Read Kapampangan 1 Chronicles 5 Bible Online

1 Chronicles 5 - Kapampangan bible

1 Chronicles 5

¹I Ruben ya ing pangane karing anak nang Israel. Oneng milako kang Ruben ing pangapangane uling sipingnan ne ing metung karing babaing kasese nang tata na. Miyabie kang Jose ing pangapangane.

²Makanyan man, ing tribu nang Juda ya ing mekilalang pamuntuk da ring mikakapatad uling ya ing mekapalto manimuna karing tribu, oneng mangaintulid ing pangapangane kang Jose.

³Ding anak nang Ruben, ing pangane karing anak nang Israel, ila di Enoc, Pallu, Hezron, at i Carmi.

⁴I Joel ya i tata nang Semaia, at i Semaia ya i tata nang Gog. I Gog ya i tata nang Simei a tata nang Mikeas.

⁵I Mikeas ya i tata nang Reaia a tata nang Baal.

⁶I Baal ya i tata nang Beera, ing manimuna da ring lahi nang Ruben a binihag na at pepayugse nang Aring Tiglat Pileser ning Asiria.

⁷Oreti ding kamaganak na agpang king listahan da ring pamilya at lahi a penibatan da: Jeiel at Zacarias, ding manimuna;

⁸i Bela a anak nang Azaz at apu nang Sema. I tata nang Sema ya i Joel. Menuknangan la ding lahi nang Bela king Aroer; mamabut ya king Nebo at king Baal Meon ing sakup dang gabun.

⁹Uli na ning merakal la ding sese rang animal king Gilead, sekupan de ing dane aslagan na ning gabun manibat king ilang a mamabut king Ilug ning Eufrates.

¹⁰Inyang kapanaunan nang Aring Saul, lisuban na la at pete ding memalen a ausan dang Hagriteo. Kaybat sekupan de ing gabun dane aslagan na ning Gilead.

¹¹Menuknangan ya ing tribu nang Gad king dane nang norti nang Ruben king sakup ning Bashan angga king aslagan ning Saleca.

¹²I Joel ya ing manimuna at ing kaduang manimuna ya i Safam. I Janai at i Safat ila ring manimuna ning Bashan.

¹³Ding aliwang kayabe king tribu da ila reti: Mikael, Mesullam, Seba, Jorai, Jakan, Zia, at i Eber. Pitu la ngan.

¹⁴Ila ding lahi nang Abihail a anak nang Huri. I Huri anak neng Jaroa; i Jaroa anak neng Gilead; i Gilead anak neng Mikael; i Mikael anak neng Jesisai; i Jesisai anak neng Jado; at i Jado anak neng Buz.

¹⁵I Ahi, ing anak nang Abdiel at apu nang Guni, ya ing pekapun da.

¹⁶Menuknangan la Bashan at Gilead karing balen da reti ampon karing lugal a pipagpastulan king Sharon. (

¹⁷Ya iti ing listahan a megawa king kapanaunan nang Aring Jotam ning Juda at Aring Jeroboam a Kadua ning Israel.)

¹⁸Atin yang mangatapang a lalaki ing tribu nang Ruben, Gad, at ing tribu nang Manase dane Aslagan. Magaling la king pamangamit kalasag, espada, pana, at king pamakilaban. Apat lang pulu't apat a libu at pitung dalan anam apulu heganagana.

¹⁹Mekilaban la karing Hagriteo ning Jetur, Nafis, at Nodab.

²⁰Menalig la king Dios at menalangin. Pekibatan na ning Dios ing panalangin da at dininan na lang tagumpe karing kalaban dang Hagriteo at ding kakampi ra.

²¹Mekabihag la namang limang pulung libung kamelyu, aduang dalan limang pulung libung tupa, at aduang libung asno. Dinalan a libu la ding abihag dang kalaban.

²²Dakal la ding apate rang kalaban uling kaburian ning Dios ing milyaring labanan. At king lugal a ita karin la menuknangan angga na kanitang miras ing pangayugse ning Israel.

²³Menuknangan ya ing tribu nang Manase dane Aslagan king Bashan angga na king Baal Hermon, Senir, at king Bunduk ning Hermon. Mabilis lang merakal.

²⁴Ding pekapun da ila di Efer, Isi, Eliel, Azriel, Jeremias, Hodavia, at i Jadiel. Mangayap la ngan sundalus at pikabaluan a manimuna.

²⁵Oneng sinalangsang ya iting tribu nang Manase dane Aslagan laban king Dios da ring makatua ra. Sinamba ya karing dios a kikilalanan da ring bansang tinabi na ning Dios.

²⁶Inya ginamit ne ning Dios i Aring Pul ning Asiria (a pikabaluan munaman king lagyung Tiglat Pileser) ban lusuban na la. Binihag na la niti ding memalen na ning Ruben, Gad, at ing tribu nang Manase dane Aslagan; miyugse la at menuknangan angga ngeni king Hala, Habor, Hara, at king pampang ning Ilug ning Gozan.