Read Kapampangan Wisdom 10 Bible Online

Wisdom 10 - Kapampangan bible

Wisdom 10

¹Ing Kabiasnan ya ing meningat king minunang taung meubug king gabun, kanitang ya mung bukud melalang. Ing Kabiasnan ya ing migligtas king pamikasala na

²at minie upaya ban pamahalan ing sablang bage.

³Oneng ating taung e mayap a likuan na ing Kabiasnan; king mua na sinira na ing sarili na king kapamilatan na ning pamakamate na king kapatad na.

⁴Uli na ning kasalanan a ita, limbug ya ing yatu, oneng linigtas neng pasibayu ning Kabiasnan. Pitnubayan ne ing metung a taung matulid a makasake king matbud a dutung a bangka.

⁵Kanitang mebigu la ding bansa king e mayap dang balak, kilala ne ning Kabiasnan ing metung a taung malinis a bie at iningat ne ban e ya mikasala king akakit na ning Dios. Dininan neng sikanan ban apamintuan na la ding utus ning Dios lipat ning lugud na king anak na.

⁶Ing Kabiasnan ya ing migligtas king metung a taung matulid a bie kanitang mamate la ding taung e mayap. Miligtas ya iting lalaki king api a sinilab karing Limang Siudad.

⁷Mayayakit la pa angga ngeni ding bakas da reting taung e mayap. Alang tutubu king gabun at babasuk ya. Mamunga la deng tanaman, oneng e la lululut at ating asias a asin a monumento na ning e meniwala.

⁸E da sikasu ding tau karin ing Kabiasnan, inya e ra balu nung isanu ing mayap at ing e mayap. Paganaka na ning mesira karin ing kamulangan na ning karelang pamibiebie ban e tamu kalinguan.

⁹Oneng linigtas na la ning Kabiasnan ding talasuyu na a mibili king panganib.

¹⁰Ing Kabiasnan ya na naman ing miningat king metung a taung malinis a bie kanitang tatakasan na ing mikakalukung mua na ning kapatad na. Tinaid ne iting tau king matulid a dalan. Pepakit ne keting tau ing Kayarian ning Dios at dininan beluan karing bage banal. Gewa neng mabandi at matagumpe king sablang obra na.

¹¹Inyang meriria la at buri dang kuanan ding taung matako ing pibandian na, ing Kabiasnan ya ing sinaup at lalu neng gewang mabandi iting tau.

¹²Iningat ne karing kalaban na a manenayang sabat at makamate keting tau. Dininan neng tagumpe king mabayat a pamakilaban ban akilala na king ing kabanalan maygit yang mayupaya kesa king isanu mang bage.

¹³Ing Kabiasnan ya naman ing meningat king metung a taung malinis a bie a pisali da ring kapatad na bilang ipus. Iningat ne ban e ya manabu king pamikasala.

¹⁴Kayabe ne king sukulan at e ne likuan angga king dininan neng upayang mipailalam ya king bie na ing metung a kayarian at gewang pamuntuk da ring taung king misan menalipit keting tau. Pepakit na king kalaraman mu ing simbung da, at kaybat binie na keting tau ing alang anggang dangalan.

¹⁵Ing Kabiasnan ya naman ing minie kalayaan king metung a lahing alang kasalanan at banal. Linigtas na la ding memalen king bansang manalipit.

¹⁶Linub ya ing Kabiasnan king kaladua na ning metung karing talasuyu ning Dios. Inya tinalakad ya iting tau arap da ring pitatakutan a ari at pepalto yang dakal a milagru.

¹⁷Dininan na lang galal ding taung banal king karelang kasakitan. Pitnubayan na la king makapagmulalang pamaglakbe ra. Dininan na lang salilungan neng aldo at sulu neng bengi.

¹⁸Pitnubayan na la king pamandalakit da king Dagat a Malutu at linigtas king malalam nang danum.

¹⁹Oneng linumud na la ding kalaban da at pidpad na la king pampang ding bangke ra.

²⁰Inya kinua da ring taung matulid ing gamit da ring taung e mayap at migkanta lang kapurian king banal mung lagyu, O Ginu, at pepasalamatan da ing pamagligtas mu karela.

²¹Biklat na la asbuk ning Kabiasnan ding pipi ban makapagsalita la, at mekapagsalita lang masalese pati ding bingut.