Read Kapampangan Judith 15 Bible Online

Judith 15 - Kapampangan bible

Judith 15

¹Inyang mikalat ing balita karing sundalus a atyu king kampu, mebigla la

²at ginalgal la king takut. Megulu la. Memulayi ya ing metung at metung nu mang lugal ban makatakas ya. Ating milayi king dalan, karing kapatagan, at kabundukan.

³Tinakas la naman detang Asirianong sundalus a makakampung magbante king paligid da ring bunduk-bundukan ning Betulia. King pamanakas da, linusub la karela ding sundalung Israelita.

⁴Mitubud yang tau i Uzzia king Betomestaim, king Bebai, king Choba, at king Kola, at king mabilug a bansang Israel ban ibalita ing milyari, at ban agkatan lang lage para paten la ding kalaban.

⁵Inyang tanggapan da reting lugal ing balita, misanmetung la ban arapan la ring kalaban, at pete da la ring kalaban angga king Choba. Dinatang la naman ding king Jerusalem at pati detang manuknangan king bulubundukan uling miras munaman karela ing balitang milyari king kampu da ring kalaban. Ding tau Gilead at Galilea ila ding dakal a pete uling linage la angga king angganan na ning Damasco.

⁶Ding aliwang memalen ning Betulia ilang linusub king kampu da ring Asiriano at dakal la ikuang pibandian.

⁷Inyang mekapagbalik na la ding lalaking Israelita king pamakilaban, kinua da ing mitagan. Pati detang karing baryu at balen ning kabundukan menikua lang dakal uling tune dakal ing pibandian da ring kalaban.

⁸Kaybat na nita, dinatang ya i Joakim, ing Pekapun ding Pari at ing konseho da ring makatua. Dinatang lang ibat Jerusalem ban lawan ding maragul a bage a depat ning Ginu para karing memalen na. Dinatang la naman ban pakikitan de i Judith at dinan yang mayap a oras.

⁹Inyang akatagpu da ne i Judith pinuri de. Ngarang agnan-agnan migsalita, Ika ing ligaya na ning Jerusalem, ing babaing bayani ning Israel, ing pagmaragul da ring kabalen tamu!

¹⁰Arapat mung dili mu iting sabla. Maragul a tagumpe ing depat mu para king Israel. Bendisyunan na ka sa ning Ginung Mayupaya king kapilan pa man! At ngarang mekibat ding heganaganang memalen, Amen!

¹¹Miras atlung pulung aldo bayu ra ayari ing pamanguang pibandian king kampu da ring Asirianong kalaban. Miyabie ya kang Judith ing tolda nang Holofernes, ding sabla nang kasangkapan a pilak, ding silyo, ding pagkeran na, at ding sablang luklukan. Tinggap na lang Judith at seke king asno na at karing gareta na.

¹²Dinatang la ding sablang babai ning Israel ban akit de at parangalan i Judith. Ating migkanta at tinerak ban parangalan ya. Kaybat na nita, kinangwa yang sanga ning tanaman a olibo at binie na la karing babaing kayabe na.

¹³Kebit da la reti karing buntuk da at king buntuk na namang Judith. Minta ya king mumuna da ring teterak at penimunan na la ding babai king pamanerak, at tinuki la king kagulutan ding lalaki na ning Israel; tatalnan da la ring sandata ra at bulaklak king buntuk da at magkanta lang kapurian king Dios.