Read Kapampangan 1 Chronicles 19 Bible Online

1 Chronicles 19 - Kapampangan bible

1 Chronicles 19

¹Kalabas na ning mapilan a panaun, mete ya i Nahas a ari na ning Ammon. Ing anak nang i Hanun ya ing menalili bilang ari.

²Nganang David, Kailangan ku namang makipagkaluguran kang Aring Hanun uling meging maganaka ya kanaku i tata na. Inya peparala yang mapilan a tubud i David ban ipayabut kang Aring Hanun ing pamakirame na. Inyang miras na la ring tubud,

³ngara ding manimuna na ning Ammon kang Aring Hanun, Pota isipan yu king pepadala na lang David deting tubud ban makirame kekayu king pangamate nang tata yo? Agyang ditak ali la! Dinatang la ren ba reng ispian ing bansa tamu at kaybat lusuban neng David.

⁴Inya peparakap na lang Hanun ding tubud nang David at pepalabahas ding balbas da ampon pinutut anggang awakan ing susulud dang imalan. Kaybat, pepalakuan na la.

⁵King dine ra e la minuli deting tubud. Inyang abalitan nang David ing milyari peparala yang amanu karela king e la mamako king Jerico at e magbalik anggang e tinubu ing balbas da.

⁶Balu nang Aring Hanun at ding tauan na king mua ya karela i David, inya king halus alagang apat apulung toneladang pilak menupa lang karung panggera at taung sake kareti a ibat king Matas nang Dake ning Mesopotamia at Siria ampon king Maaca at Zoba.

⁷Atlu lang pulu't aduang libu ding inupahan dang karung panggera subali pa karing sundalus na ning ari ning Maaca. Migkampu la malapit king Medeba. Dinatang la naman ding Ammonita a ibat karing karelang siudad at makasadia lang makilaban.

⁸Inyang abalitan nang David iti, tiburan ne i Joab at ding sablang sundalus na ning kayarian.

⁹Linage la ring Ammonita at migpuestu la para king pamakilaban karin king dalan palub king Rabba, ing sentrung siudad da. Migpuestu la naman king malualas a lugal ding aring dinatang ban sumaup karela.

¹⁰Inyang ikit nang Joab king sagupa la ring kalaban da king arap at king kagulutan da, pinili na la ding magaling nang sundalus ning Israel at pinuestu na la arapan da ring sundalus na ning Siria.

¹¹Pepanibala na la ring aliwang sundalus ning Israel kang Abisai a kapatad na at pinuestu na la arap da ring sundalung Ammonita.

¹²Nganang Joab, Nung akit mung masasambut kami karing sundalus na ning Siria, saupan mu kami, at nung akit ku namang masasambut kayu karing sundalus na ning Ammon, saupan da kayu.

¹³E mu painan ing lub mu! Magpakatatag ka! Anggang agyu tamu makilaban tamu para karing kabalen tamu at para karing siudad na ning Dios. Ing kaburian na sana ning Ginu ya ing mapalyari.

¹⁴Sinagupa la ding sundalus na ning Israel a panimunan nang Joab, at memulayi lang tinakas ding kalaban a sundalus na ning Siria.

¹⁵Inyang ikit da lang tatakas deti, tinakas na la naman ding sundalus na ning Ammon kang Abisai a kapatad nang Joab, at minta la king karelang siudad. Kaybat na nita, migbalik ne Jerusalem i Joab.

¹⁶Ikit da ring sundalus na ning Siria king e ra la agyung labanan ding Israelita, inya meniawad lang saklolu karing kayabe rang atyu king lipat na ning Ilug ning Eufrates. Sinaklolu no man ding sundalung panimunan nang Sofac, ing pekapun da ring sundalus nang Hadadezer.

¹⁷Agad mibalita iti kang David at kanita mu rin pepasadia ne ing mabilug nang puersa ning Israel. Lipatan de ing Ilug ning Jordan at pekasadia ra ing sarili da para king pamakilaban.

¹⁸Sinugud la ding Israelita at apayatrasan da la ring kalaban. Mekapate lang pitung libung sundalus a pakasake karung panggera at apat apulung libung sundalus a e makasake kabayu at pati na ing pekapun dang i Sofac.

¹⁹Inyang ikit da ring ari a kakampi nang Aring Hadadezer king mesambut la king puersa ning Israel, sinuku la at mekipagpayapa kang David at meging ipus na la.

²⁰Manibat na kanita e na la bisang sumaup ding tau Siria karing tau na ning Ammon.