Read Kapampangan Job 33 Bible Online

Job 33 - Kapampangan bible

Job 33

¹At ngeni Job, makiramdam kang masalese king kakung sabian.

²Ing atyu king pusu ku kakung sabian keka.

³Tapat la ding amanu ku, at king katutuan ku magsalita.

⁴Gewa na ku at dininan bie ning espiritu ning Dios.

⁵Nung agyu mu pakibatan mu ku; isadia mu la at talakaran ding pakibat mu.

⁶Parehu katamu king arapan ning Dios, parehu katamung meubug king gabun.

⁷Inya ala kang sukat ikatakut kaku; e ra ka patasan.

⁸Atyu ku at oyni ing sinabi mung dimdam ku:

⁹Ala kung dapat pakibatan; ala kung gewang e ustu. Malinis ku; ala kung kasalanan.

¹⁰Manintun yang sangkan ing Dios laban kaku, binilang na ku anting keyang kalaban.

¹¹Ginapus na la ding bitis ku, at binten balang kimut ku.

¹²Oneng sasabian ku keka Job ing mali ka. Maygit ya ing Dios king kenu mang tau.

¹³Baket sasangkanan meng e biasang makiramdam ing Dios king reklamu ning tau?

¹⁴Agyamang ing Dios ulit-ulit yang magsalita, ala namang makiramdam king sasabian na.

¹⁵Neng benging matudtud ya ing tau, kapamilatan ning paninap at vision

¹⁶magsalita ya ing Dios king tau, at pamatakutan na la karing babala na.

¹⁷Gagawan na ita ban tuknang la king pamikasala ra, at ilisia na la king ketasan da.

¹⁸E na la buring masira, at lilisia na la king karelang kamatayan.

¹⁹Parala yang miyayaliwang sakit king tau, miyayaliwang kapanamdaman ning katawan ba nia mung atulid king gagawan na.

²⁰Milalako ya gana king pamangan, ing pelalung maniaman dungus na e na buring tanggapan.

²¹Meyayat ya; butul-balat nia mu;

²²malapit nia mung munta king tuknangan da ring mete.

²³Sana datang yang sumaup ing metung mu man karing libu-libung anghel a paganaka karing katungkulan da ring tau.

²⁴King lunus na ing anghel nganang sumabi, Ilako ye! E ne mabaldug pa king tuknangan da ring mete. Oyni ing panatbus.

²⁵Sikan ya pamikakatawan at pasibayu yang maging anak;

²⁶manalangin ya at makiramdam ya ing Dios; samban ne king mitmung tula ing Dios; ipamalita na karing tau ing pangaligtas na.

²⁷Sabian na karing tau, Mikasala ku. Aliwa ing mayap ya ing gewa ku, oneng pepatawaran na ku ning Dios.

²⁸Sebat na ing pangabaldug ku king tuknangan da ring mete, at angga ngeni atin kung bie.

²⁹Ulit-ulit ing Dios gagawan na;

³⁰liligtas ne bie ing tau, at babie na ing tula ning mabibie.

³¹Inya makiramdam ka, Job, kening kakung sasabian manahimik ka, at paburen mung magsalita ku.

³²Oneng makibat ka, nung atin na ka mang buring sabian, masaya ku namang tanggapan ing kekang katuliran.

³³Nung ali na ka man, manahimik ka at makiramdam, at ituru ku keka ing kabiasnan.