Read Kapampangan Tobit 12 Bible Online

Tobit 12 - Kapampangan bible

Tobit 12

¹Inyang meyari na ing kasayahan, inaus neng Tobit i Tobias a anak na. Ngana, Tobias, e me kakalinguan babayaran ing taung akayabe mu king pamaglakbe. Dagdagan mu ing ibayad mu.

²Kitang nang Tobias, Magkanu pu ing ibayad ku? Ibie ku agyang ing kapitna da ring salaping inuli mi.

³E na ku pepaburen; inuli na kung e ninanu balang. Ya ing minta kang Gabael ban kuanan na la para kanaku ding salaping penilas yu. E mu ita ing depat na, tinabi ne ing demonyung manligalig king asawa ku at inulu na la ding mata yu. Nu anti ing idagdag ku king upa nang Rafael?

⁴Pekibat nang Tobit, Ibie mu ing kapitna king inuli yu keti. Katuliran na ita.

⁵Kanita inaus neng Tobias i Rafael at ngana, Abe, tanggapan mu ing kapitna king pibandian a inuli ta keti. Keka yan. Malyari na kang muli keta kekayu. Dakal a salamat king saup mu.

⁶Nganang Rafael kari Tobit at Tobias, Purian ye at pasalamatan ing Dios at sabian yu karing sablang tau ing depat nang mayap kekayu ban parangalan dia naman at pagkantang himno. Kailangan ing abalu da ring sabla ing depat nang mayap ning Dios. E kayu tutuknang pupuri at pasalamat king Dios.

⁷E sukat paniabian ing lihim ning ari, ngana pang Rafael, oneng kailangan paniabian ing dapat nang mayap ning Dios ban parangalan de at purian ding tau. Daptan yu ing mayap at alang marok a miras kekayu.

⁸Mas mayap ing manalangin taimtim at ing paligayan ya ing Dios king kapamilatan na ning pamamie limus karing kalulu kesa king magpakabandi ka king e ustung paralan. Mas mayap ing munie limus kesa king tumipun kang gintu.

⁹Iligtas na ka ning pamaglimus king kamatayan at linisan king sablang kasalanan.

¹⁰Oneng ing maigpit nang kalaban ning makasalanan at ning darapat marok ya ing mismung sarili da.

¹¹Ngana pang Rafael karela, Sabian ku na ngeni kekayu ing mabilug a katutuan at ala kung isalikut kekayu. Asabi ku na kekayu nandin king e sukat paniabian ing lihim ning ari, oneng kailangan ing paniabian ing dapat nang mayap ning Dios ban parangalan de at purian ding tau.

¹²Ngeni, inyang ika Tobit menalangin ka at antimu rin i Sarah, aku ing migdala king panalangin yu king maligaya nang arapan ning Ginu. Makanyan munaman ing depat ku inyang kitkut mu la ding mete.

¹³Kanitang aldo a tinalakad ka at likuan ing pamangan mu ban ikutkut ya itang mete, tinubud na ku kanita ning Dios ban subukan da ka.

¹⁴Ya naman ing mitubud kanaku ban pakayapan da ka at iligtas ke ing manuyang mung i Sarah king kaligaligan.

¹⁵Aku i Rafael, ing metung karing pitung anghel a makatalakad arapan ning maligayang kamalan ning Ginu bilang talasuyu na.

¹⁶Ginalgal la king takut di Tobit at Tobias at misubsub la king gabun.

¹⁷Oneng ing anghel a i Rafael sinabi na, E ko tatakut; magpayapa kayu. Ing daptan yu ya ing purian ye ing Dios king kapilan pa man.

¹⁸E yu ku sukat pasalamatan uling ing Dios ya ing maki kaburian king panga-atyu ku kekayu. Samban ye at pagkantang kapurian kabang bie yu.

¹⁹Marahil isipan yu king ikit yu kung mengan; vision ya ing ikit yu kanita.

²⁰Purian ye ing Ginu; munie kayung kapasalamatan king Dios kabang atyu kayu keti king yatu. Mukiat na ku banua ban pakikitan ya itang mitubud kanaku. Isulat yu ing sablang mepalyari kekayu.

²¹Kanita minukiat ne banua i Rafael at e ra ne ikit inyang tinalakad la di Tobit at Tobias.

²²Migkanta lang kantang kapurian king Dios; pasalamatan de king sablang makapagmulalang bage a depat na king kapamilatan ning anghel na a pepakit karela.