Read Kapampangan Judith 10 Bible Online

Judith 10 - Kapampangan bible

Judith 10

¹Inyang meyari neng menalangin i Judith king Dios ning Israel,

²tinalakad ya at inaus ne ing ipus nang babai. Kaybat tinipa ya at linub king bale nung nu na akaugalian ing magdatun neng Aldo ning Sabbath at kapilan mang ating kapiestan.

³Likas ne ing imalan a magaspang a susulud na at ing imalan nang paldas. Kaybat, mendilu ya at migpabanglu. Siklen ne ing buak na at tinali neng lasu, at saka ne sinulud ing pekamalagu nang imalan a susulud na neng ating kasayahan inyang mabie ya pa ing asawa nang i Manase.

⁴Migsandalyas ya at misulud singsing, pulseras, tingga, at aliwa pang alahas. Lalu yang migpalagu ban mipabalikid ya ing ninumang lalaking manakit king itsura na.

⁵Pepadala ne king ipus na ing balat-animal a lulanan alak at metung munamang lulanan a laru. Kitmuan neng sing-le trigu, pepalanging igos, at miyayaliwang tinape ing metung a lulanan, at pepadala ne king ipus na.

⁶Kaybat na nita, miyabe lang linual king pasbul dalan ning Betulia at ikit deng makatalakad magguardia i Uzzia at ding pamuntuk ning siudad a i Kabris, Karmis, at ding makatua.

⁷Ikit deng aliwa itsura at piblas i Judith, at tune lang mengapamulala king lagu na. Ngara kang Judith,

⁸Patnubayan na ka sana ning Dios ding makatua tamu at maging matagumpe sana ing lakad mu ban mipaligayan ya ing Jerusalem at miparangalan ing Israel. Dinuku ya i Judith at menalangin king Dios.

⁹Kaybat, ngana karela, Pabuklat ye ing pasbul at lumual na ku ban daptan itang sinabi ku kekayung daptan ku. Kanita inutusan da la ring kayanakan ban ibuklat de ing pasbul.

¹⁰Inyang mibuklat ya meko ne i Judith at ing abe nang ipus. Lalawan de ring lalaki kabang kukuldas ya king bunduk papunta king kapatagan at angga king limbug ya karing mata da.

¹¹Kabang maglakad ya at ing ipus na king kapatagan, akatagpu da la ring magpatrolyang sundalung Asiriano.

¹²Dekap da la at pengutnan. Ngara ding sundalus, Ninu ikayu? Nukarin kayu menibatan at nukarin kayu munta? Pekibat nang Judith, Hebreo ku; tatakasan ku la ding Israelita uling ibie na la ning Dios king gamat yu ban pamuksan yu.

¹³Pakikitan ke i Holofernes, ing pamuntuk yu, ban ibie ing maulagang ulat. Ituru ke ing dalan a palub king siudad a bulubundukan at ala metung man mate kekayung sundalus na.

¹⁴Kabang pakiramdaman de, lalawan de lupa at mengapamulala la kang Judith uli na ning malagu ya. At ngara,

¹⁵Linigtas mu ing bie mu king kapamilatan ning kapagnasan mung makikit king panginuan ming i Holofernes. Puntalan mu ne king tolda na. Tukian da ka ding mapilan kekami ban iyarap da ka kang Holofernes.

¹⁶E ka tatakut. Sabian mu kang Holofernes itang sinabi mu kekami at maging maganaka ya keka.

¹⁷Pepatukian da la kang Judith at king ipus na ding dinalan a sundalus at dela ra la kang Holofernes.

¹⁸Mikalat king mabilug a kampu ing balita tungkul king paniatang nang Judith at dinatang la ding lalaking atyu karing tolda. Pilupungnan de i Judith a makatalakad lual ning tolda nang Holofernes kabang panenayan neng ausan na.

¹⁹Uli na ning malagu ya, miras king panamdam da king malagu yang lahi ing Israel. Ngara king metung at metung, Makananu ta ya ngening insultuan ing bansang ating mangalagung babaing anti kanyan? Mayap pa ing ala ta nang tatagan mabie metung man karing lalaki da pota agayuma de pa ing mabilug a yatu.

²⁰Kanita linual ya ing guardia at ding sablang kasaup nang Holofernes at dela re i Judith king kilub ning tolda.

²¹Magpaynawa ya kanita i Holofernes king katri na a makakulumbung kule ubi a mipalamutian gintu, esmeralda, at aliwang mangamal a alahas a batu.

²²Inyang sabian dang atyu ne i Judith, meko ya king pagkeran na. Ating magdalang sulu a megawa king pilak king arap na.

²³Mipamulala la ding sabla king tagle nang leguan Judith. Migsakab ya arap nang Holofernes, oneng telakad de ring ipus.