Read Kapampangan Tobit 2 Bible Online

Tobit 2 - Kapampangan bible

Tobit 2

¹King pamagbalik ku, mekapiyabe-abe kami ning asawa kung i Ana at ing anak kung i Tobias. Aldo na kanita ning Piesta ning Pamamupul a pikabaluan munamang Piesta ding Paruminggu. Migsadia lang maniaman a pamangan para kanaku.

²Inyang ikit ku ing dakal a pamangan ngaku king anak kung i Tobias, Anak, lumual na ka at lumawe kang kabalen tamu a pakakalulu a kalupa tamung miyugse keti oneng tapat ya king Dios. Agkatan me keti ban akayabe ta yang mangan. E ku mangan anggang e ka datang.

³Inya linual ya i Tobias ban lumawe akayabe nang mangan tata na. Oneng agad yang mibalik at nganang kukulisak, Tatang! Tatang! Ngakung kinutang, O, nanung milyari anak? Pekibat nang Tobias, Pete re ing metung tamung kabalen at makapase ya ing bangke na king palengki!

⁴Inya tinalakad ku at e na melaus mengan. Memirapal kung minta king palengki ban kuanan ing mete. Dela ke king metung a kural. Menatili ya karin ing mete angga king limbug ya ing aldo ban akutkut ke.

⁵Kaybat na nita, minuli ku at mendilu. Tune malungkut ku kabang mamangan ku.

⁶Kanita ke aganaka ing sinabi nang propeta Amos karing memalen ning Betel. Ngana: Maging kalungkutan la ding kekong piesta, at maging tangis lang kapait-paitan ding masaya yung kanta. Menangis ku.

⁷Inyang lumbug ne ing aldo, linual ku at kinulkul king gabun at karin ke kitkut ing mete.

⁸Pigsisti da ku ding kasiping kung bale at ngara, E ne medala ing taung yan. King milabas peparakap de ban paten uli na ning dapat nang anti kanyan. Ngeni mengutkut ne namang mete!

⁹Itang benging ita mindilu ku at kaybat minta ku king mulahan ban matudtud lele ning pader. Malisangan kanita inya e ke tikpan ing lupa ku.

¹⁰E ku apansinan king atin palang ayup a denas a makayapun tulid ning pigkeran ku, at digpa karing mata ku ing mapalipali pang dinat da. Uli na niting dinat da mika maputing tinakap karing mata ku. Pepalawe ku karing doktor oneng ala lang agawa, uling lalu lang melala ding mata ku king panulung binili ra angga na king mebulag ku. Apat kung banuang e manakit, at meligalig la ding kamaganak ku king meging kabilian ku. Sinustentuan na kung Ahikar kilub ding aduang banua bayu ya minta king bansa ning Elam.

¹¹Mekipagobra ya i Ana a asawa ku bilang mamabal imalan. Iti ya ing kapanintunan a luluban da ring babai kanita.

¹²Babayaran deng agad i Ana neng ayatad na ing ayari nang obra. Inyang mapupus ne ing panaun ning dimla, inatad na ing ayari nang obra. E mu ing beyaranan de nune dininan de pang metung a biserung kambing.

¹³Minuli yang tatairan ne ing biserung kambing at megumpisa yang ginaga ing kambing. Sinabu ku, Nukarin me ibat ing biserung kambing a yan? Penako me ne? Isubli me karing makibandi. E ustu ing kanan ya ing nanumang pamangan a penako.

¹⁴Nganang Ana, E ke penako. Binie de kanaku bilang regalu subali pa king upa a tinggap ku. E ke buring paniwalan at pinilit keng isubli ne ing kambing karing makibandi. Melare ku lupa king dine uli na ning depat ning asawa ku. Oneng ngana kanaku, Ngeni, nukarin ing depat mung pamaniaup karing aliwa at ing dapat mung mayap? Ngeni ikit ku ing tune mung pangatau.