Read Kangri प्रकाशितवाक्य 5 Bible Online

प्रकाशितवाक्य 5 - Kangri bible

प्रकाशितवाक्य 5

¹जेह्ड़ा सिंहासणे पर बैठेया था, मैं तिसदे सज्जे हत्थे च इक्क कताब दिक्खी जेह्ड़ी अंदरे ते कने बाहरे ते लिखियो थी, कने जेह्ड़ी सत सील्लां लगाई करी बंद कित्तियो थी।

²भिरी मैं इक्क ताकतवर सुअर्गदूते जो दिख्या जेह्ड़ा जोरे नैं एह़ ग्लादा था, “इसा कताबा जो खोलणे कने तिसा दियां सील्लां तोड़णे दा हक्क कुसिया अल्ल ऐ?”

³अपर ना सुअर्गे च, ना धरतिया पर, ना धरतिया दे थल्लैं कोई भी तिसा कताबा जो खोलणे आल़ा या तिसा जो पढ़णे जोग्गा था।

⁴ताह़लू मैं जोरे-जोरे नैं रोणा लग्गा, क्जोकि तिसा कताबा जो खोलणे आल़ा या तिसा जो पढ़णे जोग्गा कोई नीं मिल्ला।

⁵इसा गल्ला पर तिन्हां स्याणेयां ते इक्क मिन्जो नैं ग्लाणा लग्गा, “मत रो; दिक्ख, यहूदा दे गोत्रे दा सैह़ शेर जेह्ड़ा राजा दाऊदे दे वंशे ते ऐ, तिन्हीं तिसा कताबा जो खोलणे कने तिसा दियां सतां सील्लां जो तोड़णे तांई सैताने जो हराई दित्या ऐ।”

⁶ताह़लू मैं तिस सिंहासणे कने चौंन्नी प्राणियां कने तिन्हां स्याणेयां दे गब्बैं, मन्ना इक्क बलिदान होएया मेम्ना खड़ोत्या दिख्या। तिसदे सत सींग कने सत अखीं थियां; एह़ परमात्मे दियां सत आत्मां हन जेह्ड़ियां सारिया धरतिया पर घल्ली दित्तियां हन।

⁷मेम्ने गांह आई करी तिसदे सज्जे हत्थे ते जेह्ड़ा सिंहासणे पर बैठेया था, तिसा कताबा जो लेई लेआ।

⁸जाह़लू तिन्हीं कताबा जो लेई लेआ, तां सैह़ चारो प्राणी कने सैह़ चौबी स्याणे तिस मेम्ने सामणै गोड्डे भार पेई गै। कने तिन्हां च हर इक्की दे हत्थे च बीण कने धूपे नैं भरोयो सोन्ने दे कटोरे थे, जेह्ड़े लोकां दिया प्रार्थना दे पास्से इसारा करदे हन।

⁹सैह़ एह़ नौआं गीत गा थे, “इसा कताब जो लैणे दा, कने इसा दियां सील्लां खोलणे दा हक्क तिज्जो अल्ल ऐ, क्जोकि तू इक्क मेम्ने साइआं बलिदान होई करी अपणे खूने नैं हर इक्क गोत्र, भासा, देस कने जातिया ते परमात्मे तांई लोकां जो खरीदी लेआ ऐ;

¹⁰कने तिन्हां जो अहां दे परमात्मे तांई इक्क राजे कने याजक बणाया; कने सैह़ धरतिया पर राजे साइआं राज्ज करगे।”

¹¹जाह़लू मैं दुवारी भिरी दिख्या, तां मैं तिस सिंहासणे कने तिन्हां प्राणियां कने तिन्हां स्याणेयां दे चौंन्नी पास्से मते सारे सुअर्गदूतां दी उआज़ सुणी, जिन्हां दी गिणती लखां कने करोड़ां दी थी,

¹²कने सैह़ जोरे-जोरे नैं एह़ ग्लांदे थे, “धन ऐ सैह़ मेम्ना जिसदा बलिदान कित्ता गेआ। क्जोकि तिसदिया सामर्थी, ताकत आदर, कने महिमा दिया बज़ाह ते अहां जो तिसदी स्तुति कने धन्यावाद करणा चाइदा।”

¹³भिरी मैं सुअर्गे च कने धरतिया पर कने धरतिया थल्लै कने समुंदरे दी सारी बणाईयां चीज्जां जो, कने सब कुच्छ जेह्ड़ा तिन्हां च ऐ, एह़ ग्लांदे सुणेयां, कि “मेम्ने दी कने तिसदी, जेह्ड़ा सिंहासणे पर बैठेया ऐ, स्तुति आदर, महिमा कने राज्ज जुगा-जुग बणी रैंह्।”

¹⁴कने चौंन्नी प्राणियां “आमीन” ग्लाया, कने स्याणेयां गोड्डेयां भार पेई करी तिसियो प्रणांम कित्ता।