Read Kapampangan Wisdom 14 Bible Online

Wisdom 14 - Kapampangan bible

Wisdom 14

¹Makanyan ing daraptan ning taung magsadiang maglayag king mayalun a dagat. Maniawad yang saup king metung a dutung a e matibe at e ne kalupa ning barku a saken na.

²Pinlanu ne ning metung a tau ing barku king kapagnasan a manakitan ya, at belangkas ne at gewa ning magaling a pangamat.

³Oneng king ingat mu, O Ibpa, ika ing migmanehu kaniti at ing linawe king dalanan na. Ika munaman ing mitnube king pandalan na karing alun na ning dagat.

⁴Agyang ala yang sibukan ing ninuman, malyari yang maglayag king dagat uling iligtas me king nanumang panganib.

⁵Kaburian mu ing maging magamitan ing sablang bage a kekang lelang king kapamilatan na ning kekang Kabiasnan. Inya manalig la ding tau king dutung a barku a sasagasa king alun at kaybat miras lang ligtas king pupuntalan da.

⁶Makanyan ing milyari kanitang minunang panaun, kanitang mamamate ne ing mapagmatas a lahing higanti. King kekang patnube mekatakas yang makasake king barku ing kapanayan na ning yatu. Uli na niti, e ya mitda at linto ya ing metung a bayung lahi ning tau.

⁷Mibendisyunan ya ing barku nang Noe a mekapagligtas king katuliran,

⁸oneng misumpa ya ing larawan a gewa ning tau. Makasumpa ya naman ing taung gagawang larawan uling kikilalanan neng dios ing bage masisira a gewa na.

⁹Pikakasaman na la ning Dios ding taung e mayap at ing karelang dapat.

¹⁰Parusan na ning Dios ing dapat a e ustu at ing dinapat.

¹¹Dugpa munaman ing kayatulan karing larawan a sasamban da ring paganu agyang megawa la ketang bage lelang ning Dios. At meging makasumami la; makaibie lang kakatakiran at bitag karing bitis da ring taung mangmang.

¹²Magumpisa ing pamakipangatawan kanitang meisip la at megawa ding larawan. Meging e mayap ing pamibiebie da ring tau manibat na kanitang linto la.

¹³Alalu kanitang megumpisa ya ing yatu ni e la manatili king kapilan pa man.

¹⁴Linto la deti uli na ning ketasan nang lub ning tau, inya naman mitakda kareti ing malalagua rang kawakasan.

¹⁵Misan, ating metung a tata a labis melungkut king pangamate nang e oras ning anak na. Aisip na ing gawa yang larawan na ning anak nang mete. Kaybat na nita, simban ne iting anting dios at tiru na ing lihim a seremonia ning pamanyamba karing taung sasakupan na.

¹⁶King kelambatan linaganap iting e ustung pamanyamba, at king utus da ring ari mipatupad ing pamanyambang larawan.

¹⁷Ating taung manuknangan karing marayung lugal a bisang munie parangal king ari, oneng uli na ning marayu la e ra arapat iti arap ning ari. Inya ginawa lang larawan na ning ari agpang ketang alarawan na ning isip da.

¹⁸Oneng ing pamagnasa na ning taung magaling a pangamat king pamandukit a ginawa king larawan ya ing pepasari king pangalaganap na ning pamanyambang larawan. Miyawa pati detang e makibalu king ari.

¹⁹Malyaring pagnasan na ning magaling a pangamat king pamandukit ing purian ne ing ari, inya ginamit na ing gelingan na ban gawa yang larawan a mas masanting kesa king tune nang itsura ning ari.

²⁰Inya mayayagkat la ding tau king leguan ning megawang larawan ban karelang samban anting dios a kapilan pa mu parangalan anting tau.

²¹Iti ngan meging bitag a makamate, uling ding taung malungkut o atyu lalam nang upaya ning ari kuma lang batu at dutung at kaybat ibie da kareti ing parangal a mangaintulid mu king metung mung Dios.

²²E sapat karela ing lisian da ing beluan tungkul king Dios, mibiebie la pa libutad ning e ustung pamakilaban, at king karelang kamangmangan inaus da iting kapayapan.

²³Makamate lang anak neng tatanggap lang bayung kayanib, pagselebran da la ring malalam a lihim a seremonia, at magpasasa la king pamangan at inuman a makalasing at magdalang dapat a manawang.

²⁴Milalako karela ing pamangawat king sarili at akakalinguan dang gagalangan ing kabanalan na ning bie talasawa. Patraidul lang makamate tau o palungkutan de iti king kapamilatan na ning pamakipangatawan da king asawa na.

²⁵Magulu ing sabla; makapangilabut a patayan, pamanako, pamamirait, alang katapatan, alang kaayusan, magbabo ing kalaraman,

²⁶e la biasang kilalang utang a lub, gigipitan da la ring taung alang kasalanan, alang kagalangan, maging bakla la deng lalaki at buri da ring babai ing maging lalaki la, mikakawani la ding miyasawa, dakal ing pamakipangalugud at ala lang marine.

²⁷Ing pamanyamba karing larawan, a e man sukat banggitan ing lagyu ra, ya ing pamagumpisa na at kawakasan ampon bunga na ning balang e mayap.

²⁸Milalako la king sarili da ring sasambang larawan uli na ning tula ra o mamagsalita lang kalaraman antimong ibat king Dios o mibiebie la king e ustung dapat o king alang nanuman kapikakunuan siran da ing binie rang amanu.

²⁹Magsalita lang kalaraman agyang sinumpa lang sabian da ing katutuan, at balu da ing e la miparusan uling binili da ing karelang kapanaligan karing e mangisnawang larawan.

³⁰Oneng datang mu rin ing parusa uling linisia la tungkul king beluan king Dios uli ning pamanyamba dang larawan, at uling lepastangan da ing kabanalan king kapamilatan na ning pamagsalita dang kalaraman ban apirait da la ring tau.

³¹E king upaya na ning nanumang binie rang sumpa king ukuman ing mamarusa karing taung e mayap, nune ing kayatulan a karapatdapat king mikasala. Iti ing mangaintulid karela.