Read Kapampangan Judith 11 Bible Online

Judith 11 - Kapampangan bible

Judith 11

¹Nganang Holofernes kang Judith, E ka migaganaka, e ka sukat mitatakutan. Ala ku pang penasakit karetang bisang sumuyu kang Nebucadenesar, ing ari ning mabilug a yatu.

²Lepastangan da ku mu ring kabalen mung manuknangan king bulubundukan inya aisipan kung lusuban la. Ila ing maki kasalanan king kaguluan a miras karela.

³Ngeni, sabian mu kanaku ing sangkan ba't tekasan mu la at ing sangkan ba't makiabe ka kekami. Linigtas mu ing bie mu king pamunta mu keti. Magpayapa ka. Manibat ngening benging iti o king daratang pang panaun ala na ka king panganib.

⁴Alang tagin keka. Pakiabayan ku lang ustu ding sasakupan na ning panginuan kung i Aring Nebucadenesar.

⁵Nganang Judith, O ginu ku, paintulutan ye sanang makapagsalita iting maluka yung talasuyu. Katutuan pu ing sabian ku ngening bengi kekayu.

⁶Nung tukian yu ing kausukan ku, gawa yang makapagmulalang bage ing Dios king kapamilatan yu, at siguradung magtagumpe kayu king tingka yung daptan.

⁷King lagyu ning mabie at mayupayang i Nebucadenesar, ing ari ning mabilug a yatu a mitubud kekayu ban magdalang kaayusan karing sabla nang sasakupan, sasabian kung mitmung kataimtiman: king e mu ing ayagkat yong sumuyu king ari ding tau nune king kapamilatan yu mamintu la pa pati na ding malyap at matunud a animal at ding ayup. Salamat kekayu; utang dang lub kekayu ing bie ra kabang ari ya i Nebucadenesar.

⁸Abalitan mi ing tagle yung beluan at kabiasnan. Balu ning mabilug a yatu king ala kayung kalupa karing sundalus at heneral ning mabilug a kayarian ning Asiria.

⁹Linigtas de ring lalaki ning Betulia i Akior at sinabi na kekami itang mepikayari king pulung yu.

¹⁰E yu gagawan biru itang sinabi nang Akior, nune pakapagaralan yung masalese uling katutuan. Ala metung mang tau a makapanasakit o makasakup karing memalen mi subali mu nung mikasala kami laban king kekaming Dios.

¹¹Oneng magtagumpe kayu ngeni, O ginu ku, uling atyu na la king upaya ning kasalanan. Mitakda na ing kamatayan da. Mimimua ya karela ing Dios da neng darapat lang e ustu.

¹²Uling kegisanan na lang pamangan at inuman, inari da king lub da ing paten da la ring sese rang animal at kanan pati na itang pamangan a e sukat kanan a babawal ning Kautusan ning Dios.

¹³Pikayari da na namang kanan da na la ring mumunang pupul a trigu at ding sikapulung alak at laru agyang pang iti mitalaga na para karing pari ming susuyu king Dios karin king Templo ning Jerusalem. Bawal kekaming e pari ing tagkilan la reti.

¹⁴Mitubud na lang tau king Jerusalem ban maniawad kapaintulutan king konseho da ring Makatua ning Jerusalem uling makanyan na naman ing daraptan da karin.

¹⁵King aldo a tanggapan de ing kapaintulutan at tuparan de, kanita yu na la agyung pamuksan a bie.

¹⁶Inyang abalitan ku pu ing milyari tekasan ku la at dela na ku keti ning Dios ban magobrang kayabe yu karing bage pagmulalan ding tau kabud abalitan da iti.

¹⁷Metung ku pung babaing relihiosa; aldo't bengi sasamban ke ing Dios ning banua. Manatili ku pu keti, oneng neng bengi munta ku pu king kapatagan ban manalangin king Dios, at ipabalu na kanaku nung mikasala la.

¹⁸Kabalik ku sabian ku kekayu ing pepabalu na kanaku, at kanita yu na la panimunan ding sablang sundalus yu king pamaglusub. Ala na kanitang Israelitang makalaban kekayu.

¹⁹Ituru ke ing dalan ban makadalakit kayu king Judea angga king miras kayu Jerusalem, at ibili ke ing tronu yu king libutad ning siudad. Tuki la kekayung anti ding tupang misalbag a alang pastul. Alang asu a kaung kekayu. Pepabalu na ngan makapauna ning Dios iti kanaku at tinubud na ku kekayu ban ibalita iti.

²⁰Metula ya i Holofernes at ding talasuyu na uli na ning sinabi nang Judith, at tune rang pigmulalan ing kabiasnan na.

²¹Ngara king metung at metung, Ya na siguru ing pekabiasa at pekamalagu karing babai keti king yatu!

²²Kanita nganang Holofernes kang Judith, Salamat king Dios uling tinubud na ka keti ban pasiknangan na ke lub at pamuksan ding sablang meninsultu kang Nebucadenesar a panginuan ku.

²³Tune malagu kang babai at malagu ka namang magsalita. Nung tuparan mu itang pengaku mu, maging Dios ke ing Dios mu, at manuknangan ka king palasyu nang Aring Nebucadenesar, at maging pikabaluan ka king mabilug a yatu.