Read Kapampangan Tobit 10 Bible Online

Tobit 10 - Kapampangan bible

Tobit 10

¹Samantala, mainip ne i Tobit. Bibilangan na la ding aldo uling e migbalik ing anak nang i Tobias king mitakdang aldo.

²Nganang Tobit, Obat ala yu pa? Marahil e re buri pang muli o magkang mete ne i Gabael at alang makibalu karing salaping penilas ku.

³Tune yang migaganaka i Tobit.

⁴Nganang Ana a asawa na, Mete ne ing anak ku! Ala ne! At megumpisa yang menangis at menagulele king anak na.

⁵Ngana, O ing anak ko, ing ligaya ning bie ko! Obat kaya peintulutan da ka pang meko?

⁶Inaru neng Tobit at ngana, Magpayapa ka, asawa ko. E ka migaganaka; mabie ya pa ing anak mu. Marahil atin mung milyari karin a e ra apangilagan. Kamaganak ta ya ing kayabe na at tau yang apagkatiwalan. E me pigaganakan. E lumuat muli ya mu rin.

⁷Oneng ngana ning asawang babai, Patugut ka! Lakuan mu ku. E mu na ku lulokuan. Mete ne ing anak ku! Balang aldo, manibat na kanita, lulual ya at makalawe ya patitingapun king dalan a lekaran ning anak na. E ya mipapatudtud at kabukabukas yang manangis at managulele. Mepupus ing aduang dominggung pamagtau king kasal a tikda nang Raguel para king anak nang i Sarah. Kaybat na nita, pintalan neng Tobias ing katuangan nang i Raguel at ngana, Paintulutan yu na ku sanang muli keta kekami uling panamdaman ku king pigaganakan da na ku ding pengari ku. Paburen yu na ku sanang muli. Abanggit ku na kekayu ing kabilian nang tata ku bayu ku meko.

⁸Nganang Raguel, E ka pa mumuli; antabayanan mu ku pa. Mitubud kung tau kang tata mu ban ibalita da king atyu ka king masanting a kabilian.

⁹Oneng nganang Tobias, Ali pu. Paintulutan yu na ku sanang muli.

¹⁰Nganang Raguel, Muli na ka. Ituki me i Sarah. Idala mu na naman ing kapitna king pibandian ku, ding ipus a lalaki at babai, ding baka, tupa, asno, at kamelyu. Idala mu na naman ing kapitna karing salapi ku, imalan, at ding mueblis.

¹¹Inatad na lang Raguel angga king dalan. Bayu la meko, ngana kang Tobias, Angga keng mikit katang pasibayu, anak ku. Miras kayu sana keta kekayu king alang kasasagkulan. Mananu na sanang bendisyunan na kayu ning Ginu ning banua, at mananu na sanang akit ku la pa ding maging anak yu.

¹²At ngana kang Sarah, Papunta ka ngeni karing katuangan mu; tunggen mu lang tune mung pengari at tune rang anak. Sulung, anak ko, mako na kayung payapa. Sana mayap a balita ing parati kung ababalitan tungkul keka kabang mabie ku. Kaybat nang memun pepalakuan na na la.

¹³Bayu la melaus, nganang Edna kang Tobias, Tobias, anak ko, iras na kayu sanang ligtas ning Ginu king bale yu. Akit ku la sana king bie ku ding maging anak yu. King daramdaman ning Ginu, ipanabilin ke keka ing anak kung i Sarah. E ka sana darapat nanumang makapanasakit kang Sarah kabang bie mu. Manibat na ngeni aku i ima mu at i Sarah ya ing asawa mung pakamalan. Mako na kayung payapa. Sana bendisyunan na katamu ning Dios kabang bie tamu. Inuma na lang Edna at kaybat na nita meko na la.