Read Kapampangan Wisdom 13 Bible Online

Wisdom 13 - Kapampangan bible

Wisdom 13

¹Tune lang mangmang ding e makibalu king Dios. Akakit da ing mayap a bage king yatu, oneng e de akakit ing mabie Dios. Pegaralan da la ring bage gewa na, oneng e re balu itang kareti linalang.

²Ding kikilalanan dang dios a mamahala king yatu ya ing api o ing angin o ing bagyu o ding batuin o ing mamagus a danum o ding saslag king banua.

³Nung magagayuma la king leguan da reting kikilalanan dang dios sukat dang abalu ing maygit ya ing linalang king sabla, ing Ginung Kakataskatasan. Ya ing penibatan da reting sablang malagu.

⁴At nung mangasdan na la king upaya ra at sikanan da reting bage, dapat sanang akilala da king lalu yang mayupaya ing linalang kareti.

⁵Akikilala ta ya ing Miglalang king kapamilatan na ning pamagumasid king mabilug a yatu at king malagung melalang.

⁶Mapalyaring e la lubus parsalanan; marahil migkapilit lang akilala de ing Dios. Mu pin melili la king karelang pamanintun.

⁷King pamagaral da karing bage makapaligid karela, tune lang megayuma king leguan ning ikit da angga king meniwala la king deti dios la.

⁸Oneng ala lang asangkan ba't melili la.

⁹Nung agyu dang pagaralan ing atyu king yatu, obat e re abalu ing Ginung linalang king sabla?

¹⁰Ding pekamangmang karing mangmang ila ding mamasa karing bage a alang bie, ing samba karing bage gewa ning tau antimo ding larawan da ring animal a megawa king gintu, pilak o karing alang silbing batung dinukit da kanitang minunang panaun.

¹¹Ating metung a taung biasang mandukit. Kinutud yang metung a tanaman; leko ne balat at ginawa yang kagamitan a pakinabangnan na ning tau.

¹²Ginamit nang panangab king pamaglutung pamangan ing tatal-tatal at kinabsi ya.

¹³King metung a kapirasung ala nang kasilbian, uling baluktut ya at dakal a buku, king penandit a ala yang gagawan maingat neng inubug at dinukit king larawan ning tau

¹⁴o king larawan ning animal a alang silbi. Kaybat, pininturan neng malutu at tikpan na kaniting pintura itang dake a e pulidu panga-obra.

¹⁵Ginawa yang masanting a pibibilianan king pader ning bale at karin ne binili, at pekatatag ne kabilian king kapamilatan da ring paku.

¹⁶Pekasamasnan ne kabilian ban e ya manabu uling balu na king larawan ya mu at mangailangan yang saup uling e na asaupan ing sarili na.

¹⁷Oneng manalangin ya king larawan a alang pangisnawa tungkul king pamakiasawa na, tungkul karing anak na at king pibandian na. At e ya marine.

¹⁸Maina ya iting larawan, oneng manalangin ya king larawan ban mika masanting ya pamikakatawan. Mete ya iting larawan, oneng manalangin ya king larawan ban e ya mate. Ala yang akarapat, oneng manalangin ya king larawan ban magtagumpe ya king lakad na.

¹⁹E la man makakimut ding gamat na, oneng manalangin ya king larawan ban saupan ne king negosyu na, king kapanintunan na, at king obra na.