चौंन्नी पास्से चौबी सिंहासण थे; कने इन्हां सिंहासणा पर चौबी स्याणे चिट्टे कपड़े पैहनी नैं बैठेयो थे, कने तिन्हां दे सिरां पर सोन्ने दे मुकट थे।

⁵तिस सिंहासणे ते बिजलियां कने गड़ाके निकल़ा दे थे, कने सिंहासणे सामणै अग्गी दे सत दीय्ये बल़ा दे थे, जेह्ड़े परमात्मे दियां सत आत्मां हन,

⁶कने तिस सिंहासणे सामणै सीशे दे समुंदरे साइआं इक्क फर्स था। कने एह़ बड्डा सिंहासण तिन्हां सारियां चीज्जां दे गब्बैं था, कने तिसदे चौंन्नी पास्से चार जिन्दे प्राणी थे, जिन्हां दे गांह भी कने पचांह़ भी अखीं ई अखीं थियां।

⁷पैहल्ला प्राणी शेरे साइआं था, कने दूआ प्राणी बेड़ूये साइआं था, त्रीये प्राणिये दा मुँ माणुये साइआं था, कने चौथा प्राणी उड्डदे बाज्जे साइआं था।

⁸चौंन्नी प्राणियां दे छे-छे पंख थे, कने तिन्हां दे चौंन्नी पास्से कने तिन्हां दे पंखा दे थल्लैं भी अखीं ई अखीं थियां; कने सैह़ रात दिन बगैर अराम कित्यो एह़ ग्लांदे रैंह्दे थे, “पवित्र, पवित्र, पवित्र प्रभु सर्वशक्तिमान परमात्मा! जेह्ड़ा हमेसा था कने जेह्ड़ा ऐ कने जेह्ड़ा ओणे आल़ा ऐ।”

⁹ताह़लू सैह़ प्राणी तिसदी महिमा कने आदर कने धन्यावाद करगे। जेह्ड़ा सिंहासणे पर बैठेया ऐ, कने जेह्ड़ा जुगा-जुग जिन्दा ऐ।

¹⁰ताह़लू सैह़ चौबी स्याणे सिंहासणे पर बैठणे आल़े सामणै गोड्डेयां दे भार बेई नैं तिसियो प्रणांम करगे, जेह्ड़ा जुगा-जुग तिकर जिन्दा ऐ; कने सैह़ अपणे-अपणे मुकटां जो सिंहासणे सामणै रखी करी एह़ ग्लांगे, कि

¹¹“अहां दे प्रभु कने परमात्मा, तू ई महिमा कने आदर कने सामर्थी जोग्गा ऐ, क्जोकि तैंईं सारियां चीज्जां बणाईयां कने एह़ सारियां तेरिया इच्छा ते बणाईयां कने इन्हां दा बज्जूद था।”