Read Kapampangan Tobit 5 Bible Online

Tobit 5 - Kapampangan bible

Tobit 5

¹Kanita nganang Tobias kang tata na, Daptan ku pu ing sablang sinabi yu kanaku.

²Oneng makananu ku lang akua ding salaping binggitan yu? E na ku kilala ning taung i Gabael? Nanu ing gawan ku ban maniwala ya kanaku at ibie na la kanaku ding salapi? E kia naman balu ing dalan papunta king Media.

³Pekibat nang Tobit, E ka migaganaka. Ating kasulatan a pinirman ming Gabael a pinitna ku. Atyu kanaku ing kapirasu at atyu kang Gabael ing aliwang kapirasu. Atyu king suput da ring salapi ing kapirasung kasulatan a miras kang Gabael. Adua nang pulung banua ing milabas manibat na kanita. Agad na kang lumawe taung apagkatiwalan mu ban akayabe mu king paglakbe. Bayaran te kabalik yu keti. Kailangan ing akua mu la ding salaping deta kang Gabael.

⁴Inya menintun yang taung akayabe nang Tobias a makibalu king dalan papunta Media. Kalual na king bale akatagpu ne i Rafael, ing anghel, oneng e na balung Tobias king tubud ne ning Dios i Rafael.

⁵Nganang Tobias, Abe, nukarin ka tau? Pekibat nang Rafael, Metung kung Israelita; metung ku karing kamaganak mu a dinatang keti Nineve ban manintun obra. Kitnan neng Tobias, Balu me ing dalan papunta Media?

⁶Wa, balu ke, nganang mekibat Rafael, maralas kung pupunta karin at balu ku la ding dalan. Atin kung kamaganak karin a maralas kung daralawan. Gabael ya lagyu at manuknangan ya king Rages king sakup ning Media. Adua yang aldo lakaran ing Rages manibat Ecbatana uling atyu karing kabundukan ing Rages.

⁷Nganang Tobias kang Rafael, Manaya ka ken, abe, lungub ku bale at sabian da ka kang tatang ku. Kailangan da ka king pamunta ku karin at bayaran da ka.

⁸Nganang Rafael, Wa, panayan da ka, oneng e ka magluat.

⁹Linub ya bale i Tobias at ngana kang tata na, Tatang, menakit kung taung akayabe ku king paglakbe at kalupa ta yang Israelita. Nganang Tobit, Paluban me. Buri keng abalu ing pamilya na at ing tribung penibatan na, at nung apagkatiwalan yang kayabe mu king paglakbe. Linual ya i Tobias at ngana kang Rafael, Lungub ka, buri na kang akasabing tata ku. Linub ya i Rafael at i Tobit ya ing minunang menatu keya. Kanita nganang Rafael, Sana atyu kayu king mayap a kabilian. Oneng sinabi nang Tobit, Makananung atyu ku king mayap a kabilian ngening bulag ku? Ala kung bitasang akakit; atyu ku king karalumduman. Balamu mete ku; mayap pa pin ing mete na ku! Daramdaman ku la siwala deng tau, oneng e ku no man akakit. Nganang Rafael, E kayu milalako kapanayan. E lumuat uluan na kayu ning Dios. Inya e kayu migaganaka. Kanita nganang Tobit, Bisa yang munta Media ing anak kung i Tobias. Malyari meng tukian at ituru ing dalan? E ka migaganaka, bayaran da ka. Nganang Rafael, Malyari ke pung saupan. Balu ku la ngan pu ding dalan pa(...)

¹⁰Nganang mengutang Tobit, Sabian mu ne mo kanaku ing pamilya at tribung penibatan mo?

¹¹Nganang Rafael, E na pu kailangan ing abalu ye pa ing pamilya ku at ing tribu mi. Nganang Tobit, Buri kung abalu nung kaninu ka anak at nung nanu ka lagyu.

¹²Nganang Rafael, Ing lagyu ku pu Azarias; anak na ku ning matuang i Ananias, ing metung karing kamaganak yu.

¹³Kanita nganang Tobit, A makanyan. Ituring meng bale mu na iti. Bendisyunan na ka sa ning Dios, anak ko. E mu sa ipagkasala ing pamangutang ku keka uling buri ke mung abalu ing pamilya mu at ing tribu mu. Ngeni naman pala ibat ka king mayap a pamilya at kamaganak da ka pala. Balu ke i Ananias at i Natan, ding adua nang anak ning matuang i Semaia. Menatili lang tapat king karelang relihiun. Maralas kami kanitang miyabe-abe pupunta Jerusalem ban samba karin. Mayap lang tau; ibat la king mayap a pamilya. Mingat kayu sana king paglakbe yu.

¹⁴Ngana pang Tobit, Bayaran da kang ustu at dinan da kayung sobrang alaga para panggastus yu king kailangan yu king paglakbe.

¹⁵E me sana paburen i Tobias at dagdagan ku pa ing upa mu.

¹⁶Nganang Rafael, Tukian ke. E ye pu pigaganakan, e ke pu numanu balang king pamunta mi karin at king pamagbalik mi keti uling ala pung panganib king dalan. Nganang Tobit, Bendisyunan na sa ning Dios ing lakad yu. Kaybat na nita, inaus ne i Tobias at ngana, Anak, isadia mu na ing sablang kailangan yu king paglakbe at mako na kayu niting kamaganak tamu. Ingatan na kayu sana ning Dios at ning anghel na at ibalik na kayu keti king alang kasasagkulan. Bayu la meko inuma neng Tobias i tata na at i ima na. Nganang Tobit, Mimingat kayu sana king paglakbe yu.

¹⁷Bigla yang kiniak i ima nang Tobias at ngana kang Tobit a asawa na, Obat tiburan me pang mako ing anak ku? E mu wari balu king ya mung bukud ing kasaup ta at kapanayan king bie ta?

¹⁸Mas maulaga la pa wari keka detang salaping deta kesa king bie ning anak mo?

¹⁹Sapat naman para kekatamu ing babie ning Dios kekatamu.

²⁰Nganang Tobit king asawa na, E ka migaganaka; e ya numanu balang ing anak ta. Mibalik yang alang kasasagkulan. Akit mia mu ring pasibayu potang magbalik ya.

²¹Tuknang na kang migaganaka kang Tobias at king kayabe na. Patnubayan ne ning mayap a anghel at magtagumpe ing lakad na. Mibalik yang alang kasasagkulan. Uli na niti, tinuknang yang kikiak i Ana a asawa na.