Read Kapampangan 1 Chronicles 4 Bible Online

1 Chronicles 4 - Kapampangan bible

1 Chronicles 4

¹Ding aliwa na pang anak Juda ila di Perez, Hezron, Carmi, Hur, at i Sobal.

²I Sobal ya i tata nang Reaia a tata nang Jahat. I Jahat ya i tata da ri Ahumai at Lahad, ding penibatan da ring taung manuknangan king Zora.

³Deti naman ila ding anak nang Etam: Jezreel, Isma, at i Idbas. Hazelelponi ya lagyu ing kapatad dang babai.

⁴I Penuel ya i tata nang Gedor, at i Ezer ya i tata nang Husa. Ila deti ring anak nang Hur, ing pangane anak nang Caleb king asawa nang i Efrata at tata nang Betlehem.

⁵I Asur, ing tata nang Tekoa, atin yang aduang asawa, ila di Hela at Naara.

⁶Mikayanak ya kang Naara; ila di Ahuzam, Hefer, Temeni, at i Haahastari.

⁷At mikayanak ya kang Hela; ila di Zeret, Izar, at i Etnan.

⁸I Koz ya i tata da ri Anub at Zobeba, at ing penibatan da ring lahi nang Aharhel a anak nang Harum.

⁹Ating metung a taung milagyuan Jabez, mas marangal ya kesa karing kapatad na. Pemalagyuan neng Jabez ima na uling tune yang migkasakit inyang beit ne.

¹⁰Oneng nganang menalangin Jabez king Dios ning Israel, Sana bendisyunan mu ku, O Dios, at parakalan mu ing gabun a kakung sasakupan. Patnubayan mu ku at iligtas king nanumang e mayap a munie kaplas lub kanaku. At binie na ning Dios itang inawad na.

¹¹I Caleb, ing kapatad nang Suha, anak ne i Mehir, at i Mehir ya i tata nang Eston.

¹²Ding anak na namang Eston ila ri Betrafa, Pasea, at i Tehina. I Tehina ya i tata nang Nahas. Ila deti ring lalaki na ning Reca.

¹³Ding anak nang Kenaz ila di Otniel at Seraia. Ding anak nang Otniel ila di Hatat at Meonotai.

¹⁴I Meonotai ya i tata nang Ofra. I Seraia ya i tata nang Joab a tata da ring Geharasim. Meyaus la king lagyung anti kaniti uling mangagaling la pangamat king obra.

¹⁵Ding anak nang Caleb a anak nang Jefune ila di Iru, Ela, at i Naam. Ing anak nang Ela ya i Kenaz.

¹⁶Ding anak nang Jehalelel ila di Zif, Zifa, Tiria, at i Asarel.

¹⁷Ding anak nang Ezra ila di Jeter, Mered, Efer, at i Jalon. Ding anak nang Mered king prinsesang i Bitia a anak ning ari ning Ehipto ila di Miriam, metung a babai, at aduang lalakii Samai at i Isba a tata nang Estemoa.

¹⁸Ding anak nang Mered king asawa nang tau Judea ila di Jered a tata nang Gedor; i Heber a tata nang Soco, at i Jecutiel a tata nang Zanoa.

¹⁹Ding anak nang Hodia king kapatad nang babaing Naham ila ding mitatag king Keila a balen da ring Garmiteo at king Estemoa a balen da ring Maacatiteo.

²⁰Ding anak nang Simon ila di Amnon, Rina, Benhanan, at i Tilon. Ding anak na namang Isi ila di Zohet at Bensohet.

²¹Ding anak nang Sela a anak nang Juda ila di Er a tata nang Leca; i Laada a tata nang Maresa, at ding taung gagawang telang linen king Bet Asbea;

²²i Jokim at ding taung manuknangan king Cozeba; at di Joas at Saraf a mekapakiasawa karing babaing tau Moab at kaybat menuknangan na king Betlehem. (Kanita la pang minunang panaun deting listahan.)

²³Ila ding gagawang kuran a susuyu king ari at menuknangan la king balen na ning Netaim at Gedera. fig,Ila ding gagawang kuran a susuyu king ari.,(4:23)fig*

²⁴Ding anak nang Simeon ila di Nemuel, Jamin, Jarib, Zera, at i Saul.

²⁵Anak neng Saul i Sallum, apu ne i Mibsam, at apu ne king tud i Misma.

²⁶Ding anak nang Misma ila di Hamuel, Zacur, at i Simei.

²⁷Labing anam la ding anak nang lalaking Simei at anam la ding babai. Ditak la mu ding anak da ring kapatad na inya e ya meragul ing pamilya nang Simeon antimo ing pamilya nang Juda.

²⁸Menuknangan la king Beerseba, Molada, Hazarsual,

²⁹Bilha, Ezem, Tolad,

³⁰Betuel, Horma, Ziklag,

³¹Bet Marcabot, Hazarsusim, Betbiri, at Saaraim. Ila deti ring karelang tuknangan angga na inyang meging ari ya i David.

³²Sakup da la naman ding siudad ning Etam, Ain, Rimon, Token ampon Asan at

³³pati na ding baryung makapaligid kareti angga na king Baal. Kareting lugal la menuknangan at atin lang sarili dang listahan tungkul karing makatua da.

³⁴Ding lalaking pekapun da ila reti: Mesobab, Jamlek, i Josa a anak nang Amazia,

³⁵Joel, at i Jehu a anak nang Josibias a anak nang Seraia a anak nang Asiel,

³⁶Elioenai, Jaakoba, Jesohaia, Asaia, Adiel, Jesimiel, at i Benaia.

³⁷Meging pekapun ya naman i Ziza a anak nang Sifi a anak Allon. Tata neng Allon i Jedaia a anak nang Simri a anak nang Semaia.

³⁸Ila deti ring pekapun ning karelang lahi. Merakal la,

³⁹inya minta la king aslagan at miras la king kapatagan ning Gedor ban manintun pipagpastulan.

⁴⁰Mekatagpu lang malabung at masanting a pipagpastulan; malualas ya at tahimik a lugal. Lahi na lang Ham ding sadiang manuknangan karin. fig,Ban manintun pipagpastulan.,(4:39)fig*

⁴¹Misulat la deting lagyu da ring lahi inyang kapanaunan nang Aring Hezekia ning Juda. Ila ding linusub karing memalen na ning Meunim; gisan da lang pete at lesak ding toldang tuknangan da. Kaybat na nita, ila na ding menuknangan karin uling gabun yang masanting pipagpastulan para karing sese rang animal.

⁴²Ding limang dalan kareting lahi nang Simeon ila ding linusub karing Bunduk ning Seir. Ding menimuna karela ila di Pelatia, Nearia, Refaia, at i Uziel. Ila deti ring anak nang Isi.

⁴³Gisan da lang pete ding mitagan a Amalekita, at ila ding menuknangan karin angga ngeni.