Read Kapampangan Wisdom 18 Bible Online

Wisdom 18 - Kapampangan bible

Wisdom 18

¹Oneng para king kekang memalen a banal saslag yang masala ing kekang sala. Dimdam da ring karelang kalaban ing siwala da, oneng e ro akakit. Mariria la king mayap dang kapalaran ding kekang memalen a e magkakasakit.

²Pasalamat la ding kalaban da uling agyang diptanan da lang e mayap e no man minablas karelang e mayap. Inya meniawad lang tawad king depat dang pamakipate karela.

³Kanita pitnubayan mu la ding kekang memalen king pamunta da king bansang e ra balu. Pitnubayan mu la king kapamilatan na ning asias a api a balamu aldo a maslag, oneng e naman manyilab.

⁴Oneng ding kalaban dang e mipaintulutan manakit king sala mangaintulid karela ing maging bihag na la ning karalumduman, uling gewa da lang bihag ding kekang memalen. At uli da ring kekang memalen sinlag ya ing alang anggang sala na ning Kautusan a miyabie king meto yatu.

⁵Pete da la ring bingut da ring kekang memalen, oneng ating metung a miligtas. Inya pete mu la naman ding karelang bingut, at gisan pete ding karelang dakal a sundalus king kapamilatan na ning maragul a albug.

⁶Sinabi mu nang minuna karing makatua mi ing mapalyari king benging ita ban tumula la at sikan a lub king pangatuparan da ring pangaku mu karela.

⁷Balu da ring kekang memalen king iligtas mu la ding taung matulid at parusan ding karelang kalaban.

⁸Itang paralan a depat mu ban parusan la ding kekang kalaban ya naman ing ginamit mu king pamaniaus kekami ban dinan mu kami king kekang maligayang dangalan.

⁹Lihim lang minie ain-sakripisyu ding tapat a lalaki na niting mayap a bansa. Pikayari da ngan ing mamintu la karing utus ning Dios at miyabe-abe la busal ning kasakitan at ning kanawan. Kanita pa kakanta da na la detang matuang kanta ning kapurian keka.

¹⁰Oneng meramdam nu man karin ing tangis da ring karelang kalaban uling mete la ding anak da.

¹¹Miparusan ya ing ipus nung makananu yang miparusan ing panginuan. Makanyan munaman ing miras king ari at king karaniwan a tau.

¹²Paraparehu lang kematen anak. Tutu lang dakal ding mete. Ditak la mu ding mitagan karela at e do agyung ikutkut ding mete. King ditak mung penandit mete la ding pamakalan dang anak.

¹³E la kasi minie pansin karing babala; ing penaligan da ya ing upaya ning karelang salamangka. Oneng inyang mete no ding anak dang lalaking pangane, kanita da akilala king anak ne ning Dios ing balen ning Israel.

¹⁴Milabas ya ing kapitna na ning kapitangan ning bengi at tahimik ampon payapa ing sabla.

¹⁵Kabudabud dinatang ing mayupaya mung amanu a ibat king kekang mal a trono king banua, at anti ing mabagsik a sundalus minta ya libutad na ning bansang ita.

¹⁶Darala ne ing mataram a panabak at ing utus mu. Tinalakad ya; susukdul ya king banua ing buntuk na at kitmuan neng kamatayan ing mabilug a bansa.

¹⁷King penandit a ita, menakit lang makatakut a lupa ding tau at mikatmuan lang takut.

¹⁸Misusumangid lang mibubulang ding mamamate at sasabian da ing sangkan nung inya mamamate la.

¹⁹Pepauna na na iti karela ning karelang apaninap ban abalu da ing sangkan bayu la mete.

²⁰Delanan da munaman ing kamatayan ding taung matulid king paglakbe da king disyerto, oneng ing mua mu e migluat.

²¹Metung yang taung alang kasalanan ing migligtas karela king panaun a ita. Depat na ing sukat marapat bilang pari. Menalangin ya at dinuluk yang insenso. Matatag yang tinalakad arap ning kekang mikakalukung mua at dininan nang kawakasan ing kasakitan. King depat nang iti pepatunayan na king ya talasuyu me.

²²Migtagumpe ya king pangawakasan na ning mapait a salut; e king kapamilatan na ning sikanan nune king pamanalangin at pamamanggit karing pangaku mu karing karelang makatua.

²³Memilatan ya inyang mitambak la ding mete, memilatan ya at mepigil ing mua ning Dios. At tinuknang ing salut.

²⁴Makalarawan ya ing mabilug a yatu king makaba nang balabal. Makadukit la karing apat a hilerang batu ding kapigaganakan ding karelang makatua at atyu ing kekang kamalan king diadema at makabili ya king kanuan na king kapamilatan na ning turban.

²⁵Tatakut ya kareti ing Anghel ning Kamatayan at tinuknang ya. Makagyu ne itang kapurit a sibukan a ita ban tuknang ing kekang mikakalukung mua.