Read Kangri प्रकाशितवाक्य 9 Bible Online

प्रकाशितवाक्य 9 - Kangri bible

प्रकाशितवाक्य 9

¹ताह़लू पंजमे सुअर्गदूतैं तुरही बजाई, तां मैं सुअर्गे ते धरतिया पर इक्क तारा टिरदा दिख्या, कने तिसियो इक्क चाबी अथाह कुंडे[5] दी चाबी दित्ती।

²तिन्हीं अथाह कुंड खोलेया, कने कुंडे च बड्डिया भट्ठिया साइआं धुआं उठेया, कने तिस कुंडे दे धूयें दिया बज़ाह ते सूरज, कने अम्बर काल़ा होई गेआ।

³तिस धूयें नैं धरतिया पर टिड्डियां निकल़ियां, कने तिन्हां जो धरतिया दे डंग्गुआं साइआं डसणे दी ताकत दित्ती गेई।

⁴तिन्हीं ग्लाया कि ना तां धरतिया दे घाऐ जो, ना कुसी हरियालिया जो, ना कुसी रूखे जो नकसान पजा, सिर्फ तिन्हां माणुआं जो नकसान पजा जिन्हां दे मत्थे पर परमात्मे दी मोहर नीं ऐ।

⁵कने तिन्हां जो लोकां जो जान्नी ते मारने दा नीं अपर पंज मीहने तिकर दर्द दैणे दा हक्क दित्या। कने तिन्हां दी दर्द ऐदई थी जिंआं डंग्गु दे डंग मारने ते माणुये जो हुंदी ऐ।

⁶तिन्हां दिनां च माणु मौत्ती जो तोपगे, अपर सैह़ मरी नीं सकगे; कने मरने दी इच्छा तां करगे, अपर तिन्हां जो मरने दा कोई रस्ता नीं मिलगा।

⁷तिन्हां टिड्डियां दे अकार लड़ाईया तांई त्यार कित्यो घोड़ेयां साइआं थे, कने तिन्हां दे सिरां पर मन्ना सोन्ने दे मुकट थे; कने तिन्हां दे मुँ माणुआं साइआं थे।

⁸तिन्हां दे बाल़ जणासा दे बाल़ां साइआं लम्मे कने दंद शेरां दे दंदा साइआं मजबूत थे।

⁹तिन्हां लोहे दा कवच पैहनेया था; कने तिन्हां दे पंखा दी उआज़ ऐदई थी जिंआं रत्थां कने मते घोड़ेयां दे दौड़णे दी उआज़ ओंदी थी।

¹⁰तिन्हां दी पूंछ डंग्गुआं दे डंगे साइआं थी, कने तिन्हां जो पंज मीहने तिकर माणुआं जो दुख दैणे दी सामर्थ मिलियो थी, सैह़ तिन्हां दिया पूंछा च थी।

¹¹तिस अथाह कुंडे दा दूत[6] तिन्हां दा राजा था; तिसदा नां इब्रानी भासा च अबद्दोन, कने यूनानी भासा च अपुल्लयोन ऐ।

¹²पैहल्ला खतरा बित्तिया, दिक्खा, हुण इसते बाद दो खतरे होर ओणे आल़े हन।

¹³जाह़लू छेमे सुअर्गदूतैं तुरही बजाई तां सोन्ने दा धूपदान जेह्ड़ा परमात्मे सामणै ऐ तिसदे सींगा ते मैं इक्क ऐदई उआज़ सुणी

¹⁴मन्ना कि कोई छेमे सुअर्गदूते नैं जिस अल्ल तुरही थी, ग्ला दा ऐ, “तिन्हां चौंन्नी दूतां[7] जो जेह्ड़े बड्डी नदी फराता दे कंडे बन्नेयो हन, खोली दे।”

¹⁵तिन्हां चौंन्नी दूतां जो जेह्ड़े तिस बग्त, दिन, मीहने तांई त्यार रखेयो थे, त्रीआ हिस्सा माणुआं दा नास करणे तांई अजाद करी दित्ते गै।

¹⁶तिन्हां दिया सेना दे सवारां दी गिणती बी करोड़ थी; मैं तिन्हां दी गिणती सुणी।

¹⁷मिन्जो इस दर्शने च घोड़े कने तिन्हां दे ऐदेय सवार दुस्से जिन्हां दे कवच अग्गी साइआं लाल, नीलमणि, कने गंधका साइआं पीले थे, कने तिन्हां घोड़ेयां दे सिर शेरां दे सिरां साइआं थे; कने तिन्हां दे मुँ ते अग्ग, धुआं कने गंधक निकल़ादी थी।

¹⁸इन्हां त्रीनी खतरेयां; मतलब अग्ग, धूयें कने गंधक ते, जेह्ड़े तिसदे मुँऐ ते निकल़दे थे माणुआं दा त्रीआ हिस्सा मारी दित्ता।

¹⁹क्जोकि तिन्हां घोड़ेयां दी ताकत तिन्हां दे मुँऐ कने तिन्हां दियां पूंछा च थी; इसतांई कि तिन्हां दियां पूंछा सर्पां साइआं थियां, कने तिन्हां पूंछा दे सिर भी थे कने जिन्हां दे जरिये दर्द दिंदे थे।

²⁰बाक्कि माणुआं जेह्ड़े तिन्हां खतरेयां ते नीं मरेयो थे, अपणे हत्थां दे कम्मां ते मन नीं बदलेया, कि दुष्टआत्मां दी, सोन्ने, चाँदी, पित्तल़, पत्थर कने लकड़ी दियां मूर्तियां दी अराधना नीं करन, जेह्ड़ियां ना तां दिक्खदियां, ना सुणदियां, ना चली सकदियां हन;

²¹कने जेह्ड़ा खून, टूणा, ब्यभिचार, कने चोरियां, तिन्हां कित्तियां थियां, तिन्हां ते मन नीं बदलेया।