Read Kapampangan Tobit 7 Bible Online

Tobit 7 - Kapampangan bible

Tobit 7

¹Inyang miras na la Ecbatana, nganang Tobias king kayabe nang i Azarias, Abe, idala mu kung agad king kamaganak kung i Raguel. Inya tiki neng Azarias king bale nang Raguel. Ila ding minunang minie atu kang Raguel a disnan dang makalukluk king pasbul ning bakuran na. Ngana namang mekibat Raguel, Malaus kayu, kakaluguran. Tiki na lang linub king bale na

²at ngana kang Edna, ing asawa na, Kalupa ne ning pisan kung i Tobit ing baintaung ini.

³Nganang mengutang Edna karela, Kakaluguran, nu kayu menibatan? Pekibat da, Ibat kami pu king tribu nang Neftali a ngeni bihag at miyugse king Nineve.

⁴Nganang Edna, Kakilala ye ing kamaganak ming i Tobit? Pekibat da, Opu, balu mi ya. Kitang na pang Edna, Komusta ya?

⁵Pekibat da, Mabie ya pa pu at masikan. Kanita nganang Tobias, Anak na ku pu.

⁶Mipatalakad ya i Raguel inyang dimdam na ing sinabi nang Tobias at kinaul ne kabang tutulu ing lua na king tula na.

⁷Ngana, Bendisyunan na ka sa ning Dios, anak ku. Marangal ya at mayap yang tau i tata mu. Makalungkut mu pin uling mebulag ya ing metung a taung tapat a antimo i tata mu. Kiniak ya i Raguel at kinaul ne i Tobias.

⁸Mipakiak ya naman i Edna at i Sarah. Matula neng tinggap king pibalebale nang Raguel i Tobias at ing kayabe na. Kaybat ning komustahan at balitanan, pepapulkeru neng Raguel ing metung a lalaking tupa king kawan na. Inyang mekapandilu na la at mekapanos gamat bayu mangan, nganang Tobias kang Rafael a abe na, Azarias, pakisabian mu ne i bapang Raguel ban mikasal na kaming Sarah.

⁹Dimdam nang Raguel ing sinabi nang Tobias a pangunakan na at ngana,

¹⁰Mangan kayu at magpakabsi at magsaya ngening bengi, uling ika Tobias ing ating matulid maging asawa nang Sarah. E ke apakasal king aliwa uling ika ing pekamalapit kung kamaganak. Oneng atin kung buring ipagtapat keka.

¹¹Mikasal ne i Sarah karing pitung lalaki a kamaganak munaman, oneng ing metung at metung mamate ya itang kabengian ning karelang kasal. Oneng ngeni anak ko, mangan na ka at magpakabsi, at sana maging maganaka ya ing Ginu keka at kang Sarah. Nganang Tobias, E ku mangan at minum anggang e yu ibie ing pasya yu.

¹²Mebisa ya i Raguel at ngana, Ibie ke keka i Sarah antimo ing aduan ning Kautusan nang Moises. Ing Dios king banua ya ing mitakda ban maging asawa me, inya kuanan me i Sarah a kamaganak mu at pakasalan me. Manibat na ngeni bandi me at ya naman bandi na ka. Keka ne manibat na ngeni. Bendisyunan na kayu sana ning Ginu ngening bengi. Malunus ya sana kekayu at dinan na kayung kapayapan.

¹³Kaybat na nita, inaus neng Raguel i Sarah at binie ne kang Tobias. Ngana, Tobias, asawa mu ne i Sarah agpang king Kautusan nang Moises. Tanggapan me at ingatan at iyarap kang tata mu. Sana ingatan na kayu at iligtas ning Dios at dinan kapayapan at kanawan.

¹⁴Inaus neng Raguel ing asawa na at meniawad yang papil a makalulun ban pisulatan king mipakayari king kasal a patutu king binie ne ing anak nang i Sarah kang Tobias ban maging asawa na, agpang king Kautusan nang Moises.

¹⁵Kaybat na nita, mengan na la at minum.

¹⁶Inaus neng pasibayung Raguel ing asawa na at ngana, Edna, isadia mu ne ing kuartung pambisita para karing bayung miyasawa at ituki mu ne karin i Sarah.

¹⁷Inayus neng Edna ing kuartu at kaybat linub ne karin ing anak nang i Sarah. Kiniak ya i Sarah at pinulis nang Ednang ima na ing lua na at ngana,

¹⁸Anak, tatagan mu ing lub mu. Dinan na ka ngening kaligayan ning Ginu ning banua at e kalungkutan. E ka sukat mitatakutan. Kaybat na nita meko ne i Edna.