Read Kapampangan Tobit 11 Bible Online

Tobit 11 - Kapampangan bible

Tobit 11

¹Masaya yang masaya i Tobias inyang meko ya. Pepasalamatan ne ing Ginu ning banua at yatu, ing Ari ning meto yatu, uling meging matagumpe ing lakad na. At nganang mengaku kang Raguel a katuangan na, Pangaku ku king galangan da kayu at i imang Edna kabang mabie ku. Inyang malapit na la king siudad ning Kaserin a malapit king Nineve,

²nganang Rafael kang Tobias, E makalingad keka ing kabilian nang tata mu bayu kata meko.

³Muna ta na king asawa mu ban makapagsadia kata king bale bayu la miras karin ding aliwa.

⁴Inya migpauna na la ilang adua. Kabang maglakad la nganang Rafael kang Tobias, E me sa kakalinguan ing atdu ning asan. Sinulung lang abe ra ing asu nang Tobias.

⁵Makalukluk ne naman kanita lele ning dalan i Ana a ima nang Tobias, at antimo ing sadia nang daraptan, panenayan neng datang ing anak na.

⁶Kabudabud ikit neng daratang i Tobias at nganang kinulait king asawa nang i Tobit, Daratang ne i Tobias at ing lalaking kayabe na!

⁷Bayu ne ikit Tobias i tata na, nganang Rafael, Manakit na lang pasibayu ding mata nang tata mu.

⁸Ikaskas me karing mata na ing atdu ning asan ban maulu ing maputing tatakap karing mata na. Murung la kanita ding tatakap king mata na at abaklas mu la. Manakit ne kanita i tata mu.

⁹Memulayi yang sinalubung i Ana king anak na; kinaul ne at ngana, Ay salamat ikit da ka pang mabie. Ngeni malyari na kung mate. At mipakiak ya king tula na.

¹⁰Mengasakabsakab ya i Tobit king pamamalagua nang lumual king bale ban salubungan ne ing anak na.

¹¹Lepitan neng Tobias i tata na kabang tatalnan ne ing atdu ning asan. Lebulan ne mata i tata na at ngana, Tatang, manakit na kang pasibayu ngeni.

¹²Kaniti kiskas ne ing atdu ning asan a panulu karing mata nang tata na.

¹³King kapamilatan da ring gamat na bikbak nang Tobias ing maputing tatakap manibat karing suluk da ring mata nang tata na.

¹⁴Kinaul neng Tobit i Tobias at mipakiak ya king tula. Kaybat nganang migsalitang masikan, Akakit da ka, anak ko a sala ding mata ko! Ngana pang Tobit: Pasalamatan ya ing Dios; purian ya uli ning degulan ning upaya na! Purian la ngan ding sablang anghel na. Manatili na katamu sanang bibendisyunan. Purian lang sabla nang anghel king kapilan pa man.

¹⁵Dininan na kung kapanamdaman, oneng melunus ya kaku, at ngeni kaku yang akakit ing anak kung i Tobias! Melaus ya bale i Tobias a mitmung tula at kapasalamatan king Dios. Belita na kang tata na ing tagumpe ning lakad na, ding salaping inuli na, at nung makananu neng ayasawa i Sarah a anak nang Raguel. Ngana pa, Datang ne kanyan.

¹⁶Kaybat na nita, linual ya i Tobit ban salubungan ne ing manuyang na karin king pasbul dalan ning siudad. Masaya yang masaya at pupurian ne ing Dios. Mengapamulala la ding menakit kang Tobit kabang sasalubung ya uling akakit na na ing daralanan na.

¹⁷Pepasalamatan neng Tobit ing Dios at sinabi na karing tau nung makananu neng linusan ning Dios at binalik a panimanman. Inyang mikit lang Sarah a manuyang na, selubungan ne at ngana, Malaus ka, anak ko. Purian ya ing Dios uling inatad na ka kekami. Bendisyunan ne sa ning Dios i tata mu at antimu rin ika at ing anak kung i Tobias. Malaus ka anak king bayu mung tuknangan. Sana manatili kang ating masanting a pamikakatawan at matula. Malaus ka, anak! Metung yang maligayang aldo ing aldong ita para karing Judiong manuknangan king Nineve.

¹⁸Dinatang ya i Ahikar at i Nadab, ding pangunakan nang Tobit, ban makiabe king ligayang miras kang Tobit.