Read Kapampangan 1 Chronicles 21 Bible Online

1 Chronicles 21 - Kapampangan bible

1 Chronicles 21

¹Buri nang Satanas ing guluan ne ing Israel, inya inagkat ne i David ban gawang sensus tungkul king bilang da ring memalen.

²Nganang minutus David kang Joab at karing aliwa pang opisyal na, Lumibut kayu king mabilug a Israel, manibat king Beerseba angga king Dan, uling buri kung abalu ing bilang da ring memalen.

³Nganang Joab, Mananu na sanang parakalan na lang dinalan a besis ning Ginu ding memalen na ning Israel kesa king sadia! Makamal a Ari, obat buri yung daptan yan kabang talasuyu yu no man? Buri yung panamdaman na ning mabilug a bansa ing mikasala la?

⁴Oneng ing buri na ning ari ya ing mepalyari, inya linibut ya i Joab king mabilug a Israel at kaybat mibalik ya king Jerusalem.

⁵Minie yang ulat kang Aring David tungkul karing sablang lalaking malyaring gawan sundalus: metung lang milyun at dinalan a libu ring king Israel at apat lang dalan pitung pulung libu ring king Juda.

⁶E na la inabeng Joab ding bilang da ring king tribu nang Levi at Benjamin, uling talagang e ne buring pamintuan ing utus na ning ari.

⁷E ya metula ing Dios king milyari, inya perusan ne ing Israel.

⁸Nganang David king Dios, Mekarapat kung maragul a pamikasala king kapamilatan na ning pamagsensus. Kamulangan ing depat ku. Patawaran mu ku sana.

⁹Kanita ngana ning Ginu kang Gad, ing propeta nang David,

¹⁰Puntalan me i David, at papamilinan meng metung karing atlung bage a ibie ku. At ita ing daptan ku kang David.

¹¹Pintalan neng Gad i David at sinabi na itang pasabi na ning Ginu. Kitnan ne, Isanu kareti ing buri yu:

¹²atlung banua ning danup o atlung bulan a tatakasan mu la ding kalaban o atlung aldo ning salut, at kamatayan king bansa a daptan na ning anghel ning Ginu? Nanu ing pakibat yu a ibie ku king Ginu?

¹³Pekibat nang David, Gipit ing kabilian ku! Oneng e ku buri ing parusan da ku ring tau. Ing Ginu na mismu ing mamarusa kanaku uling malunusan ya.

¹⁴Inya peparala yang salut ing Ginu karing memalen na ning Israel, at pitung pulung libu la ring mete.

¹⁵Kaybat na nita, mitubud yang anghel ing Dios ba neng lasakan ing Jerusalem, oneng migbayu ya isip at ngana king anghel, Tuknang na ka! Makagyu na ita! Makatalakad ya kanita ing anghel ketang pidadaran nang Ornan a Jebuseo.

¹⁶Tinalanga ya i David at ikit neng makatalakad ing anghel ning Ginu pilatan na ning banua at yatu; atin yang tatalnan a espada at makaturu ya king Jerusalem. Inya i David at ding manimuna misulud lang imalan a magaspang at migsakab la king gabun.

¹⁷Nganang menalangin David king Dios, Aku ing minutus a gawan ya ing sensus. Aku ing mikasala oneng nanu wari ing gewa ra deting tau? O Ginung kanakung Dios, aku ing parusan yu ampon ing pamilya ku, at aliwa deting tau.

¹⁸Uli na niti, inutus na ning anghel ning Ginu kang Gad ing sabian na kang David king mitalakad yang altar para king Ginu ketang lugal a pidadaran nang Ornan a Jebuseo.

¹⁹Memintu ya i David king utus ning Ginu king kapamilatan nang Gad.

²⁰Dadara yang trigu kanita i Ornan at ding apat nang anak a lalaki. Sinalikut la inyang ikit de reti ing anghel.

²¹Ikit neng daratang Ornan i David, inya selubungan ne. Dinuku ya bilang pamamie galang king ari.

²²Nganang David, Ipisali mu ne kanaku ing lugal a pidadaran mu ban makapatalakad kung metung a altar para king Ginu, at tuknang na kanita ing salut a makamate. Bayaran ke king alagang buri mu.

²³Nganang Ornan, Kuanan yu ne pu, Makamal a Ari, at gawan yu itang buri yung gawan. Munie ku pa pung baka para dulukan bilang ain-sakripisyu at deting dutung pidadaran ban panangab ampon trigu bilang ain. Ibie ku ngan pu yan kekayu.

²⁴Nganang David, E makanyan. Bayaran ku ngan yan. E ku malyaring iyain king Ginu itang e kanaku, itang bage a e ku pigastusan.

²⁵Inya beyaran neng anam a ralan a pirasung gintu ing pidadaran.

²⁶Mitalakad yang altar karin para king Ginu at minain yang ain-a-durulukan ampon ain-ning-pamisulusulu. Menalangin ya at pekibatan ne ning Dios king kapamilatan na ning api a ibat banua ban dulukan na la ring ain-sakripisyu babo ning altar.

²⁷Inutus na ning Ginu king anghel ing ilako na ne ing espada na, at memintu ya.

²⁸Uli na niting milyari penamdaman nang David king pekibatan na ning Ginu ing panalangin na. Inya minain yang ain-sakripisyu king altar ketang pidadaran nang Ornan.

²⁹Atyu ya king matas a lugal ning Gibeon ing Toldang tuknangan ning Ginu a gewa nang Moises king ilang at ing altar nung nu da la durulukan ding ain.

³⁰Oneng e ya makapunta karin i David ban samba king Dios, uling tatakut ya king espada ning anghel ning Ginu.