Read Kapampangan Wisdom 16 Bible Online

Wisdom 16 - Kapampangan bible

Wisdom 16

¹Uli na niti, tinanggap lang karampatan a parusa king kapamilatan da ring pulupulutung a ayup-ayupan.

²Oneng ika, Ginu, e mo perusan ding memalen mu, bagkus pepakit kang ganaka karela at pepadalan mu lang pugu ban mika maniaman lang pamangan at kumabsi la.

³Depat mu ngan iti ban kanita e la makapangan ding tau Ehipto, neng danupan la uli da ring pepadala mung makasumaming animal. Oneng meranup la mu ding memalen mu king sinaguli mung panaun, at kaybat na nita mengan la king pekamaniaman a pamangan.

⁴Kailangan lang dumalan maragul a kasakitan ding manalipit king kekang balayan ban akit da ring memalen mu nung makananu mu lang pasakitan ding kekang kalaban.

⁵Inyang ding makatakut at mabagsik a kamandagan a ubingan lisuban da la at pete ding kekang memalen, e migluat ing mua mu at milako, at e mu peintulut ing magisan lang mate.

⁶Metung ya mung babala karela itang makuyad a kasakitan a ita. E miglambat dininan mong metung a tanda ning kaligtasan. Iti ya ing tangsung ubingan a munie paganaka king aduan na karela ning kekang Kautusan.

⁷Kumayap ya nung lawan ne ning metuktuk king ubingan, e ketang ikit na, nune king kapamilatan mu, ing magligtas king meto ketawan.

⁸King pamaniapat mu kaniti pepakit mu karing kalaban mi king ika ing magligtas king tau king nanumang e mayap.

⁹Mete la ding kalaban mi king ket da ring durun ampon lango at alang nanumang makapakayap karela, uling mangaintulid lang miparusan king kapamilatan da reti.

¹⁰Oneng e la ninanu balang ding kekang memalen pati karing kamandagan a ubingan uling atin kang lunus, at segipan mu la ampon inulu.

¹¹Metuktuk lang ubingan ban kanita aganaka da la ring kekang kautusan, at agad mu lang linigtas ban e la mangalinguan keka at ban pakinabangnan da ing mayap mung dapat karela.

¹²Alang panulu o tatapal o panguskus ing mekapakayap karela. Ing pepakayap karela, O Ginu, ya ing kekang amanu; ing amanung pakayap karing sablang tau.

¹³Ika ing ating upaya king bie at king kamatayan; ika ing makadala king tau king kamatayan at ika mu rin ing makabalik king bie na.

¹⁴Mapalyaring ing metung a taung e mayap makamate yang kalupa nang tau, oneng e ne malyaring abalik a bie ing pete na o iligtas ing kaladuang makasukul king tuknangan da ring mete.

¹⁵Ala metung mang makaligtas king kekang gamat.

¹⁶Lawan mu la detang taung e mayap a detae ra ka buring kilalanan Dios. Uli na niti, perusan mu la king kapamilatan na ning kekang maragul a upaya. Berug mu la karing masikan a bagyu at uran-lipat, at megisan la king api.

¹⁷Ing makapagmulalang bage ya iti: ing danum a pamatda king api lalu nang pepalablaban iti. Makilaban la ding sablang puersa ning meto lelangan ban idipensa da la ring taung matulid.

¹⁸King metung a pamikatagun mitda ing api ban e na la paten ding tinubud nang animal a mamarusa karing taung e mayap. Kailangan dang akilala deting tau ing tutukian na la ning parusa na ning Dios.

¹⁹Oneng king aliwang situasyun lalung milablab ing api king makapadurut a danum ban siran na ing pupul king marangle da ring makasalanan.

²⁰Oneng e la mirasnan kaniting kasakitan ding memalen mu, nune dininan mu la king pamangan da ring anghel. Ibat banua, dininan mu lang pamangan a e na kailangan ilutu pa; makasadia nang kanan. Iti pamangan a babie tula king metung at metung agyang nanu ing panlasa na.

²¹King kapamilatan na niti pepakit mu nung nu anti karagul ing pamaningat mu karing kekang anak. Aburi da ngan itang pamangan a ita, uling maging maniaman ing lasa na agpang ketang buri na ning mamangan.

²²Sukat sanang malaso anting yelu, oneng e melaso agyang pang ilutu king api. Kaniti mu pepakilala king balen mu king ing api a minyilab king pupul da ring karelang kalaban kabang masikan mababaldug ing uran at lipat

²³ya mu rin ing api a milako upaya ban atin lang apangan ding mayap a tau.

²⁴Ika ing linalang king meto sikluban; makapailalam ya king kekang upaya. Gagamitan na ning meto lelangan ing upaya na ban parusan la ding taung e mayap. Oneng maging banayad ya at maganaka karetang manalig keka.

²⁵Atin yang miyayaliwang itsura ing meto lelangan ban ipakit mu nung makananu mu lang ingatan ding sablang mamaus keka.

²⁶Iti ngan milyari, O Ginu, ban ipayabut mu karing memalen mung pakamalan king e la bukud mabibie karing karelang tanaman. Ing kekang amanu ya ing babie bie karetang sablang manalig keka.

²⁷Melaso king mumuna nang aslag ning aldo itang pamangan a e na alaso ning api.

²⁸Milyari iti ban ituru mu kekami king sukat keng mibangun bayu ya sunlag ing aldo ban munie kapasalamatan keka, at manalangin kabang saslag ya ing aldo.

²⁹Oneng malasong anting yelu ing kapanayan na ning taung alang pasalamat at magus anti ing danum a e magagamit.