Read Kapampangan Judith 13 Bible Online

Judith 13 - Kapampangan bible

Judith 13

¹Inyang malalam nang bengi, memun na lang mako ding bisita nang Holofernes. Sera neng Bagoas ing pasbul ning tolda ban ala nang makalub pang tauan nang Holofernes. At metudtud no ngan. Meluat ing karelang inuman inya mepagal la.

²Melakuan ya i Judith kilub ning tolda; ala yang kayabe nune mu i Holofernes a makabulagta king pagkeran uli na ning labis a kalasingan.

³Manenaya ya king lual ning tolda ing ipus nang Judith ban manalangin antimo ing sadia nang gagawan. Asabi na na naman Judith iti kang Bagoas bayu ya meko king lumual ya at munta king kapatagan ban manalangin.

⁴Inyang ala na la ding tau; bukud mung i Judith ing melakuan, tinalakad ya i Judith lele ning pagkeran nang Holofernes at menalangin yang tahimik. Ngana, O Ginung Dios a Mayupaya king sabla, saupan mu ku sana king kanakung daptan para king ikaligaya na ning Jerusalem,

⁵at ban magtagumpe ing balak kung ibagsak la ding kalaban ming malapit nang lumusub kekami.

⁶Kinua ne kanita ing espada nang Holofernes a makasabit king asias ning pagkeran king kabuntukan na,

⁷at linapit ya at diklut a buak i Holofernes. Ngana, Ngeni, O Ginung Dios ning Israel, dinan mu kung sikanan.

⁸Kaybat, king sablang sikanan na tebak neng mekatadua batal i Holofernes at metabtab ya batal.

⁹Peparugang ne ing katawan at menabu ya king pagkeran. Kaybat kinua ne ing kulumbung makasabit. E miglambat linual ya king tolda i Judith at binie ne king ipus na ing buntuk nang Holofernes.

¹⁰Binili na ne man niti king datukanan pamangan. Miyabe lang linual deting aduang babai antimo ing sadia rang daraptan neng manalangin la. Likuan de ing kampu da ring Asiriano at lekaran ing kapatagan, at kaybat minukiat la king bunduk-bundukan papunta king Betulia angga na inyang miras la king pasbul dalan ning siudad da.

¹¹Inyang milalapit na la, minaus ya karing guardia i Judith. Ngana, Ibuklat ye ing pasbul! Ibuklat ye ing pasbul! Ing kekatamung Dios kayabe ta ya! Papakit na pa mu rin king Israel ing sikanan na at kayupayan laban karing kalaban tamu. Pepatunayan na iti ngeni!

¹²Inyang damdaman de ring memalen ing siwala na, memalagua la ngan minta king pasbul dalan at inaus ding makatua ning siudad.

¹³Pupulayi la ngang linapit ding kayanakan at makatua, at e la makapaniwala king mekapagbalik ya i Judith. Biklat de ing pasbul at pepaluban da la ring aduang babai. Sinindi lang sulu ban akit de lupa at pilupungnan da la ring aduang babaing mibalik.

¹⁴Nganang migsalitang masikan Judith, Purian ya ing Dios! O purian ye ing Dios! Purian ye ing Dios a e milako lunus king bansang Israel. Ngening benging iti bigsak na la ding kalaban king kapamilatan ku.

¹⁵Kinua ne kanita ing buntuk nang Holofernes a makalulan king datukanan pamangan at pepakit ne karing memalen. Ngana karela, Oyni ing buntuk nang Holofernes, ing heneral da ring sundalung Asiriano, at oyni ing kulumbu ning pagkeran na nung nu ya mibulagta inyang malasing ya. Ginamit ne ning Ginu ing metung a babai ban paten ya.

¹⁶Balu na ning mabie Dios at susumpa ku king e na ku teginan Holofernes agyang melinlang ya king lagu ku at iti ya ing pepasari king pangabagsak na. E na asira ing pangababai ku; ing Ginu ya ing miningat king sablang lakad ku.

¹⁷Mengapamulala la ngan ding sablang memalen. Kanita mu rin migsakab la king gabun at simban de ing Dios. Ngarang agnan-agnan menalangin, Pupurian da ka, O Ginung kekaming Dios, uling pemakarine mu la ngening aldong iti ding kalaban mi.

¹⁸At nganang Uzzia kang Judith, Anak ko, miyabie keka ing bendisyun ning Kakataskatasan a Dios. Binendisyunan na kang maygit karing sablang babai ning yatu. Purian ya ing Ginu, ing Dios a linalang king banua at yatu, at ya ing minantabe keka inyang tibtab me batal ing pamuntuk da ring kalaban tamu.

¹⁹E malyaring makalinguan kapilan man karing tau ing kapanaligan mu king Dios neng gaganakan da ing upaya na ning Dios.

²⁰Mananu na sanang dinan na kang alang anggang dangalan ning Dios uli na ning depat mu. Mananu na sanang ablasan na kang dakal a bendisyun uling menatili kang tapat at e ka mikakunung teya mu ing bie mu inyang atyu la king mabagsik a panganib ding kabalen mu. At ngarang mengadua ding sablang tau, Amen! Amen!