Read Kapampangan 2 Kings 16 Bible Online

2 Kings 16 - Kapampangan bible

2 Kings 16

¹King kalabing pitung banua na ning pamag-ari nang Peka a anak nang Remalia kanita ya mig-ari king Juda i Ahaz a anak nang Jotam.

²Idad neng aduang pulung banua kanita, at mig-ari ya king Jerusalem kilub ding labing anam a banua. E mayap ing gewa na king akakit na ning Ginu; e na kalupa ning gewa na ning makatua nang i David.

³Ing tikian na ya ing e mayap dang alimbawa ding mapilan a meging ari na ning Israel. Dilukan ne ing metung nang anak a lalaki bilang ain-sakripisyu antimo ing ugali dang makasumami ding taung tinabi ning Ginu inyang palub na la ring Israelita king gabun a mipangaku.

⁴Miyain yang ain-sakripisyu at dinuluk insenso karing altar a atyu karing mangatas a lugal, karing bunduk-bundukan, at karing balang lalam da ring tanaman.

⁵Lisuban neng Aring Rezin ning Siria at Aring Peka ning Israel ing Jerusalem. Kibkuban de oneng e re simbut i Ahaz.

⁶Kanita ne abawing Aring Rezin ning Siria ing Elat. Tinabi na la ring tau Juda a manuknangan karin. Manibat na kanita at angga na ngeni ding Edomita ila ring manuknangan karin.

⁷Peparala yang tubud i Aring Ahaz kang Aring Tiglat Pileser ning Asiria ban sabian: Tapat mu kung talasuyu. Munta ka keni at iligtas mu ku king ari ning Israel at king ari ning Siria. Lulusuban da ku.

⁸Kinua nang Ahaz ing pilak at gintu king Templo ning Ginu at ing king palasyu ban iregalu king ari ning Asiria.

⁹Inya lisuban ne ning ari ning Asiria ing Damasco. Sekupan ne at pete ne i Aring Rezin, kaybat dela na la king Kir ding bihag.

¹⁰Inyang minta ya king Damasco i Aring Ahaz ban makikit kang Aring Tiglat Pileser, ikit ne ing metung a altar karin. Pepakopia ne ing kabilugan nang planu ning altar at peparala ne kang Uria a pari.

¹¹Inya pepagawa neng Uria ing metung a altar agpang ketang planung ibat king Damasco a peparala nang Aring Ahaz. Pepayari ne bayu ya mekapagbalik ing ari.

¹²Inyang mekapagbalik ne ing ari ibat king Damasco, ikit ne ing altar; lepitan ne at penikan ne,

¹³at miyain yang ain-a-durulukan ampon ain-a-binutil. Subali pa karing ain, tigtug na ing ain-a-inuman at pisik na ing dayang ain-ning-pamisulusulu.

¹⁴Pepalako ne ing altar a tangsu king arap ning Templo ning Ginu at pepabili king dane norti ning altar.

¹⁵Kaybat, nganang minutus Aring Ahaz king paring i Uria, King bayu at maragul a altar mu la iyain ding ain-a-durulukan neng abak at ding ain-a-binutil neng bengi, ding ain da ring tau at ning ari. Ipisik mu king altar ing daya da ring animal a durulukan. Gamitan ke ing altar a tangsu king pamaniawad kausukan king Dios.

¹⁶Tiparan na ngang Uria a pari ing inutus nang Aring Ahaz.

¹⁷Kelag na lang Aring Ahaz ding patungang tangsu at leko na la ding palangganang pipanuasan. Leko nia naman ing maragul a kawang tangsu karing patungang bakang tangsu at binili na la king metung a patungang batu.

¹⁸Pepalako nia naman ing makabukud a luklukan na ning ari king Templo at pepasara ne ing pidadalanan na ning ari neng pupunta ya king Templo ning Ginu. Gewa na ngan iti ban pamatulan ne ing ari na ning Asiria.

¹⁹Makasulat king Istoria da ring Ari ning Juda ing heganaganang gewa nang Aring Ahaz.

²⁰Mete ya i Ahaz at mikutkut ya king kutkutan da ring ari king Siudad nang David. Ing anak nang i Hezekia ya ing menalili bilang ari.