Read Kapampangan Judith 5 Bible Online

Judith 5 - Kapampangan bible

Judith 5

¹Abalitan nang Holofernes, ing heneral a Asiriano, king magsadia la ding Israelita laban karela at king sebatan da na la ding pidadalanan paukiat karing bunduk, bekuran da lang pader ding mangatas a lugal at sebatan da na la naman ding dalan karing lugal a kapatagan.

²Mimua yang e mu nanu i Holofernes. Pepayaus na la ding pamuntuk ning Moab at ning Ammon ampon ding pamuntuk karing lele da ring dagat.

³Ngana karela, Anti na ning tau kayu Canaan, sabian yu no mo kanaku ing ugali da ring taung manuknangan kareting kabundukan. Nu karin siudad la manuknangan? Nu la anti karakal ding sundalus da? Nanu ing panibatan ning sikanan da at upaya? Ninu ing aring manimuna karela?

⁴Obat bukud mung ila karing sablang tau king albugan ing e bisang makikit at sumuku kanaku?

⁵Nganang mekibat Akior, ing pamuntuk da ring Ammonita, Makamal a Holofernes, nung paintulut yu pu, sabian ku ngan ing katutuan tungkul kareting taung manuknangan karing kabundukan a e masiadung malaut king pipagkampuan yu. E ku pu magsalitang kalaraman kekayu.

⁶Deng taung den lahi la pung Babilonia.

⁷Menuknangan la kanita king Mesopotamia, uling e la bisang samba karing kikilalanan dang dios ding makatua ra.

⁸Inya likuan da ing turu da ring makatua ra ban samba king Dios ning banua, ing kikilalanan dang Dios. Inyang ding tau Caldea tinabi da la king arap ning kikilalanan dang dios, minta la Mesopotamia. Karin la menuknangan kilub ning makabang panaun.

⁹Kaybat na pu nita, inutus na ning dios da ing lakuan de ing Mesopotamia at munta la king sakup ning Canaan. Karin la menuknangan at meging mabandi la king gintu, pilak, at karing sese animal.

¹⁰Oneng mika danup at linaganap iti king mabilug a Canaan. Uli na niti, minta la king Ehipto at karin la menuknangan kabang ating pamangan. Merakal nong merakal angga king e na la abilang.

¹¹Megulu ya isip ing ari na ning Ehipto uli na ning darakal la. Semantalanan na la at pepagobran e makanyan-kanyan king kapamilatan ning pamangawang laryu. Gipitan na la at gewang mistulang ipus.

¹²Oneng minaus la king dios da. At ing dios da peparala yang pesti karing tau Ehipto at ala lang akarapat. Inyang ding tau Ehipto tinabi da la,

¹³pepalangi ne ning dios da ing Dagat a Malutu,

¹⁴inya mekadalakit la at miras king Sinai at king Kades Barnea. Pepalakuan da la ring sablang manuknangan king dane mauli ning Canaan,

¹⁵at sekupan de ing bansa da ring Amoreo. Gisan da lang pete ding tau Hesbon. Kaybat, delakitan de ing Ilug ning Jordan,

¹⁶at menuknangan la karing kabundukan inyang atabi da na la ding Cananeo, Perezeo, Jebuseo, ding tau Sikem, at ding sablang Girgaseo. Karin la menatili king makabang panaun.

¹⁷Mibandi la deting Israelita kanitang e la mikasala, uling tutu nang kasaman ning dios da ing e ustu. Kayabe re ing dios da.

¹⁸Oneng inyang linisia na la king dalan a tiru nang dalanan da, mesambut la karing dakal dang pamakipaglaban karing kalaban da. At king katataulian, mebihag la at miyugse king aliwang bansa. Mipatag ya king gabun ing templo ning dios da at mesakup la karing kalaban ding siudad da.

¹⁹Ngening mekapagbalik na la king dios da, mekauli lang ibat karing miyayaliwang lugal nung nu la mikalat. Ikua reng pasibayu ing Jerusalem nung nu ya karin ing templo, at menuknangan la karing kabundukan uling menatiling alang manuknangan karin.

²⁰Makamal a heneral at panginuan ku, nung magkamali la deting tau at mikakasala la king dios da, at nung apatunayan tamung mikasala la, kanita lusuban ta la at bihagan.

²¹Nung ala lang depat e mayap, paburen ta na la uling siguradu na lang saupan ning dios da, at itamu ing mangapakarine king mabilug a yatu.

²²Kayari nang migsalitang Akior, megumpisa lang mibubulungan bilang tutul ding sablang pakatalakad makapadurut king tolda. Inawad da ring adua nang makatuang opisyal Holofernes at antimu rin ding manuknangan king lele dagat at ding aliwa pang tau Moab king paten ya i Akior.

²³Sinabi ra, E ke tatakut karing Israelita. Maina la at e la malyaring makalaban kekatamu.

²⁴Inya, tara na, O ginung Holofernes, at lusuban la; siguradung masambut la karing dakal yung sundalus.