Read Kapampangan Tobit 14 Bible Online

Tobit 14 - Kapampangan bible

Tobit 14

¹Mete ya king mitmung kapayapan i Tobit at kitkut deng mitmung dangalan king Nineve. Idad yang dinalan at labing aduang banua inyang mete ya.

²Anam yang pulu't aduang banua inyang mepula la ding mata na, oneng kinayap la ding mata na at dakal ing kabiayan na. E na kelinguan ing pamaniapat mayap at ing pamamuri king Dios at ing pamipasalamat king kamalan na.

³Bayu ya mete, pepayaus ne ing anak nang i Tobias at ngana,

⁴Anak ko, munta na ka king Media at ituki mu la karin ding anak mu, uling paniwalan ku ing sinabi na ning Dios king kapamilatan ning propeta Nahum ing tungkul king mapalyari king Nineve. Ing sinabi da ring propeta ning Israel a tinubud na tune mapalyari king Asiria at Nineve; pihu lang miparusan. Ing sablang sinabi ra marapat potang datang na ing oras. Balu ku king siguradung mapalyari ing sablang sinabi na ning Dios. Tutuparan na ning Dios ing pangaku na. Mas ligtas kayu king Media kesa king atyu kayu king Asiria o king Babilonia. Palakuan da la king gabun a mataba ning Israel ding kabalen tamu karin at iyugse king aliwang bansa. Maulila ya ing mabilug a bansa ning Israel at pati na ing Samaria at ing Jerusalem. Masilab ya at mipatag king gabun ing Templo ning Dios, oneng pansamantala mu ita.

⁵Malunus yang pasibayu ing Dios karing memalen na at ibalik na la king bansa ning Israel. Italakad de kanitang pasibayu ing Templo, mu pin e ne anti ing sadia uling e pa miras ing mitakdang panaun. Oneng paniatang ning panaun a ita at potang atyu no ngan karin king Israel, gawan deng masanting ing Jerusalem at ayusan ing Templo, agpang king inula ding propeta na ning Israel.

⁶Kanita mayagkat la king Dios ding sablang bansa ning yatu. Samban de bilang bukud dang Dios at kalinguan da la ring idolo a mitake karela king e katutuan.

⁷Purian de ing alang anggang Dios agpang king kautusan na. King panaun a ita mitipun lang miyabe-abe ding sablang miligtas a Israelita a menatiling tapat king Dios. Datang la Jerusalem ban bandian ing gabun nang Abraham, at karin la manuknangan a alang takut king kapilan pa man. Tumula la detang tune malugud king Dios at mawala na la king yatu ding makasalanan at ding aliwa pang darapat e mayap.

⁸Tobias at ikayung apu ku, oyni ing lalakuan kung panabilin kekayu: suyuan yeng mitmung katapatan ing Dios at daptan yu itang katanggap-tanggap king akakit na.

⁹Ituru yu la ding anak yu ban daptan da ing mayap at munie kayung limus karing kalulu. E ye kakalinguan kapilan man ing Dios at purian ye ing lagyu na king mitmung kataimtiman at king mabilug yung sikanan.

¹⁰At ika naman Tobias, mako na ka keti Nineve. E ka magdatun keti. Nung ailibing mu ne i ima mu king kutkutan siping ku mako na ka; e na ka manatili pang mabengi king sakup ning siudad. Pawang e ustu at keyalan marine ing akakit ku keting siudad. Anak ku, e mu sa kakalinguan ing depat nang Nadab kang bapa nang i Ahikar a menese at peparagul kang Nadab. Pinilit neng salikut king kutkutan i Ahikar. Oneng miligtas ya i Ahikar, at singilan ne ning Dios i Nadab. Ikit nang pasibayung Ahikar ing sala, oneng menabu ya i Nadab king alang anggang karalumduman uli na ning buri neng paten i Ahikar a bapa na. Uling babie yang limus karing kalulu i Ahikar miligtas ya king bitag a gewa nang Nadab, oneng i Nadab mismu ya ing menakbag king bitag at mete ya.

¹¹Makanyan, anak ku, ing bunga na ning babie limus, oneng kamatayan naman ing bunga na ning darapat e ustu. Panamdaman ku king mimina na ku. Kanita kinera de king pagkeran na i Tobit at mete ya. Kitkut deng mitmung maragul a parangal.

¹²Inyang mete ya i ima nang Tobias, kitkut ne lele nang tata na. Kaybat na nita, i Tobias at ing asawa na meko la at minta king Media at menuknangan la Ecbatana, king katuangan nang i Raguel.

¹³Sinese na la at gelangan Tobias ding katuangan na king karelang ketuan. Inyang mete la, kitkut na la king Ecbatana ning Media. Ya ing migmana king likuan nang pibandian Raguel at itang kang Tobit a tata na.

¹⁴Mete ya i Tobias inyang idad yang dinalan labing pitung banua.

¹⁵King kekaban ning bie na ikua nang abalitan ing pangalasak ning Nineve, at ikit de ring mata na ing aring i Cyaxares ning Media, inyang dela na lang bihag ding memalen. Pinuri neng Tobias ing Dios uling perusan na la ding memalen na ning Nineve at Asiria. King kekaban ning bie na, e ya tinuknang babie kapasalamatan king Dios a alang angga uli na ning pepagpa na king Nineve.