Read Kapampangan Wisdom 12 Bible Online

Wisdom 12 - Kapampangan bible

Wisdom 12

¹Atyu king balang metung at metung karela ing espiritu mung alang kamatayan,

²inya pakakalale mu lang tutulid detang mikasala keka. Paganaka mu karela ing daraptan da at dirinan babala ban lakuan da ing dapat a e ustu at ibili ra ing kapanaligan da keka, O Ginu.

³Kesaman mu la ding taung menuknangan king banal mung bansa kanitang minunang panaun

⁴uli na ning makasumami dang dapat. Dinapat lang pamangulam at e ustung pamanyamba;

⁵ala lang lunus mekamate karing anak at pengan da ing laman at daya ding kalupa rang tau. Mekiabe la karing makalihim a ritual

⁶nung nu ding pengari pete da la ring anak dang alang kabalu-balu. Inya ding makatua mi pete da la reting tau uling iti ing kaburian mu

⁷ban kanita ing gabun a mal king panlalawe mu maging karampatan yang tuknangan da ring kekang memalen.

⁸Makanyan man pepakit ka mu ring lunus kareting kalaban uling tau la mu. Peparala kang dakal a tamumu a muna karing sundalus mu ban tunggal ditak da lang gisanan ding kalaban.

⁹Wa, agyu mu lang apagisan a lahi deting taung alang Dios a katawan kapamilatan da ring memalen mung banal o karing mabagsik a animal o king metung mung mataram a amanu.

¹⁰Oneng paparala mung pakakalale ing kekang kayatulan ban midinan lang panaun sumisi agyang balu mu ing ibat la king e mayap a lahi; king e la mayap kabait da, at king e la magbayu king e ustung pamisip.

¹¹Manibat na king ibat makasumpa ne ing karelang lahi. E mu la perusan uli ning kasalanan da, e uling tatakut ka king kaninu pa man.

¹²Ika ing linalang kareting taung e mayap at alang makapagsalita ban idipensa la o matul keka king pamakamate mu karela. Alang makapangutang keka king depat mu o amunan ing kekang kayatulan.

¹³Ing sablang bage atyu king kekang pamaningat at alang aliwang dios a karela sukat mung matuliranan ding kekang kayatulan.

¹⁴Alang ari o pamuntuk king yatu ing mamarsala keka king ala kang matulid parusan mu la detang taung deta.

¹⁵Makatuliran ka at pamahalan mu ing sabla king katuliran. E mu gagamitan ing kekang upaya king pamamarusa king taung e mangaintulid parusa.

¹⁶King kekang sikanan manibat ing kekang hustisia. Malyari kang pakit lunus king ninuman uling ika ing Ginu ding sabla.

¹⁷Papakit mu ing kekang sikanan karetang magduda king kekang sakdal a upaya, at parusan me ing ninumang makibalu kaniti, oneng sasarian nang e na kikilalanan iti.

¹⁸Ganap ing kekang kayupayan, oneng malunusan kang babie kayatulan. Malyari mu kaming parusan nanumang oras a buri mu, makanyan man pamahalan mu kaming mitmung kapibabatan.

¹⁹King kapamilatan da ring depat mu tiru mu karing memalen mu king ing taung matulid sukat ya namang maganaka. Dininan mu lang dakal a oportunidad ban sumisi la karing kasalanan da.

²⁰Meging maingat ka at maganaka king pamamarusa mu karing kalaban da ring kekang memalen. Agyang pang kamatayan ing mangaintulid karela makanyan man binie mu pa ing sablang oportunidad ban lakuan da ing e ustung pamibiebie.

²¹Oneng meging maigpit ka karing mismung kekang memalen king pamamie mung kayatulan agyang mekikasundu ka karing karelang makatua at pengakuanan mong dinan karing mayap a bage.

²²Wa, paparusan mu kami, oneng apulung libung besis mu lang parusan ding kekeng kalaban ban kanita e mi kalinguan ing kekang kayapan neng atulan mi la reng aliwa, at neng ikami ing miyayatulan malyari keng maniawad lunus.

²³Pepasakitan mu la detang mibiebie e ustu at ing ginamit mu king pamamarusa karela ila ding mismung bage makasumami a karelang simban.

²⁴Tune lang melili king katutuan at simban da la ring makasumaming animal. Anti ding anak a malati, malagua lang melinlang.

²⁵Inya perusan mu no man uli na ning karelang kamangmangan at linto lang mangmang king kekang kayatulan.

²⁶Mayan ya mu ing parusang binie mu karela, oneng detang alang pansin king kekang babala mangaintulid la king beyatan ning kekang kayatulan.

²⁷Inyang ding animal a kikilalanan dang dios ginamit na la ning Dios king pamamarusa karela mibuklat la mata, at akilala da king ing tune Dios ya ing maluat nang e da buring kilalanan. Inya digpa karela ing mabayat a parusa.