Read Kapampangan Wisdom 11 Bible Online

Wisdom 11 - Kapampangan bible

Wisdom 11

¹Pepagtagumpen na la ning Kabiasnan ding memalen na ning Israel king kapamilatan ning banal a propeta.

²Lekaran de ing disyerto at menalakad lang tolda karing lugal a alang bitasang taung manuknangan.

³Inarapan da la ring karelang kalaban at atabi da la.

⁴Minaus la keka, O Ginu, inyang kinau lang danum, at dininan mong danum a ibat king batung maragul.

⁵Ing kasakitan a ginamit mu ban parusan la ding kalaban da ya ing migligtas karing kekang memalen king panaun ning karelang pamangailangan.

⁶Lebug me ing ilug dang mamagus at gewa mung mabuluk ing danum kapamilatan ning daya.

⁷Iti parusa karing kalaban a minie utus a paten la ding bingut da ring kekang memalen,

⁸oneng dininan mu lang labis-labis a danum king panaun a e ra asahan. Peintulut mu ing kumau la karin king disyerto ban ipatakman mu karela ing parusa mu karing karelang kalaban.

⁹Binili mu la king mabayat a kapagsubukan, at iti disiplina karelang magdalang lunus, ban abalu ra nung makananu mong pasakitan ding taung e mayap potang atulan mu la.

¹⁰Berug mu la ding kekang memalen antimo nung makananung ing metung a tata babarugan ne ing anak na ban dinan mong babala. Oneng anting mabagsik a ari; inatulan mo ding kalaban.

¹¹Paraparehu lang migdusa ding atyu king malapit at king marayu.

¹²Midobli ing karelang kalungkutan at sinaingsing la kanitang aganaka da la ring bage mepalyari.

¹³Inyang aintindian da king ing karelang parusa para king ikakayap da ring kekang memalen, kanita da akilala king ita dapat mu, O Ginu.

¹⁴Itang lalaking inugse ra inyang malati ya at e ra buri ya ing meging pibuburian da at pagmumulalan. Alang kalupa ing karelang kau; e na kalupa ning kau da ring taung malinis a bie.

¹⁵Ing dapat dang e ustu ya ing tinaid karela king kamangmangan. Inya sinamba la karing ubingan at aliwa pang animal a alang isip at makasumami. Uli na niti, perusan mu la king kapamilatan da ring dakal a animal a alang isip a kekang peparala,

¹⁶at tiru mu karela king ding bage a makapalpikasala karela kareti la naman magdusa.

¹⁷Ing kekang kayupayan, O Ginu, ya ing linalang king yatu king kapamilatan na ning bage alang itsura. Mayan keka ing parala kang dakal a animal a oso o ding mabagsik a leon ban parusan la.

¹⁸Malyari kang lalang bayu at mabagsik a animal a mangisnawang api o papalual makapal a asuk o papalual api a balamu kildap karing mata ra.

¹⁹Mayan keka ing lalang kang bayung animal at e na kailangan pang lumusub la at pamaten deting tau. Akit da la reti mate na la king takut.

²⁰Oneng iti e na kailangan uling malyari mu lang gisanan a lahi king kapamilatan na ning hustisia o king metung mung labul. Oneng pinili mu ing sukdan, bilangan, at timbangan ing sablang kekang daraptan.

²¹Apakit mu ing kekang kayupayan nanumang oras a buri mu, at ala metung mang makasabat kaniti.

²²Ing mabilug a yatu, king kekang panlalawe, anti yang metung a butil a balas a e na apakimut man ing timbangan; anti yang kapatak a ambun neng abak a maranun.

²³Tune kang mayupaya ban arapat ing sabla, oneng malunusan ka king ninuman; panupaya mu la ding kekeng kasalanan at dirinan mu kaming oportunidad ban sumisi.

²⁴Kaluguran mu ing sablang makalto at ala kang kasaman king nanumang kekang lelangan. Nung e mu makanyan, e mu sa lelangan.

²⁵Makananung makapanatili ya ing metung a bage nung e mu kaburian? Makananu yang makapanatili nung e me lelangan iti?

²⁶Peintulut mu, O Ginu, ing manatili ya ing balang metung king kekang lelangan, uling iti keka at kaluguran mu ing sablang mabibie.