Read Kapampangan Tobit 1 Bible Online

Tobit 1 - Kapampangan bible

Tobit 1

¹Iti ya ing istoria na ning bie nang Tobit a anak nang Tobiel at apu nang Hananiel ampon apu na king tud Aduel. I Aduel anak neng Gabael at i Gabael anak neng Rafael, at i Rafael anak neng Raguel ning pamilyang Asiel ning tribu nang Neftali.

²Metung ya karing mebihag i Tobit kanitang panaun nang Salmaneser, ing ari ning Asiria, karin king Tisbe dane mauli ning Kedes Neftali ning Matas a Galilea, dane norti ning Hazor, king katalindikingan na ning dalan papunta king albugan dane norti ning Peor.

³Aku i Tobit. Ing katutuan at ing kabanalan ya ing meging eran na ning bie ku. Dinapat kung dakal a mayap a bage para karing kanakung kamaganak, karing kabalen kung kalupa kung bihag king Nineve ning Asiria.

⁴Inyang kayanakan ku at manuknangan king balen kung Israel kanita ya kinawani ing mabilug a tribu nang Neftali a penibatan ku king kayarian nang David at king Jerusalem, ing siudad a mepili karing sablang tribu ning Israel bilang lugal ning pididinan ain. Karin ya mitalaga ban manatili king kapilan pa man ing Templong tuknangan na ning Dios.

⁵Inya ding sabla kung kamaganak king makatua ming i Neftali babie lang ain-sakripisyu king torong kikilalanan dang dios a pepagawa nang Aring Jeroboam ning Israel karin king siudad ning Dan, king kabundukan dane norti ning Galilea.

⁶Aku na mu king pamilya ku ing menatiling pupunta king Jerusalem. Parati kung tatagunan ing nanumang piesta karin uling iti ya ing alang anggang kautusan a mitakda para karing sablang Israelita. Darala ku la ding mumunang bunga na ning pupul ku, ding mumunang anak da ring sese kung animal, at ing bayung gupit a lana ibat karing tupa, at ing kapulung dake ning penakitan ku. Babie ku iti karing pari a lahi nang Aaron ban iyain king altar.

⁷Babie ku munaman karing Levitang susuyu king Jerusalem ing kapulu nang dake ning pupul ku king alak, king larung olibo, ding bunga ding tanaman a pomegranate at higera, at aliwa pang bunga da ring tanaman ku. Babie ku munaman karin ing kadua kung kapulung dake subali mu neng miras ing mitalagang banua ning pamagpaynawa ning gabun. Pupunta ku Jerusalem at babie ku ing kaduang kapulung dake ning penakitan ku karing ulila at mebalu ampon karing meyagkat na at milapit a lub king Israel.

⁸Oneng karas ning katlung banua, ibie ke kareti ing katlung pamamie kung kapulung dake ning penakitan ku at miyabe-abe kaming mamangan antimo ing aduan na ning Kautusan nang Moises at king panabilin nang Debora a ima ning ingkung kung i Hananiel. (Ulila na ku uling mete ne i tata kung i Tobiel.)

⁹Inyang miras na ing idad a makiasawa ku, kesal ke i Ana a kalupa kung miembru king tribu mi. Mekayanak kaming lalaki; Tobias ya lagyu.

¹⁰E miglambat mebihag ku at miyugse king Asiria. Makanyan kung mekapanuknangan king Nineve. Kabang manuknangan ke karin ding kamaganak kung kalupang miyugse at ding kalupa kung Judio, mebiasa lang mamangan king pamangan da ring paganu,

¹¹oneng aku ali ku,

¹²uli na ning katapatan ku king Kakataskatasan a Dios.

¹³Uli na niti, aluguran na kung Aring Salmaneser at aku ing pigkatiwalan nang maniali king sablang kailangan na.

¹⁴Iti ing sangkan nung inya maralas kung pupunta king Media ban saluan ing kailangan ning ari. Inyang misan a atyu ku king siudad ning Rages ning Media, penilas ku la ding suput a mitmung salaping pilak king kamaganak kung i Gabael a anak ning bapa kung i Gabrias. Titimbang lang anam a ralan a libra deting salapi.

¹⁵Inyang mete ne i Aring Salmaneser, ing meging ari ya ing anak nang i Senakerib. Manibat na kanita e na ku minta king Media uling meging mapanganib ing pamaglakad karing dalan ning Media.

¹⁶Inyang i Salmaneser ya ing ari, dakal a mayap a bage ing arapat ku karing kabalen ku.

¹⁷Dekayanan ku la king pamangan ku at dininan imalan ding lubas. Kitkut ku la ding ikit kung mete kalahi ku king lual ning Nineve.

¹⁸Misan a aldo, migsalita yang kalapastanganan i Aring Senakerib laban king Dios a Ari ning Banua. Uli na niti, perusan ne i Senakerib at tinakas ya king Juda. King pamanuli na king Media at king mua na pepate na la ding dakal a Israelita. Oneng lihim ku lang kinua ding bangke at kitkut ku la. Iti ing sangkan nung inya e na la ikit Senakerib ding mete inyang papaintun na la.

¹⁹Oneng ating tau Nineve ing sinumbung king aku ing mengutkut. Uli na niti, mimua ya kaku ing ari. King takut ku sinalikut ku.

²⁰King mua ning ari, kinua na ngan ing pibandian ku at inabe king bandi ning kayarian subali mu king asawa kung i Ana at ing anak kung i Tobias.

²¹Kalabas da ring anam a dominggu pete re i Senakerib ding adua karing mismung anak na, at kaybat tinakas la deting anak na at minta king kabundukan ning Ararat. Ing meging ari ya i Esarhadon, ing metung na pang anak Senakerib, at kinua ne ing pangunakan kung i Ahikar a anak nang Anael a kapatad ku bilang katiwala king sablang pibandian ning kayarian.

²²Iti ya ing kadua nang besis pangatulduan katiwala king alak, talaingat bandi, at king panatak ning ari ampon talaingat uling tilduan na neng minunang Senakerib kanitang mabie ya pa. Sinaupan na ku niting pangunakan ku at peintulut na ning bayung ari ing makapagbalik ku Nineve.