Read Kangri प्रकाशितवाक्य 7 Bible Online

प्रकाशितवाक्य 7 - Kangri bible

प्रकाशितवाक्य 7

¹इसते बाद मैं धरतिया दे चौंन्नी कुणेयां पर चार सुअर्गदूत दिक्खे। जेह्ड़े धरतिया दे चौंन्नी पास्से ते ओणे आल़ी हौआ जो रोकी करी खड़ोत्यो थे। तांजे धरतिया या समुंदरे या कुसी रूखे च हौआ नीं चल्लैं।

²भिरी मैं इक्क होर सुअर्गदूते जो जिन्दे परमात्मे दी मोहर लेई करी पूरब दिसा ते ऊपरेयो ओंदे दिख्या; तिन्हीं तिन्हां चौंन्नी सुअर्गदूतां नैं जिन्हां जो धरती कने समुंदरे दा नकसान करणे दा हक्क दित्या था, जोरे नैं ग्लाया,

³“जाह़लू तिकर अहां अपणे परमात्मे दे दासां दे मत्थे पर मोहर नीं लगाई दैन, ताह़लू तिकर धरतिया दा, समुंदरे दा कने रूखां दा नास मत करदा।”

⁴कने जिन्हां पर मोहर लगाईयो थी मैं तिन्हां दी गिणती सुणी, इस्राएल देसे दियां औलादी दे सारे गोत्रां च इक्क लख चौताली हज़ार लोकां पर मोहर लगाई:

⁵यहूदे दे गोत्रे च बाराह हज़ार लोकां पर मोहर लगाई; रूबेन दे गोत्रे च बाराह हज़ार लोकां पर, गाद दे गोत्रे च बाराह हज़ार लोकां पर, आशेर दे गोत्रे च बाराह हज़ार लोकां पर, नप्ताली दे गोत्रे च बाराह हज़ार लोकां पर, मनश्शिह दे गोत्रे च बाराह हज़ार लोकां पर, शमौने दे गोत्रे च बाराह हज़ार लोकां पर, लेविये दे गोत्रे च बाराह हज़ार लोकां पर, इस्साकार दे गोत्रे च बाराह हज़ार लोकां पर, जबूलून दे गोत्रे च बाराह हज़ार लोकां पर, यूसुफे दे गोत्रे च बाराह हज़ार लोकां पर, कने बिन्यामीन दे गोत्रे च बाराह हज़ार लोकां पर मोहर लगाई।

⁹इसते बाद मैं दिख्या, कि लोकां दी इतणी बड्डी भीड़ थी, कने कोई भी तिसा जो गिणी नीं सकदा था, तिसा भीड़ा च हर इक्क देस, गोत्र, जाति कने भासा दे लोक थे, कने सैह़ चिट्टे कपड़े पैहनी करी कने अपणे हत्थां च खजूरे दियां डाल़िआं लेई करी सिंहासणे सामणै कने मेम्ने सामणै खड़ोत्यो थे।

¹⁰कने जोरे-जोरे नैं डड्डी करी ग्लांदे थे, “उद्धारे तांई अहां दे परमात्मे दी, जेह्ड़ा सिंहासणे पर बैठेया ऐ, कने मेम्ने दी जय-जयकार होयैं।”

¹¹कने सारे सुअर्गदूत, तिस सिंहासणे, कने स्याणेयां कने चारों प्राणियां दे चौंन्नी पास्से खड़ोत्यो थे; भिरी सैह़ सिंहासणे सामणै गोड्डेयां भार पेई गै कने परमात्मे जो प्रणांम करी नैं ग्लाणा लग्गे,

¹²“आमीन। अहां दे परमात्मे दी स्तुति, महिमा, ज्ञान, धन्यावाद, आदर, सामर्थ कने ताकत जुगा-जुग बणी रैंह्। आमीन।”

¹³इसा गल्ला पर स्याणेयां च इक्की मिन्जो नैं ग्लाया, “एह़ चिट्टे कपड़े आल़े कुण हन? कने कतांह ते आएयो हन?”

¹⁴मैं तिस नैं ग्लाणा लग्गा, “हे मालक, मिन्जो नीं पता अपर तू ई जाणदा ऐ।” तिन्हीं मिन्जो नैं ग्लाया, एह़ सैह़ लोक हन, जिन्हां दी मौत्त बड़े दुख झेलणे दिया बज़ाह ते होईयो थी कने जिन्हां मेम्ने दे बलिदाने दे जरिये परमात्मे दिया नजरा च अपणे आप्पे जो पवित्र करी लेआ ऐ।

¹⁵इसतांई “सैह़ परमात्मे दे सिंहासणे सामणै हाजर हन, कने सैह़ दिन-रात अपणे घरे च परमात्मे दी सेवा करदे हन, कने जेह्ड़ा सिंहासणे पर बैठेया ऐ, सैह़ तिन्हां बिच्च रैंह्गा कने तिन्हां दी देखभाल करगा।

¹⁶सैह़ भिरी भुखे कने प्यासे नीं हुंगे; कने ना तां सूरजे दी गर्मी तिन्हां जो जल़ांगी, ना तां कुसी होर तपसा नैं झुलसगे।

¹⁷क्जोकि मेम्ना जेह्ड़ा सिंहासणे दे बिच्च खड़ोत्या ऐ तिन्हां दी रखवाल़ी करगा, ठीक तिंआं ई जिंआं इक्क गुआल़ा अपणियां भेड्डां दी रखवाल़ी करदा ऐ; ‘कने सैह़ तिन्हां जो तिस पांणिये दे छरुड़ूये अल्ल लेई जांगा, जेह्ड़ा सदा दी ज़िन्दगी दिंदा ऐ’, ‘कने परमात्मा तिन्हां दे सारे दुखां जो दूर करी दिंगा।’”