Read Kapampangan Judith 12 Bible Online

Judith 12 - Kapampangan bible

Judith 12

¹Kaybat na nita, inutus nang Holofernes king idala re i Judith ketang lamesa nung nu la makasadia ding kasangkapan nang pilak, at migpasadia yang maniaman a pamangan at alak a bukud mung para kang Judith.

²Oneng tinanggi ya i Judith. Ngana, E ku pu malyaring kanan yan uling bawal king kautusan mi. Makagyu na pu ing darala kung pamangan.

³Kitang nang Holofernes, Nung megisan na ing bakal mung pamangan, nukarin kami kuma para keka? Ala kaming kayabe keti a kalahi mu.

⁴Pekibat nang Judith, Kabang mabibie kayu, O ginu ku, e ku kakulangan pamangan bayu na gawan ning Ginu itang tikda na king kapamilatan ku.

⁵Dela re ding tauan nang Holofernes i Judith king tolda at karin ya metudtud,

⁶oneng migising ya bayu ing sala ning abak, at peparala yang amanu kang Holofernes. Ngana, O ginu ku, malyari yu ku pung paintulutan lumual at munta king kapatagan ban manalangin?

⁷Inya inutus nang Holofernes karing guardia ing paintulutan deng lumual king kampu i Judith. Menatili ya king kampu da ring Asiriano i Judith kilub ding atlung aldo, at balang bengi pupunta ya king kapatagan malapit Betulia at mandilu ya ketang batis karin.

⁸Kaybat nang mendilu, manalangin ya king Ginung Dios ning Israel ba nang bendisyunan ing buri nang daptan king ikaligtas da ring memalen ning Israel.

⁹Kaybat na nita, magbalik neng malinis, agpang king kaugalian Judio, at manatili ya king tolda kaybat ning apunan.

¹⁰Inyang kapat nang aldo, migsadia yang dakal a pamangan i Holofernes bukud mung para karing matas a katungkulan karing pamuntuk na. E la kayabe detang pamuntuk a makatutuk king katungkulan da king aldong ita.

¹¹Nganang Holofernes kang Bagoas, ing lalaking kapun a panibalan na king pamibiebie na, Puntalan me ing babaing Hebreong mibie pakibatan keka at agkatan meng makisulu at minum kayabe tamu.

¹²Maragul a kamarinayan nung palagpasan ta ya ing babaing anti kanyan a e tamu migkusuelung kayabe na. Kailian na katamu nung e ta ya ayagkat.

¹³Inya pintalan neng Bagoas i Judith at ngana, O malagung babai, kukumbiran na kang heneral Holofernes king tolda na ban minum at mangan. Tara na at magsaya kang anti ding babaing susuyu king palasyu nang Nebucadenesar.

¹⁴Nganang Judith, Ninu mo aku a tanggi king panginuan ku? Tula ku ing gawan ing nanumang makaibie tula kang Holofernes. At ipagmaragul ku iti anggang mabie ku.

¹⁵Inya miniblas yang malagung imalan i Judith at sinulud na ngan ing makalagu. Minuna yang linual i Judith king ipus na, at lidlad na la king gabun arapan nang Holofernes ding balat tupang binie nang Bagoas ban luklukan na neng mamangan ya.

¹⁶Inyang dinatang ne i Judith, linukluk ya king paglugalan na. Tune yang mengapamulala i Holofernes king lagu na. Penamdaman na ing pamagnasang sipingnan ne at simsiman ing banglu nang Judith. Kanita pang ikit na neng minuna, lalawe neng oportunidad ban akayabe ne.

¹⁷Inya ngana kang Judith, Minum na ka at magsayang kayabe mi.

¹⁸Nganang Judith, Opu. Iti ya ing pekamasayang aldo king bie ku.

¹⁹Makanyan man, ita mung sidia na ning ipus na ya ing pengan na at ininum.

²⁰Tune yang menabu lub i Holofernes kang Judith, inya minum neng minum dakal a alak a e na sadiang daraptan king metung a aldo manibat na inyang meging tau ya.