Read Kangri प्रकाशितवाक्य 6 Bible Online

प्रकाशितवाक्य 6 - Kangri bible

प्रकाशितवाक्य 6

¹भिरी मैं दिख्या कि मेम्नैं तिन्हां सतां सील्लां ते इक्की सील्ला जो खोलेया; कने तिन्हां चौंन्नी प्राणियां ते इक्की प्राणिये दी बदल़े दे गड़ाकेयां साइआं उआज़ सुणी, “जा हुण गांह बध।”

²तिसी बग्त मिन्जो इक्क चिट्टा घोड़ा दुस्सेया, कने तिसदे हत्थे च, जेह्ड़ा घोड़े पर बैठेया था इक्क धनुष था; कने तिसियो इक्क मुकट पैहनाया गेआ, कने सैह़ सुअर्गे ते निकल़ी करी इक्क जीत्त हासल कित्तेयां साइआं चली गेआ, तांजे धरतिया पर भिरी जीत्त हासल करी सकैं।

³जाह़लू मेम्नैं दूई सील्ल खोली, तां मैं दूये प्राणिये जो एह़ ग्लांदे सुणेया, “जा हुण गांह बध।”

⁴भिरी इक्क होर घोड़ा दुस्सेया, जेह्ड़ा अग्गी साइआं लाले रंगे दा था; तिसियो जेह्ड़ा तिस घोड़े पर बैठेया था इक्क बड्डी तलवार दित्ती गेई कने तिसियो धरतिया ते सांतिया जो दूर करणे दा हुक्म दित्ता, कि लोक इक्की दूये दा खून करन।

⁵जाह़लू मेम्नैं त्री सील्ल खोली, तां मैं त्रीये प्राणिये जो एह़ ग्लांदे सुणेया, “जा हुण गांह बध।” कने तिसी बग्त मिन्जो इक्क होर काल़ा घोड़ा दुस्सेया; तिसदे हत्थे च जेह्ड़ा घोड़े पर बैठेया था इक्क त्रकड़ी थी।

⁶कने मैं तिन्हां चौंन्नी प्राणियां बिच्च इक्क सब्द एह़ ग्लांदे सुणेया, कि “ओणे आल़े दिनां च बड़ा बड्डा अकाल पोंगा इसतांई इक्क किलो कणक कने त्रै किलो जौं खरीदणे तांई इक्की दिने दी दिहाड़ी बड़ी भरी ऐ, अपर तेल कने अंगूरा दे रसे दा नकसान मत होणा दिंदा।”

⁷जाह़लू मेम्नैं चौथी सील्ल खोली, तां मैं चौथे प्राणिये जो एह़ ग्लांदे सुणेया, “जा हुण गांह बध।”

⁸कने मिन्जो तिसी बग्त इक्क पीले रंगे दा घोड़ा दुस्सेया; जेह्ड़ा तिस घोड़े पर बैठेया था, तिसदा नां मौत्त था, कने मौत्ती दा राज्ज तिसदे पचांह़-पचांह़ ओआ दा था; कने तिसियो धरतिया दे इक्क चौथे हिस्से पर एह़ हक्क दित्ता, कि तलवार, अकाल, मरी, कने धरतिया दे जानवरां दे जरिये लोकां जो मारी दैं।

⁹जाह़लू मेम्नैं पंजमी सील्ल खोली, तां मैं वेदी दे थल्लै तिन्हां दे प्राणा जो दिख्या जेह्ड़ा परमात्मे दे वचने दिया बज़ाह ते कने तिसा गवाहिया दिया बज़ाह ते जेह्ड़ी तिन्हां दित्तियो थी तिन्हां दा वध करी दित्या था।

¹⁰तिन्हां जोरे-जोरे नैं ग्लाया, “हे पवित्र कने सच्चे प्रभु; तू धरतिया दे तिन्हां बुरे लोकां जो सज़ा दैणे तांई इतणी देर क्जो करा दा ऐ? अहां तिज्जो नैं विणती करदे हन, कि तू तिन्हां लोकां नैं अहां दा बदला लै जिन्हां अहां दा खून कित्या ऐ।”

¹¹तिन्हां च हर इक्की जो चिट्टा कपड़ा दित्ता गेआ, कने तिन्हां नैं ग्लाया गेआ कि होर थोड़ी देर तिकर इन्तजार करा, क्जोकि तुहां दे कुच्छ होर भी संगी साथी कने बसुआसी भाऊ हन, जिन्हां दा खून भी तुहां साइआं कित्ता जांगा। जाह़लू तिन्हां दी जिन्हां दा खून कित्या गिणती पूरी होई जांगी, सिर्फ ताह़लू ई मैं बदला लैंगा।

¹²जाह़लू मेम्नैं छेमी सील्ल खोली, तां मैं दिख्या कि इक्क बड्डा हिल्लण होएया, कने सूरज कम्बले साइआं काल़ा कने पूरा चन्द्रमा खूने साइआं लाल होई गेआ।

¹³अम्बरे दे तारे धरतिया पर इआं पै जिंआं बड्डे तफाने नैं हिल्ली करी धूड़े दे रूखे ते कच्चे फल़ झड़दे हन।

¹⁴अम्बर इआं गायब होई गेआ जिंआं इक्क कागज लपेटया जांदा ऐ। कने हर इक्क प्हाड़ कने टापू अपणी-अपणी जगाह ते खिसकी गेआ।

¹⁵इसदा नतीजा एह़ होएया, कि धरतिया दे राजे, प्रधान, अधिकारी, दौलतमंद, ताकतवर लोक, हर इक्क दास कने हर इक्क अजाद प्हाड़ां दियां गुफां च कने चट्टाना च जाई लुक्के,

¹⁶कने प्हाड़ां कने चट्टाना नैं ग्लाणा लग्गे, “अहां जो ढक्की लेआ; तांजे सैह़ जेह्ड़ा सिंहासणे पर बैठेया ऐ, अहां जो नीं दिक्खी सकैं, कने मेम्ने दिया सज़ा ते बची सकन।

¹⁷क्जोकि तिन्हां दिया सज़ा दा डरौणा दिन आई रेह्आ ऐ, कने कोई भी इसा सज़ा ते बची नीं सकगा।”