Read Kapampangan 2 Kings 10 Bible Online

2 Kings 10 - Kapampangan bible

2 Kings 10

¹Atin yang pitung pulung anak a lalaki i Ahab king Samaria. Ginawa yang sulat i Jehu at peparala yang kopia karing pamuntuk da ring siudad, karing pikabaluan a memalen, at karing manibala karing anak nang Ahab. Ngana ning sulat:

²Silatanan da kayu uling ikayu ing manibala karing anak na ning aring kekayung panginuan. At atin kayung kabayu, karwahe, at sandata subali pa king makabakud yang pader ing kekayung siudad.

³Ngeni, pilinan ye ing pekamayap karing anak ning kekayung panginuan, at ya ing ilukluk yu king tronu bilang kayalili nang tata na. Kaybat na nita, idipensa ye nanuman ing malyari.

⁴Oneng liban na la ning takut ding pamuntuk ning Samaria. Ngara, Nung e re malyaring sambutan ding aduang ari, itamu pa kaya?

⁵Inya peparala yang amanu kang Jehu ing talapamahala ning palasyu, ing gobernador ning siudad, ding pikabaluan a memalen, at ding manibala. Ngana ning mensahi: Talasuyu yu kami at pamintuan mi ing nanumang iyutus yu. E mi ya tulutan maging ari ing ninuman, inya gawan yu itang minamayap yu.

⁶Silatanan na lang pasibayung Jehu. Ngana ning kaduang sulat, Nung tune kayung makapanig kanaku at makasadiang mamintu king nanumang iyutus ku, tabtaban yu la batal ding anak nang Aring Ahab at idala yu la ding buntuk da kanaku bukas king Jezreel king anti kaniting oras. Atyu la king pamaningat da ring pikabaluan a memalen ning Samaria ding pitung pulung lalaking anak nang Aring Ahab.

⁷Inyang tinggap de at abasa ing sulat nang Jehu, tibtab da la batal ding pitung pulung anak. Binili da la king basket ding buntuk da at pepadala da la kang Jehu a atyu kanita king Jezreel.

⁸Dinatang ya ing tubud at ngana kang Jehu, Dela da na la ken ding buntuk da ring anak nang Aring Ahab. Kanita inutus nang Jehu, Salesen yu la king aduang tumpuk at ibili ketang pasbul dalan ning siudad; paburen yu la karin angga bukas abak.

⁹Kabukasan, linual ya i Jehu; makatalakad ya arapan da ring tau. Ngana karela, Ala kayung kasalanan king milyari. Aku ing migtangka laban king Aring Joram at ing mekamate. Ninu ring mekamate karen?

¹⁰Sukat yung abalu king ala yang sinabi ing Ginu laban karing lahi nang Ahab a e mo sa metupad. Tiparan na ning Ginu itang pengaku na king kapamilatan na ning talasuyu nang i Elias.

¹¹Inya pete na lang Jehu ding kamaganak nang Ahab a manuknangan king Jezreel. Pete na la naman ding opisyal nang Ahab, ding kakaluguran na, at ding pari. Ala yang tigan mabie.

¹²Kaybat na nita, meko ya i Jehu at minta ya king Samaria. King paglakad na ketang lugal a ausan dang Kampu ding Pastul,

¹³akasalubung na la ring mapilan karing kamaganak nang Aring Ahazia ning Juda. Nganang kinutang karela, Ninu ikayu? Pekibat da, Kamaganak na kaming Ahazia. Papunta kami king Jezreel ban ibie mi ing kagalangan karing anak ning ari at ing imang reyna.

¹⁴Nganang minutus Jehu karing tauan na, Dakpan yu lang mabie! Dekap da la at pete ketang lele na ning kulkul ning Kampu ding Pastul. Apat lang pulu't adua ring pete ra; alang mitagan mabie.

¹⁵Kalako nang Jehu karin, akasalubung ne i Jonadab a anak nang Rekab. Inatu neng Jehu at kaybat kitnan ne. Ngana, Kalupa da ka kaya kapanamdaman at makasadiang sumaup kanako? Pekibat nang Jonadab, Wa. Kanita nganang Jehu, Nung makanyan, iduang me ing gamat mu kanaku. Diwang ne ing gamat na at inalalayan neng Jehu ban makasake ya king karwahe.

¹⁶Nganang Jehu, Tuki ka kanaku ban akit mu nung nu anti karagul ing katapatan ku king Ginu. At miyabe lang miglakbe makasake king karwahe na.

¹⁷Inyang miras na la Samaria, pete na la ngan Jehu ding kamaganak nang Ahab; ala yang tigan mabie. Iti ya ing katuparan na ning sinabi na ning Ginu kang Elias.

¹⁸Kaybat na nita, tinipun na lang Jehu ding memalen na ning Samaria at ngana karela, Ditak mung kasuyuan ing binie nang Ahab kang Baal, oneng aku maragul ing isuyu ku.

¹⁹Ausan yu la ngan ding propeta nang Baal, ding pari na, at ding sasamba kang Baal. Ala kayung kakalinguan metung man karela uling miyain kung maragul a ain-sakripisyu kang Baal. Paten ya ing ninumang e datang. Iti paralan nia mung Jehu uling buri na la ngang paten ding sasamba kang Baal.

²⁰Ngana pang minutus, Mitatag kayung metung a kapulungan para king kapanyamban kang Baal. At memintu la.

²¹Pepabalu re ing utus nang Jehu king mabilug a Israel. Dinatang la ring sasamba kang Baal; ala metung man a e dinalo. Misisiksikan la king templo nang Baal; mitmu yang tau.

²²Nganang Jehu king talaingat imalan a susulud king templo, Dinan mu lang imalan a isulud ding sasamba kang Baal.

²³Kaybat na nita, linub ya king templo nang Baal i Jehu at i Jonadab a anak nang Rekab, at nganang Jehu karing taung atyu karin, Siguraduan yung ala metung man a sasamba king Ginu ing atyu keti; bukud mung ding sasamba kang Baal ilang sukat atyu.

²⁴Kaybat na nita, linub ya i Jehu at i Jonadab ban miyain ain-sakripisyu at ain-a-durulukan. Bayu iti, atin yang tilduan walung pulung guardia king lual ning templo. Nganang minie panabilin karela, Ala kayung paburen a makatakas karing taung pabante ku kekayu. Paten ke ing ninumang magpabaya kekayu.

²⁵Inyang ayari na nang Jehu ing pamiyain karing ain, nganang sinabi karing guardia at opisyal, Lungub na kayu at gisanan yu lang paten. Ala kayung paburen makatakas! Inya linub la at pete do ngan king kapamilatan da ring espada ra, at inugse king lual ding bangke. Kaybat, minta la king kakilubkiluban ning templo nang Baal

²⁶at liwal de ing sagradung asias at silaban de.

²⁷Inya lesak de ing sagradung asias at ing templo nang Baal. Kaybat na nita, gewa reng kasilyas angga na ngening aldong iti.

²⁸King anti kanitang paralan na leko Jehu ing pamanyamba kang Baal king Israel.

²⁹Makanyan man, e na gilutan Jehu ing e mayap a gewa nang Jeroboam a anak nang Nebat a pepasari king pangababad na king pamikasala ning Israel king kapamilatan ning pamanyamba karing gintung biserung baka karin king Betel at Dan.

³⁰Ngana ning Ginu kang Jehu, Uli na ning gewa mung masalese ing matulid king akakit ku at atuparan mu ing heganaganang buri kung malyari kang Ahab at king pamilya na, ding anak mu ila ring lukluk king tronu ning Israel angga king kapat a lahi.

³¹Oneng e na pemintuan Jehu king mabilug nang pusu ing kautusan ning Ginu, ing Dios ning Israel. E na kewanian ing e ustung dapat nang Jeroboam a meging sangkan ning pangababad na ning Israel king pamikasala.

³²Karing dinatang a panaun, pegumpisan neng leti ning Ginu ing gabun a sasakupan ning Israel. Simbut na lang Aring Hazael ning Siria ding Israelita at sekupan ding lugal da

³³manibat king aslagan ning Jordan angga king Aroer ning Ilug ning Arnoning mabilug a Gilead at Bashan nung nu la manuknangan ding tribu nang Gad, Ruben, at ning dane Aslagan ning Manase.

³⁴Makasulat king Istoria da ring Ari ning Israel ing heganaganang depat nang Jehu.

³⁵Mete ya at mikutkut king Samaria. Ing anak nang i Jeoahaz ya ing menalili bilang ari.

³⁶Mig-ari ya i Jehu king Israel kilub ding aduang pulu't walung banua.