Read Kapampangan Wisdom 15 Bible Online

Wisdom 15 - Kapampangan bible

Wisdom 15

¹Oneng ika, O kekaming Dios, maganaka ka, tapat ka, at mapibabata. Pamahalan meng ating lunus ing meto lelangan.

²Agyang pang mikasala kami, bandi mu ke pa mu rin uling kikilalanan mi ing kekang kayupayan. At e kami mikasala uling balu mi king bandi mu kami.

³Ing beluan keka ganap makatuliran, at ing pamangilala king kekang kayupayan ya ing pamagumpisa na ning bie alang angga.

⁴E na kami alili ning e ustung dapat na ning tau antimo ing ginulis ning metung a pintor o ding larawan a pininturan miyayaliwang kule.

⁵Milalablab agad ing kasabikan da ring mangmang ban pagimbutan da la reting larawan a alang bie.

⁶Ing ginawa o magnasa o sasamba king larawan lulugud ne king metung a bage e mayap, at tanggapan na ing mangaintulid neng bibili na ing kapanayan na kaniti.

⁷Lalamasan ne ning gagawang kuran ing malambut a pila at kaybat iyubug neng mitmung kaingatan ban gawan kasangkapan. Gagawa yang bage a magamitan at e magamitan, oneng gagawan no ngan king mismung pila at iyubug. Ya mismu ing bala nung isanu ing gamitan at nukarin ya gamitan.

⁸Tau ya ing gagawang kuran a kapilan pa mu miyubug ibat king gabun. At e maglambat magbalik ya king gabun a penibatan na, potang isubli ne ing bie a inandam na. Oneng gigisanan na naman ing panaun na at sikanan king pila ban gawa munamang larawan a alang kabaldugan.

⁹E na pansin king e lumuat sakit ya o mate ya. Ing interes na ya ing makiligligan ya karing platerung gintu, platerung pilak, at platerung tangsu. At pagmaragul na ing gagawan na agyang deti e la tutu.

¹⁰Alikabuk ya mu ing pusu na, mas maulaga ya ing burak kesa king kapanayan na, at mas maulaga ya ing pila na kesa king bie na,

¹¹uling e ne balu ing Dios a miyubug king pangatau na at minie kaladua at mabie espiritu king bie na.

¹²Tuturing neng pialung mu ing bie, anting metung a palengki nung nu ka manakitan salapi. Ngana, Kailangan kung manakitan salapi agyang king e ustung paralan.

¹³Mas balu na kesa karing aliwa niting taung gagawang larawan at kasangkapan a pila king mikakasala ya.

¹⁴Oneng ding lalung mangmang pa kesa karing anak a alang kabalu-balu ila ding kalaban a manggipit karing kekang memalen, O Ginu.

¹⁵Bala da king dios la ding sabla rang larawan agyang atin lang mata ding larawan makanyan man e la manakit; atin lang arung, oneng e la mangisnawa; atin lang balugbug, oneng e la makaramdam; atin lang taliri, oneng e la makatagkil; atin lang bitis, oneng e la makalakad.

¹⁶Ing tau ya ing ginawa kareti, at itang menandam pangisnawa na ya ing miyubug karela. Ala metung mang tau a ating upayang gawang dios a kalupa ning tau.

¹⁷Tau ya mu at ating kamatayan, at ala lang pangisnawa ding gagawan da ring gamat na. Maygit ya kesa king larawan a sasamban na. Ya mabie ya, oneng ding sasamban na e la mika bie kapilan man.

¹⁸Ding taung anti kareti sasamban da la ring makasumaming animal at pati na ding alang bitasang isip.

¹⁹Ala la mang bitasang leguan deting animal at ala metung mang maki buri karela. Melaktawan la king Dios kanitang petunayan na at binendisyunan na ing sablang lelang na.